Read Poumei Naga ESTHER 8 Bible Online

ESTHER 8 - Poumei Naga bible

ESTHER 8

¹Süzhou teithe hinou veo Xerses nou Jihudimai ye ngaobana Haman vei kini khesü vepfüpai Esther ye peiwure. Alia Esther nou veo hi Mordekai hai kabüa nou puhye tyarai vewe touyu nasü paopeie, süthaisü Mordekai hai veo nghoujü hi talou buyu aetou peiwure.

²Veo nou Haman hi peikhai touyu sheesaoyu bahtoukha nasü poloua Mordekai hi peiwure. Alia Esther nou Haman vei kini taosü Mordekai bah hi thaothou peiwure.

³Süthaisü Esther nou veo phi hi kaokouh loua kra-a nou Jihudimai ye soushire donou Agag puona Haman nou soukhai touyutao hai soudalai peio tea khowe.

⁴Veo nou puhvei sana süpo nasü Esther hi pola shupeie, südonou honapai nou lashu loua paoe,

⁵“Veo nou haihai jüpa louzü, alia Etao ye zhuvea louzü, alia veo nou haihai kaowe toulouzü, zhuvea nou Hammedatha nahpoutu Agag tyaosholea hinou veyu Haman nou vedei teitei hi buyu Jihudimai ye souhawure donou rüta khaitouyu kharochi nasü panou soumore donou larü ali rüseita peio.

⁶Daiolouzü E kabüa amaitao ye southa souhayu sü zhuthoulou khailaige? Mokhaia kabüa Enou atyarai maitao ye soushiyu ae souveayu nahai heapoa zhuthoulou khailaie?”

⁷Veo Xerses nou vepfüpai Esther alia Jihudi puona Mordekai hi paoe, “Zhukhaio, Enou Haman vei kini taosü Esther hi peiwure, alia puhnou Jihudimai ye souhawulai touyu vanou puhye sü rai nou daothawure.

⁸Veo vei zhih hinou sheesaoyu bahtoukha nanou saoloua seitayu kharochi nasü soudakhai loushie, ana neletao nou azhih hinou Jihudimai hrülai hisü rütanüyu ko taosü avei sheesaoyu bahtoukha nanou saoloua rüseita loua bailai.”

⁹Veo vei larü rüyu maitao ye sü khouh asü nava, süolouzü Sivan tea kuyu khoukha kaisü zhou hai kuve jüloure. Mordekai nou kharochi nasü puletao ye panou Jihudimai ye donou rüloua vedei jha 127 süsü India (Souteimai) hinou poa Sudan (Ethiopia) hi koute soua dade khaitouyu tao hisü lahkuku vei pfülacha hinou rüsei tapeie, alia Jihudimai hi lah puletao vei pfüla hinou rüsei tapeiwure.

¹⁰Rükhai touyu larütao hisü veo Xerses zhih hinou, puh vei sheesaoyu bahtoukha nanou saoloua veo vei vah soure donou kipakhai touyu rhei tavei shoyu taoye sü panou ko nasü pfüa vedei teitei hisü potare.

¹¹Seitayu seiko nahisü kabüa rüthou khaitoue toulouzü, nuh tarali hinou hrüa buyu Jihudimai hai lah puletao ye vupaloure donou meme souloua reih soua bailai. Tyahrü tarali noua Jihudimai hi reih souve louzü, puletao nou puletao hi reih souveyu maitaoye sü southakhai touloua puletao vei kini khesü poloua bailai.

¹²Seitayu kharochi haina hai veo Xerses vei vedei teitei hinoulai, süolouzü Jihudimai ye souhawulai tea soudakhai touyu khouh kiahai nava Adar teanou kuyu khoukha kiasü zhou nou soulai.

¹³Seita khaitouyu kharochi haina sü chikha ali büa vedei hi buyu nuh teitei hisü shapao peilai, sübüa panou Jihudimai ye sü panou puletao ngaobamai hi khü phouloure donou souda loulai.

¹⁴Veo nou kharochi peiyu na thaifüa veo vei vah souyu rhei taveitao sü panou pfüloua tare, alia seitayu kharochi nasü nuhbei Susa hi hrüa buyu mai hrülai hisü shapao peiwure.

¹⁵Süthaisü Mordekai hai vemai vei na daiyu ae kaayu sabanü thouloua, sana peirü pfüloua ae züzüyu sabanü tuloua veo fühao hisü thaowua vakou tapayu phaki, Susa nuhbei hi buyu mai hrülai nou asasoua shusoua bure.

¹⁶Jihudimai ye donou jüpayu, asayu, vashoyu alia tsükhouyu nasü ngaoloue.

¹⁷Nuh hinou alia vedei hinou hrüa buyu Jihudimai hrülai nou seitayu kharochi nasü süloukhaie, puletao nou asah soua kaonayu khonü nasü nüe. Alia maitya kukhe taoli hai Jihudimai ye ngaopiyu donou Jihudimai soulai tea soutare.