Read Poumei Naga ESTHER 5 Bible Online

ESTHER 5 - Poumei Naga bible

ESTHER 5

¹Teithe asü zhou sü, Esther nou vemaipfü ali nou naoyu sabanütao hai thouloua veo nou buyu vebuh hisü taloue. Veo sü puh nou buyu vebuh hinou talouyu ludu hilo rei-a bue.

²Vepfüpai Esther hai puhnou buyu vebuh hi talou la-a buyu ngaolou khaie, puhnou honapaiye ngaoloua zhuvea loure, alia puh bah hinou poa buyu sana süpo nasü Esther pei hi pola papeie. Süthaisü Esther nou kouh khoukhe loua süpo nasü deiloue.

³Veo nou honapai hisü paoe, “Ne daisounou haihi louwe, Vepfüpai Esther? Ne dai khonüyu buge? Nenou khoyu nasü neye peilai, süsü vedei dali koute khoyuma neye peilai.”

⁴Esther nou chila peie, “Veowo nenou jüpa louzü, Enou zhou veo donou souda khaitouyu tovai nahisü veo alia Haman nehai velou vaipeio.”

⁵Veo nou paoe, “Haman ye sü theashoa haihi saveo, sübüa ahai nou Esther jüpa nasü soupeilai.” Südonou Esther nou souda khaitouyu tovai nahisü veo alia Haman nou vewe.

⁶Puh hai nou zhaoh soa buyu hinou veo nou Esther hi paoe, “Nenou khonüyu nasü daige? Nenou khoyu nasü peilai. Alia nenou jüpayu nasü daie? Avei vedei dali koute-a neye peilai.”

⁷Esther nou paoe, “Enou jüpa-a khonüyu hai,

⁸veo nou Eye leshi-a ajüpa ae Enou khonüyu nahai soupeilai toulouzü, veo alia Haman nehai mai ahai khinou doshoa Enou souda laiyu tovai nahisü velou vaipeio, sühinou Enou daie jüpawe touyu nasü paolai.”

⁹Haman hai süzhou teithe savasho poa tare. Ana puhnou vefühao hinou tapayu phaki Mordekai nou puhye tsükhouyu zhaidou soungao moyu ngaoloua puh hai rarou shore.

¹⁰Ana puh nou lahye tukhaloua ki hi vetare, alia puhnou puhvei samaitao ae puh chapfü Zaresh ye sü puh ki hi kupo veloue.

¹¹Haman nou houmaitao hinou khaosoua puhvei kini kazhou buyu, puh nahpoutu kazhou buyu, veo nou puhye buh adu thoupeiyu, alia puhye peichomai ae adusomai kukhe jünou dupua popeiyu haitao sü pao-a nou bue.

¹²Alia süjünou pua Haman nou haibüa paoe, “Vepfüpai Esther koute-a honapai nou tovai peiyu hisü Eye likhei veo vei pasoua kua baie, doshoa Eye ve vai-o tea kupu hie.

¹³Ana haitao teitei hai-a Jihudimai puona Mordekai nou veo rokhu bomü hi bukisa sü E khamo hie.”

¹⁴Sübüa paopei khaie, puh chapfü Zaresh alia samaitao nou haibüa paoe, “Mitar 22 kuyu deka ali souloua sühi nou Mordekai ye dosho shona rai daothare donou veo hisü paowo. Süthainou vashoa nou tovai buh hisü tabai laimu.” Haman nou haihai kaore tea poloure alia puhnou rai daothare deka nasü souloure.