Read Poumei Naga TAPALOUYU 11 Bible Online

TAPALOUYU 11 - Poumei Naga bible

TAPALOUYU 11

¹Süthaisü MAPAO nou Moses hi paoe, “Enou Pharaoh veo alia puhvei maitao pei hi veashoyu tudee ali seive peilai. Süthai nou puhnou neletaoye panou talai. Puhnou neletaoye panou tayu phaki, puhnou neletao mai hrülaiye hulaikhai bailai.

²Südonou chuo Israel mai hrülai hi puletao kinapa mai hinou shahu ae sana nou soukhai touyu zhusana khesü kholo tea paosü peio.”

³MAPAO nou Israel maiye panou Ejipt maivei nghingao hinou tsükhouyu soupeiwure. Süpei hinou Moses ye Ejipt teidei hinou peikho maitao ae maikhe mainou khuhao shoyu ae dushoyu mai ali-e tea panou poloure.

⁴Moses nou paoe, “MAPAO nou haibüa paoe, ‘Khei toutsü hinou Enou Ejipt teidei sü tasühao velai.

⁵Ejipt teidei hi nah narai mai hrülai sü southakhai peilai, veo nah naraio hinou poa touha shoyu qila pfüpai hi koute nah naraio thailai. Kikhaorüa tourai nasü thailai.

⁶Ejipt teidei teitei hisü raichoki pakhai toumoyu ae haithaikia palai moyu kradu sü puletao nou kralai.

⁷Ana Israel mai hiolouzü moyuma puletao vei kikhaorü hiolouzü sei koutea daolai moe. Süthaisü MAPAO Enou Ejipt mai ae Israel maiye soukukhai touyu sü neletao nou ngaolai.’”

⁸Moses nou akhai soua haibüa paopue, “Ne khe hinou buyu peikho maitao hrülai nou ahi tave Eye khurüa nevei maitaoye sü buh hai hinou sata peio tea paolai. Süthai sünou Enou amaitaoye sa-a talai.” Süthaisü Moses nou rarou shoa veoye thaowua tare.

⁹MAPAO nou Moses hi paoe, “Enou khupayu vah Ejipt teidei hi soupure donou veo nou nevei chi keipei bawe.”

¹⁰Moses ae Aaron nou khupayu vah veishi hai veo nghoujü hi soungao peie, ana MAPAO nou veo Pharaoh le sü soukhousho peiwua puhnou Israel maiye panou puhvei teidei hinou tabare.