Read Poumei Naga ESTHER 7 Bible Online

ESTHER 7 - Poumei Naga bible

ESTHER 7

¹Veo alia Haman hai vepfüpai Esther nou tovai peilaiyu hisü tare.

²Teithe ahai navu, zhaoh soa buyu teile hinou veo nou Esther hi paopu khaire, “Chuo, vepfüpai Esther, nenou jüpa-a ngaolou nüyu nasü daige? Süsü neye peilai. Nenou khonüyu nasü daige? Avei vedei dali koute-a neye peilai.”

³Süthaisü vepfüpai Esther nou chila peie, “Oh veowo, nenou Eye zhuvea peilouzü, alia nenou Eye jüpa louzü, Enou ne hi khonüyu nasü avei hrirai hai popeiso, alia amaitao vei hrirai-a popeiso.

⁴Amaitao alia Eye sü southare donou zholaiwure. E alia avei maitao hai panou qila soure donou zholai bailouzü, Enou neye haibüa daihao laimoe, ana Etaoye sü southare donou souwure.”

⁵Süthaisü veo Xerses nou vepfüpai Esther hi noue, “Thaonou sübüa ne hi soulai touwe, alia puhsü daiki nou bue?”

⁶Esther nou chila peie, “Etaoye ngaobayu na, alia souveayu nasü mai ashi Haman hainae!” Süthaisü Haman hai veo alia vepfüpai ye ngaopi shopoa zhua bue.

⁷Veo nou rarou sholoua lashu kipa peida hisü tapare, ana Haman hai kihikha nou puhvei hrirai hai khailu peio tea khore donou vepfüpai Esther hinou bure, daiolouzü veo nou puhye tudee laire touyu nasü puhnou süloure.

⁸Haman nou kaokouh Esther züphao hinou zhuvea kholai teanou buyu phaki, veo nou kijü payu hinou dakhailou ngaoloua, veo nou haibüa paore, “Puh hai avei ki hinou, anghoujü nou vepfüpai ye sazülai touwu?” Veo nou haibüa paoyu thaive, vasou datayu maitao nou lou Haman pa sü zholoure.

⁹Süthaisü Horbonah tea kuyu kilai mai nanou paoe, “Haman hai veo vei hrirai khailupa-apei Mordekai ye rai daothare donou puh ki hinou deka ali soukhai touwe. Süsü mitar 22 kua nou soukhai toue. “Haman ye sühinou rai daothawo”, tea veo nou kharochi peie.

¹⁰Haman nou Mordekai ye rai daothare donou soukhai touyu deka na hinou puhye sü daothawure. Süthai nou veo vei lekha nasü khaitae.