Read Poumei Naga TAPALOUYU 10 Bible Online

TAPALOUYU 10 - Poumei Naga bible

TAPALOUYU 10

¹Süthaisü MAPAO nou Moses hi paoe, “Taho Pharaoh veoye sü daokhaio, daiolouzü Enou khupayu vah khesü soungao peire donou puh ae puhvei peikho maitao le sü soukhoupu peiwure,

²alia neletaoye panou neletao vei nahmai ae tyaomaitao hi Enou kabüa khupayu vah khesü Ejipt mai hi soupeie touyu paopei loure donoue, ae neletao mai hrülaiye panou E hai Ramai MAPAO nasüe touyu panou süloure donoue.”

³Südonou Moses ae Aaron nou veo Pharaoh hi tave paoe, “Hebrew maivei Ramai MAPAO nou haibüa paoe, ‘Ne teile kashoa akhe louba-a nou bulai hige? Avei maitaoye panou taho Eye tho tawo.

⁴Avei maitaoye panou taba louzü, dosho zhukhaio, Enou nevei teidei hisü khazü seive peilai,

⁵alia sükhe panou dei buyu teitei hisü raoloulai, sübüa dei sü panou zhingao laimoe; ae reithou nou kou deirai shokhai touyu süünghou khesü panou toukhai touloulai, ae dei hi buyu süübe teitei sü toukhai loulai.

⁶Khazü khesü ne ki hi, nevei peikho maitao ae Ejipt mai hrülai ki hisü lou phouloulai. Haibüyu sü ne puo ae ne paipaoh maiphao hinou zhou koute ngaokhai laimo hie.’ ” Süthaisü Moses nou kushuloua veo hinou tare.

⁷Veo khenou buyu peikho maitao nou veo hisü paoe, “Mai haina nou Etaoye teile kashoa souvea laige? Israel maitaoye lah puletao MAPAO ye sü panou taho tho tawo. Ejipt teidei hai halaire touyu sü ne sümo hivu?”

⁸Südonou Moses ae Aaron ye sü veo nou puh hi kudakhai veloua puhai hi paoe, “Taho neletao Ramai MAPAO ye tho tawo, ana thaothao mainou talai?”

⁹Moses nou chila peie, “Etao mai hrülai - naotu poutu, taidu, ae kikhaorü noupu koa talai, daiolouzü Etao nou taho MAPAO ye tho-a khonüh nülai.”

¹⁰Veo nou puhai hi paoe, “Enou MAPAO zhih hinou chaachou souwe, süolouzü neletaoye panou naotumai ae nah maitaoye satakhai laimoe. Daiolouzü neletao nou tsü ashi cho-a baie.

¹¹Mai hrülaiye panou hasou kilia takhai toulai moe, neletao nou jüpayu thaifüa poutu maitao louzü taho neletao MAPAO ye tho tawo.” Haibüa nou paowua Moses ae Aaron ye sü veo nghoujü nou hutawure.

¹²Süthaisü MAPAO nou Moses hi paoe, “Khazü khesü panou vere donou ne bah thaipa Ejipt teidei hi lapei khaio. Sütaoye sü panou tave Ejipt teidei hinou buyu vupou ae reithou nou kou deirai chemoa khaitouyu vudai poudai khesü panou touloulai.”

¹³Südonou Moses nou puhvei süüpo nasü Ejipt teidei pei hi polashu peie, süthaisü MAPAO nou süzhou heamajü ae kheimathe teinghi palova nou teikhai sü panou hüvere; teithe payu phaki teinghi palova teikhai nou khazü khesü hüpoa vere.

¹⁴Khazü khesü Ejipt teidei teitei hi ve phoutao loure. Haibüa nou me duyu khazü hai raichoki ve khaitoumo hie, alia haithai-a vekhai toulai moe.

¹⁵Khazü khesü ve dei teitei phouchü touloure, sübüa dei sü teiva loure. Puletao nou teidei sühi buyu vupou ae süübe hi rashithou taoyu teitei; reithou nou deirai moa shokhai touyu veishi sü toukhai touloure. Ejipt teidei hi süübe, ae vupou daiyu teitei sü aliro shopei moa toukhai loure.

¹⁶Süthaisü veo nou thashoa Moses ae Aaron ye kuloua paoe, “Enou neletao Ramai MAPAO ae nehai nghoujü nou mah souwure.

¹⁷Südonou avei mah sü khaipeio, ae neletao Ramai MAPAO panou haibüa Etaoye souvea shoyu haina sü polai peire donou veachi paopeio.”

¹⁸Moses nou veo hinou tare, alia MAPAO hi veachi paopeie.

¹⁹MAPAO nou teinghi palova vei teikhai nasü teinghi loulova teikhai soudathou peia panou khazü khesü Zai Ho hisü hüthou khai peiwure, ae khazü ali koute-a panou Ejipt teidei hisü bumore.

²⁰Ana MAPAO nou veo le sü soukhoupu peiwure, ae puhnou Israel maiye sü panou tabare.

²¹Süthaisü MAPAO nou Moses hi paoe, “Teizhi panou Ejipt teidei teitei holoure donou ne bah sü raki hi lakhe peikhaio.”

²²Südonou Moses nou puh bah sü raki hi lakhe peikhaie, Ejipt teidei teitei hisü teithe asü maiteih toure.

²³Ejipt mai hai mai alinou aliye zhingao more, alia mai ali koute-a lah ki hinou teithe asü hai kijü tapa more; ana Israel mai louzü puletao nou buyu buh hisü ava ngao-a baie.

²⁴Süthaisü veo nou Moses ye kuloua paoe, “Neletao mai hrülai - naotu poutu ae nahmai hrülai nou taho MAPAO ye sü tho tawo, ana neletao vei nghitu, zhaotu ae kikhaorü louzü panou hupoa talai moe.”

²⁵Moses nou chila peie, “Sütoulouzü Etaoye panou poa Etao Ramai MAPAO ye mei deia tho loure ae posheela loure hrikhaona khesü nenou phoupeio.

²⁶Etao kikhaorü-a Etaoye koa satalai, hrikhaona ali koutero shokhai-a talai moe, daiolouzü Etao Ramai MAPAO ye poa thore donou sütao sü satamo louzü shie. Buh sühi vete loumo koute kabüyu hrikhaona nou poa MAPAO ye tholai touyu sü sümo hie.”

²⁷Ana MAPAO nou veo Pharaoh le sü soukhoupu peiwure, ae puhnou puletaoye sü panou tabare.

²⁸Veo nou Moses hi paoe, “Ne ahinou tawo, Eye panou ne zhu sü ngaopu khaiso, Enou ne zhu ngaopuyu teithe hinou neye sü southa bailai.”

²⁹Moses nou paoe, “Nenou paoyu büa E-a ne zhu sü ngaopulai more.”