Read Poumei Naga NEHEMIAH 4 Bible Online

NEHEMIAH 4 - Poumei Naga bible

NEHEMIAH 4

¹Chuo Etao Jihudimai nou kivo nasü soushu tare touyu ko hai Sanballat nou chouloua rarou shore ae Etaoye ngaophou moa konüre.

²Puhnou puhvei samaitao nghoujü hinou ae Samaria maivei reihmai me nghoujü hinou haibüa paoe, “Lülou hoshoa buyu Jihudimai nou dai soulai tea tsüchowe? Puletao nou nuhdu nasü soushu dakhai lousüe touwu? Puletao hai posheela peiyu vanou vahtao hai teithe ali hinou souche lousüwu? Mei deilai khaitouyu nghouhrao hinou poa kivo khore chuh sü soulou süwu?”

³Tobiah-a süpehao hinou la-a nou bue, ae puhnou haibüa paopue, “Kabüyu kivo sü puletao nou soulai touwe? Puletao vei kivo hai lakhao koute nou-a taokho lousüe!”

⁴Enou haibüa veachi paoe, “Oh Ramai, puletao nou Etaoye ngaophou moa konüyu sü kei nou peio. Puletao nou Etaoye jünüyu nasü panou lah puletao pei hi vepeio. Puletao vei buyu na veishi sü mainou pa shaopoa tatheo, ae puletaoye sü hukhamai soua vakou maivei teidei hi nüpoa tapeio.

⁵Puletao nou vah ashi soukhai touyu khesü mah khaipeiso, ae puletao vei mahmo khesü ngai peiso, daiolouzü puletao nou kaoduta-a buyu kivo souyu maiye sü ngaophou moa konüwe.”

⁶Südonou Etao nou kivo hai dalipha hai khokhe loure, daiolouzü maikhe mai hai vah sounüyu tsüle hai pfüloure.

⁷Ana Sanballat, Tobiah, ae Arab mai, Ammon mai alia Ashdoh hi maitao nou kivo hai khove cheba loure touyu ko sü choulou khaie, puletao hai rarou shore.

⁸Südonou puletao nou Jerusalem hi reih hulou soubüro peilai tea puletao mai hrülai nou koa do zholoure.

⁹Ana Etao nou Ramai hi veachi paoe, ae hea-khei soumoa puletao nou reih huloure sü panou reihkhao soua buloure.

¹⁰Judah hi maitao nou haibüa lou sou-e: “Vah vea-a souyu donou Etao hai lülou hore; Kivo nghoushi polai laiyu sü taoli buloure. Kivo hai kabüa Etao nou souche loulai?”

¹¹Etaoye ngaobayu maitao nou haibüa tsücho-e, “Puletaoye panou Etao vei shodo ashi nasü sülou ngaolou moa bukinou, Etao nou puletao hisü taveloua puletaoye sü southawulai, ae puletao nou kivo kho-a buyu nasü panou soupu laimoe.”

¹²Ana Etaoye ngaobayu maitao hinou koa hrüyu Jihudimai nou Etao hisü tobai soumoa tave puletao nou tsüchoda-a buyu khesü paongao peie.

¹³Südonou Enou maikhe maiye panou puletao vei khü-khü thaifüa puletao vei khoche, heung, ae voulou khesü poloua kivo khokhe chelou moa buyu kivo thailo vanou kho-a buloure.

¹⁴Maikhemai hai ngaopi-a levea-a buyu sü Enou ngaoloure, südonou Enou puletao hi ae süthai-apei maitao alia peikhoyu maitao hisü paoe, “Etaoye ngaobayu maitaoye ngaopiso. Etao MAPAO hai daizhou koute duwe ae ngaopiwe touyu nasü licholoua neletao vei maitaoye donou, neletao vei nahmaitao, maipfü maitao ae neletao vei teidei donou reih soukhaio.”

¹⁵Etaoye ngaobayu maitao nou tsüchoda-a buyu nasü Etao nou süloure touyu puletao nou choulouyu phaki, ae Ramai nou puletao vei tsüchoda khaitouyu nasü aetou more touyu hai süloure. Süthaisü Etao mai hrülai nou kivo nasü soushu dakhai tare.

¹⁶Süzhou teithe hinou poa avei mai dali hai kivo khoyu vah sou-e, ae mai dali hai khoche, heung, voulou ae rüh pfüa reihkhao soue. Süthai-apei maitao nou vah soua buyu maitaoye soutaosoua babou peie.

¹⁷Na pola-a vah souyu maitao nou bah alilo nou reih basei powe ae bah alilo vanou na khesü pola peie.

¹⁸Kivo khoyu maitao nou khya hi khoche khipfüa vah souwe. Shabe nghouyu maitao hai ape hinou bue.

¹⁹Enou maikhe mai hi, süthai-apei maitao hi ae peikhoyu maitao hisü paoe, “Vah hai dusho-a nou soupoa ta-a bure, alia alinou ali hinou doulailai poa tare.

²⁰Hakinou neletao nou shabe nghouyu kho choulouzü, ahi tuve jülo. Etao Ramai nou Etaoye donou reih soupeilai.”

²¹Südonou teithe payu hinou poa khei vutou payu koute hai mai dali nou vah souwe, ae mai dali nou reihna toupfüa reihkhao soua kho-e.

²²Haibüa vah soua buyu teile hi, Enou süthaisa-a vah souyu maitao ae puletaoye babou-a soukha peiyu maitao hisü kheiki hai Jerusalem hinou buloua baio, sübüa khei teile hi Etao nou nuhdu nasü kho loulai alia hea teile hi vah souloulai tea paopeie.

²³Avei sabanü hai Enou khei ki-a phamoe, avei samaitao moa avei kilai maitao ae Eye khoyu mai ali koute-a puletao vei sabanü hai phamoe, Etao mai hrülai nou lahkuku vei reihna hai pokhai-a bue.