Read Poumei Naga ESTHER 6 Bible Online

ESTHER 6 - Poumei Naga bible

ESTHER 6

¹Süzhou khei hai veo sü zhithou louhoa bure, südonou puhnou licholoure donou puopao ko rüthou khaitouyu larübvü nasü puh hi pokou phoungao peio tea kharochi peie.

²Puletao nou phou kouyu phaki, veo vei bomü talouyu hi khoyu vasou datayu mai ahai, Bigthana ae Teresh nou kheikhei soua veo Xerses ye southare do-ashi nahai kabüa Mordekai nou paopeie touyu ko nahai-a rüthou khaitoua ngaoloue.

³Süthaisü veo nou paoe, “Haina vanou Mordekai ye dai tsükhouyu soupeie?” Veo pe hinou buyu kilai maina nou paoe, “Puhye halia soupei mohie.”

⁴Veo nou paoe, “Avah souyu mai li-a chikuyu ki haihi buhae?” Süphabü hinou Haman hai Mordekai ye rai daothare donou deka nasü souchewure tea veo hi talou paore donou sühi bue.

⁵Südonou kilai mai nanou veo hi paoe, “Haman hai neye daore donou haihi nou khoa nou bue.” Veo nou paoe, “Puhye panou haihi loukhaio.”

⁶Südonou Haman nou talou loure, alia veo nou puh hi paoe, “Enou tsükhou nüyu mai ali bue, kabüa nou puhye sü soupeiyu kaoe?” Haman nou la haibüa tsüchoe, “Eye moa nou veo sü thao kukhe liye tsükhou pure bue?”

⁷Puh nou veo hi paoe, “Veo nou tsükhou nüyu maina ye sü,

⁸veo nou banaoyu sabanü aveih taonou puhye sü banao peio, alia veo nou pfüyu rhei nasü panou pfülo, ae puh pei hisü vepeirü rüpeio.

⁹Süthaisü veo khehinou matsü khayu peichomai ali panou sabanütao sü noupeiwua ae puhye sü panou rheiphao hinou peipa buloua nuhdu teitei hisü süthai poa haibüa puhnou tayu ludu teitei hisü paokhaio, ‘Zhukhaio, veo nou jüpa-a tsükhou nüyu maiye sü haibüa tsükhouwe.’ ”

¹⁰Süthaisü veo nou Haman hi paoe, “Thashoa taho nenou paoyu büa sabanütao ae rhei nasü polo, ae nenou paoyu büa Jihudimai puona Mordekai ye sü soupeio. Nenou paoyu teitei sü soukhai toupeio.”

¹¹Südonou Haman nou sabanütao ae rhei sü pove puhnou Mordekai ye naopeiwua panou rheiphao hi peipa buloua puhnou rhei sü rai süthai poa nuhdu teitei hisü “Zhukhaio, veo nou jüpa-a tsükhou nüyu maiye sü haibüa tsükhouwe” tea shapao-a tae.

¹²Süthaisü Mordekai hai veo vei fühao, puhnou khoyu rokhu bomü hisü dakhai vetare. Ana Haman hai puh pa zholoua dopfüa puh ki hi tuve tare.

¹³Haman nou puh chapfü Zaresh alia puh samaitao hisü haibüa pare touyu teitei paoe. Süthaisü puh chapfü ae puh samaitao nou haibüa paoe, “Nenou Mordekai nghoujü hinou haongaore. Puh hai Jihudimai-e, ne puh jünou veilou hore, puh nou neye haongu peivu zülaire.”

¹⁴Puletao nou chipha-a buyu hinou, veo vei kilai maitao nou Haman ye sü thashoa Esther nou vailaiyu hisü kupoa tare.