Read Poumei Naga TAPALOUYU 1 Bible Online

TAPALOUYU 1 - Poumei Naga bible

TAPALOUYU 1

¹Jakob ye koa Ejipt hi velou hrüyu Israel ki hi maitao zhih sü haitaoe:

²Reuben, Simeon, Levi, ae Judah,

³Issakhar, Zebulun, ae Benjamin,

⁴Dan ae Naphtali, Gad ae Asher.

⁵Jakob hinou hrüveyu tyaonah maitao hrülai hai mai rainai-e. Josef louzü raichoki nou Ejipt hinou hrüa bure.

⁶Teile taoli sübüa puletao nou hrükouyu phaki, Josef, puh thaihou jürai maitao alia süna vei khaphao teitei sü thaita khaire,

⁷ana puletao vei tyaosholea, Israel mai hai tya kasho pare, mai alaosou hrükoure ae khouko-a dusho pare, sübüa puletao nou Ejipt teidei teitei sü hrüpa phouloure.

⁸Süthaisü Josef ye sümoyu mai alinou Ejipt hisü pa veo souloure.

⁹Puhnou puhvei maitao hi paoe, “Zhukhaio, Israel mai hai pousho pare alia khouko-a Etao jünou buloure.

¹⁰Puletaoye taida-a souvea peilai khe, sübümo louzü puletao hai tya kapaloua ngaobamai nou Etao pei hi reih souveyu phaki, puletao phaobo loua Etao pei hi soureih soulouveie, sübüa souloua Etao teidei hinou tutalou veie.”

¹¹Südonou puletao nou Israel maiye tudee poa vah panou soure donou mai dokhai loua puletaoye sa-a vah tateitya ae khoushoyu vah sü peia panou soue. Puletao nou veo Pharoah vei kini peipa peithouyu Pithom ae Raamses nuhdu ahai sü soupeie.

¹²Ana Ejipt mainou Israel maiye tudee-a souvea peikhaie, puletao hai tya kaapapu loua teidei teitei sü raoloure. Ae Ejipt mainou Israel maiye sü ngaopi pare.

¹³Südonou puletao nou Israel maiye khoushoyu ae veashoyu vah panou soue.

¹⁴Alia puletaoye veashoyu vah peia panou naichuh deie, ae dou hi vah teitei ae ki panou soua souvea-a souchoro peie.

¹⁵Süthaisü Ejipt hi veo nou Hebrew maipfüye sa-a nah napeiyu Shiphrah ae Puah hisü paoe,

¹⁶“Nehai nou Hebrew maipfüye sa-a napeiyu phaki, poutumai nalouzü nabuh hinou puhye southawo, ana naotumai nalouzü puhye sü southamoa veie.”

¹⁷Ana nah sa-a napeiyu naotupai ahai sünou Ramai ye ngaopiyu mai-e, südonou Ejipt hi veo nou puhai hi kharochi peiyu nasü soumoa panou nahpoutu khesü hriloure.

¹⁸Südonou Ejipt hi veo nou puhaiye sü kuloua paoe, “Daisounou ne hai haibüa souwe, alia nahpoutu khesü panou hrilouwe?”

¹⁹Nah maiye sa-a napeiyu ahai sünou veo hisü paoe, “Daiolouzü Hebrew maipfü hai Ejipt maipfü bümoe, puletao hai pfüchi veishoe, südonou sa-a napeiyu mai vemo jünou puletao hai lah naloua baiwe.”

²⁰Südonou Ramai nou nah maiye sa-a napeiyu pfüpai ahaiye sü shiha peie, alia mai khemai hai hrükasho paloua khouko dusho khere.

²¹Sa-a napeiyu pfüpai ahai hai Ramai pia hrüyu donou Ramai nou puhaiye tounah peie.

²²Süthaisü Pharoah veo nou puhvei mai hrülai hisü haibüa kharochi peie, “Hebrew mai kihikha nou nakouyu nahpoutu mai hrülai sü Nail rei hi laithouwo, ana naotu maiye panou hriwo.”