Read Poumei Naga ESTHER 1 Bible Online

ESTHER 1 - Poumei Naga bible

ESTHER 1

¹Xerses nou veo souyu phaki puhnou tyadei krailia kainai hai India teidei hinou poa Sudan (Ethiopia) koute khasa-a hrüe.

²Süphaki Xerses veo nou Susa nuhbei nahinou vebuh hi bua vedei sü khowe.

³Puhnou veo koulouyu po asü vu, puhnou vedei hi buyu peikhomai, adusomai, reih hi peichamai, Persia ae Media hinou nuh khoyumai alia puhvei tyadeitao hinou adusomai hrülaiye kusave tovai zho-e.

⁴Khouh arou koute puhnou puhvei vedei hi kini, kaathe alia veiduso taosü pongaoe.

⁵Teithe haitao cheyuthai, veo nou Susa nuhbei hi hrüyu mai hrülai, taidu teiteiye puhvei fühao peida hinou vaipeie. Süsü teithe anai koute-e.

⁶Sühisü pha nou soukhaitouyu sah krayu ae teidai tyanou hrakhaitoue, süpeihao hisü daizüzüyu rai nou shouloua shahu vei bahtoukha hi jaloua pokou mutei chuh nou soukhai touyu deka vahi khikhai toue. Bu-züh khesü sana ae shahu nou souloua khaipei khaitoue alia phihea khesü krayu marbal, hoyu chuh, peivavayu chuh mutei ae teidai chuhva nou soukhaitoue.

⁷Sana pai hinou zhaoh khaipeie, sana pai khesü tyakuku khaitoue, alia touso khesü veo maili thaifüa panou tounü taosü toue alia sonütao sü pa sowe.

⁸Veo nou mai taralia panou tousonü taosü tousowuo tea puhvei kilai maitao hi kharochi peikhai toue.

⁹Naotumai tao-a veo vei ki hikha vainou vepfüpai Vashti nou sa-a nühnüe.

¹⁰Teithe anai zhou hai, veo nou zhaoh sozi paloua vashoa buyu phaki puhnou jülayu puhvei kilai mai anai taohi süolouzü Mehuman, Biztha Harbona, Bigtha, Abagtha, Zathar, alia Karkas mai haitao hi,

¹¹Vepfüpai Vashti ye nou vepeirü thouloua puhvei hüveiyu nasü maikhemai hi alia veo nah maitao hi tapa ngaore donou kharochi peie, daiolouzü honapai hai hüvei shoe.

¹²Ana kilai maitao nou talou vepfüpai Vashti hi veo vei kharochi nahai paoyu sü honapai nou zübare. Hai vanou veo hai rarou shore, alia puhvei rarouyu sü puh lekhe nou mei tao-a bure.

¹³Süthaisü vemai vei zhai thaifüa, puhnou chikha süvei shoyu mai ae chiku-apei maitao hinou daisouyu kao-e teanou chipha-a bue.

¹⁴Puhnou matsü soua sa-a chiphayu maitao hai Karshena, Shethar, Admatha, Tarshish, Meres, Marsena, alia Memukan - mai anai haitao hai Parsia ae Media vedei hinou peikhoyu maitaoe, veo ye patei teanou sa-a vah souyu maitaoe.

¹⁵Puhnou mai haitao hi paoe, “Chikha na thaifüa vepfüpai Vashti hi dai souyu kaoe, daiolouzü honapai hai veo Xerses Enou, kilai maitao ye seithou kharochi peiyu hai zübare?”

¹⁶Süthaisü Memukan nou veo alia puhye sa-a buyu maitao hi haibüa paoe, “Vepfüpai Vashti nou vah soumahyu hai veo hi likhei baimoa peikhoyu mai hrülai hi alia vedei hi buyu mai hrülai hi soumahwure.

¹⁷Daiolouzü vepfüpai nou souyu vah hai vedei hi hrüyu naotumai taonou sülou louzü puletao nou puletao cha maiye ngaophoumo talai, daiolouzü ‘Veo Xerses nou vepfüpai Vashti ye puh hi pawo tea paoyu phaki honapai nou paba-a baire tea naotu maitao nou paoa bailai’.

¹⁸Vepfüpai nou souyu zhaidou nahai sülouyu Parsia ae Media teidei hi naotu maitao nou zhou teithe hinou veo khehi buyu peikhomai hrülai hi polaire, alia ngaophou moyu ae vamoyu hai butalai.

¹⁹Veowo nenou haihai jüpa louzü, veo nou chisha peiyu chi ali rüpa peio, süsü souda louhoyu hinou vepfüpai Vashti ye panou veo Xerses nghoujü hi ve ngaopu khailai moe; alia honapai vei vebuh nasü honapai jünou veipuyu naotumai ali hi peiwulai.

²⁰Sübüa nou veo vei chishata peiyu chi nahai vedei teitei hi paosüta peilouzü, naotumai hrülai nou puletao vei maipuo maiye tsükhoua bailai.”

²¹Haibüa paopeiyu nahai veo alia puhye sa-a buyu peikhomai tao-a jüpare, südonou Memukan nou paoyu büa veo nou soure.

²²Puhnou vedei hi buyu tyadei teitei hisü lah tyadei hi raoyu la thaifüa alia lah tyadei hi tayu lacha na hinou kihikha ali hie maipu nou paopu sü soulai tea rüseita peie.