Read Poumei Naga ESTHER 3 Bible Online

ESTHER 3 - Poumei Naga bible

ESTHER 3

¹Haibüa payu phajütou thai, Veo Xerses nou Agag tyaosholea hinou veyu Hammedatha nahpoutu Haman ye sü puh khelove hi peikhoyu vahbu nasü thoupeie.

²Alia veo nou vedei hi buyu mai hrülai hisü nakouhloua Haman ye khurüo tea kharochi peie. Haibüa kharochi peikhai touyu nahai mai hrülai nou soukhai toue, ana Mordekai nou soubare.

³Süthaisü veo vei rokhu bomü hinou vah souyu kilai maitao nou Mordekai hi paoe, “Ne daisounou veo vei kharochi pfüthowe?”

⁴Haibüa puletao nou puh hisü teithechü paoa buyuma puhnou puletao vei chi sü choubare, daiolouzü puhnou puletao hisü paoe, “E hai Jihudimai ali-e, südonou Haman ye sü kouh khurü laimoe.” Mordekai nou paoyu chipao ae tayu zhaidou nasü puletao nou Haman hisü kabülaisa teanou pao peiwure.

⁵Süthaisü Haman nou Mordekai hai puhye nakouh tsükhoua khurü moyu hai ngaoloua rarou shore.

⁶Ana puhnou Mordekai hai daimai-e touyu liloua puh likhei hi puh bah khakhainü more. Südonou puh nou kabüa Mordekai tyarai ae veo Xerses vedei hi hrüyu Jihudimai hrülaiye souhaloure donou do-ashi hai phoutare.

⁷Veo Xerses nou vekou louyu po kiahai nava, Nisan tea kuyu khouh araina hisü Haman nou lichoyu nasü kabüyu teithe ae khouh hinou soulai touyu rako (“purim,” teanou kuyu) nasü zhuwe. Sünasü khouh kiahai nava süolouzü Adar khoukha kiasü hinou soulai tea doloure.

⁸Süthaisü Haman nou veo Xerses hi paoe, “Mai tyahrü ali hai nevei vedei teitei hinou raroupoa bue, puletao vei zhaidou hai tyahrü kukhe mai vei zhaidou jünou tyakue, alia puletao nou veo vei kharochi hai zümoe, südonou haibüa panou puletaoye buyu hai veo donou kaomoe.

⁹Veowo! nenou haihai jüpalouzü, puletao ye southare donou kharochi ali rüpa peio, sütoulouzü Enou vedei poa khore donou vah souyu veo vei kini khaiyu ki hisü shahu sücho 3,40,000 jünou pua pove thoupei lousüe.”

¹⁰Südonou veo nou puhvei sheesaoyu bahtoukha nasü phaloua Jihudimai ye ngaobayuna Hammedatha nahpoutu, Agag tyaosholea hinou veyu Haman hi peiwure.

¹¹Alia veo nou Haman hi paoe, “Pousha tao-a ae mai hrülai nou ne hi peiwure, ne lah sounü na thaifüa soukhaio.”

¹²Khouh arai nava khoukha kiasü zhou, Haman nou rü-apei maitaoye sü kupove loure. Haman nou paopeiyu chipao na thaifüa rüpaloua veo vei sheesaoyu bahtoukha nanou saoloua vedei teitei hi lah kuku vei pfüla hinou dapaloua nuh teitei hisü seitawure. Haihai veo Xerses zhih hinou rüloua veo vei shesaoyu bahtoukha nou saoloua seitae.

¹³Seiko nasü vedei hi buyu nuh teitei hi potae. Sühi kabüa nou kharochi nasü rüthou khaitoue toulouzü, Adar khouh khoukha kiasü zhou hai Jihudimai hrülaiye- tsümai-a nahlemai-a, naotumai-a alia nahmaitoua southakhai touwuo, alia puletao vei kini khesü polo.

¹⁴Seita khaitouyu kharochi nasü vedei hi buyu mai hrülai hi panou süzhou teithe soudaloure donou paota peiwure.

¹⁵Veo nou kharochi peiyu nahai veo vei Susa nuhbei hi buyu maisou hisü paota peiwure, alia vedei hi buyu nuh teitei hisü paota peiwure. Susa nuhbei hinou hrüa buyu maitao nou ko hai süloua büroa buyu phaki, veo alia Haman louzü zhaoh soa bubaie.