Read Poumei Naga NEHEMIAH 8 Bible Online

NEHEMIAH 8 - Poumei Naga bible

NEHEMIAH 8

¹Khouh anai navasü Israel mainou lah puletao vei nuhdutao hinou füsho loure. Khoukha ngaorai zhou hai puletao mai hrülai nou Jerusalem vei Dzü Rokhubomü khevai nou tave jüloure. Puletao nou naanou ae chikha süveio Ezra hi MAPAO nou Israel maiye donou Moses hi peikhai touyu Chikha Larübvü nasü povekhaio tea paore.

²Südonou Ezra nou Chikha Larübvü nasü naotu poutu, ae sükulou süyu mai hrülai vejüa buyu buh hisü pove loure.

³Puhnou rokhubomü hilo reiloua Chikha nasü shona nou poa hea koute hai phoungao-e, ae mai hrülai nou lenou shoa kei-nou peie.

⁴Chikha panou phoure donou lo doku khaitouyu buh hisü Ezra nou takou la loure, ae puhvei zhoulo va sü Mattithiah, Shema, Anaiah, Uriah, Hilkiah, ae Maaseiah nou la-a bue; ae puhvei nalova hai Pedaiah, Mishael, Malkhijah, Hashum, Hashbaddanah, Zekhariah, ae Meshullam nou la-a bue.

⁵Ezra nou lo dokua khaitouyu buh, mai hrülai nou zhingao lousüyu hisü takou la loure, ae puhnou larübvü nasü houpayu phaki mai hrülai nou tashu laloure.

⁶Ezra nou paoe, “Dushoyu Ramai MAPAO ye paosho-e!” Mai hrülai nou bah laloua haibüa chila peie, “Amen! Amen!” Puletao nou takou khoukhü loua ae pah pfünakou loua ratho-e.

⁷Süthaisü Levi mai haitao nou tashu laloua Chikha khesü maisouye panou sükuloure donou paola peie: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, ae Pelaiah.

⁸Ramai vei Chikha khesü puletao nou maisou hi daivanou peikhai toue touyu khesü panou süloure donou la dapaloua paongao peie.

⁹Maikhe mainou Chikha khesü choulouyu phaki, puletao vei tsüle sü daiwure, ae puletao hai kra-e. Südonou teidei khowo Nehemiah, naanou ae larü rü-apeio Ezra, ae maikhe maiye dou-apeio Levi maitao nou maisou hisü haibüa paoe, “Zhou teithe hai neletao vei Ramai MAPAO ye donou sheeyu teithe-e, südonou neletao hai dopfü laimoe, moa kra-a kraso.

¹⁰Chuo ki hi taho khonüh nükhaio. Touso chejüyu maiye koa neletao vei touso sünou peizhi khaio. Zhou hai Etao vei MAPAO ye donou sheeyu teithe-e, südonou leveaso. MAPAO nou neletaoye savayu peiyu sünou neletaoye soukhou peilai.”

¹¹Levi maitao nou maikhe mai hisü sheeyu teithe hi leveaso tea pao-a le soukaona peie.

¹²Südonou mai hrülai nou lahkuku vei ki hisü dakhai tare, ae puletao nou sasho-a nou khonüh nüe, alia touso hayu maiye sü puletao nou peizhi-e, daiolouzü puletao nou chikha phoungao peiyu khesü süku loure.

¹³Thainesho hai khü khü hinou peikho maitao koa loua nou napao maitao ae Levi maitao nou Ezra hisü tave Chikha khesü phoure donou vere.

¹⁴MAPAO nou Moses hi peikhai touyu Chikha Larübvü hinou Sahpao Nüh nüyu phaki Israel mai hai sahpao haoloua bua bailai touyu hai phouve ngaoloure.

¹⁵Südonou puletao nou Jerusalem hi ae nuh teidei veishi hisü haibüa soulo tea kharochi paota peiwure, “Chikha Larübvü hinou peikhai touyu thaifüa deichi vanou taho haosüübo, oliv süübo, chasüübo, nghabe, ae süübo khesü poloua rüpao sü soulo.”

¹⁶Südonou maikhe mainou taho süübo khesü shaoloua lahvei kipa hinou, Rathoki vei kijü hinou, Dzü Rokhubomü ae Ephraim Rokhubomü pah hinou bure repao khesü haoloure.

¹⁷Nüpoa tayu hinou dakhai veyu mai hrülai nou repao haoloua sühinou buloure. Haibüa souyu hai Nun nahpoutu Joshua vei teile hinou poa zhou koute hai zhouvu nou sourai railai hie, ae mai hrülai nou sava shore.

¹⁸Khonüh nütayu teithe arai hinou poa akhai koute hai puletao nou Ramai vei Chikha nasü teithetsü nou phou-e. Puletao nou teithe anai koute hai khonüh nüe, ae Chikha thaifüa teithe acha zhou hai akhai vei khonüh nüe.