Read Poumei Naga TAPALOUYU 18 Bible Online

TAPALOUYU 18 - Poumei Naga bible

TAPALOUYU 18

¹MAPAO nou Israel maiye kabüa Ejipt hinou sapapeie, ae Ramai nou Moses alia Israel maiye donou vah soupeiyu teitei sü Moses paoh, Midia hi napao Jethro nou chouloure.

²Südonou Moses nou thaowua tayu puh chapfü Zipporah ye sü puh paoh Jethro nou saloure,

³alia honapai nahpoutu ahai noupu Moses hi save peie. Nahpoutu ali zhih nou Gershom touwe, (daiolouzü puhnou paoe, “Enou vakou maivei teidei hinou shetumai ali soue”),

⁴alia kukhena zhih sünou Eliezer tea sapeie, (daiolouzü puhnou paoe, “Apuo Ramai nou Eye soukha peie, alia Eye Pharaoh bah hinou vupa peie.”)

⁵Moses paoh Jethro nou Moses chapfü ae nahpoutu ahaiye sa-a puhnou radeiki hinou fühao soua buyu Ramai vei deichi hisü ve-e.

⁶Puhnou mai ali seiho Moses hi paoe, “Ne paoh Jethro, Enou nevei chapfü ae nahpoutu ahai sü salaire.”

⁷Moses nou puh paoh ye sü daolai tea tapare, ae puhnou takou puh paoh ye sü nakou khurüe alia mü mupeie. Puhai nou aliliye vei-a buho moe tea chakuloue, süthaisü Moses nou puhvei sahpao hisü sa-a louloure.

⁸Moses nou puh paoh hi MAPAO nou Israel maiye donou Pharaoh veo hi ae Ejipt mai hi soupeiyu vah teitei, puletao nou lududo hi ta-a buki MAPAO nou puletaoye kabüa khailupa peie touyu khesü paongao peie.

⁹Jethro nou Israel mai hi MAPAO nou vah aveih soupeiyu teitei ae puhnou Israel maiye Ejipt mai bah hinou khailupa peiyu vanou asa shore.

¹⁰Jethro nou paoe, “MAPAO ye paosholo, neletaoye Ejipt mai vei qila soua buyu hinou ae Pharaoh veo bah hinou khailupa apeio, MAPAO ye sü paosholo.

¹¹Chuo Enou MAPAO hai ramai kukhe hrülai jünou dupu hie touyu süloure, daiolouzü Puhnou Israel maiye Ejipt mainou souvea buyu hinou khailupa peiwure.”

¹²Süthaisü Moses paoh Jethro nou Ramai hi mei dei-a posheela peie, ae Aaron nou Israel maiye süthai-apei mai hrülaiye saloua Ramai nghoujü nou puhye koa tovai vaizhoe.

¹³Thainesho shona sü Moses nou maikhe maivei chi sü kua bue, ae maikhe mainou puh pe hinou shona nou poa koukhe koute la-a bue.

¹⁴Moses paoh Jethro nou haibüa Moses nou maikhe maiye donou zhoha-a vah souyu sü ngaoloua puhnou Moses hi paoe, “Ne nou haibüa zhoha-a maikhe maiye donou vah souyu haisü daitouwe? Ne lah likhei bukhai, ae maikhe maiye panou ne pe hinou shona nou poa koukhe koute la-a buyu sü dai vanoue?”

¹⁵Moses nou chila peie, “Maikhe mainou ahisü tave Ramai vei leli sü daitouwe tea noue.

¹⁶Alia maikhe mainou züveiyu phaki, puletao nou ahi vewe, ae Enou mahzü sü kupeiwe alia Ramai vei chikha khesü puletao hi paopeiwe.”

¹⁷Süthaisü puh paoh Jethro nou puh hi paoe, “Nenou soua buyu vah haisü kaomoe.

¹⁸Haibüa nenou vah soukou louzü, ne lah vea-a baie alia maikhe mai-a choro-a bailai, daiolouzü vah haitao hai ne lah soua bailouzü neye donou kou süle-e.

¹⁹Enou neye vah kabüa soulai touyu sü paodou peilai, ae Ramai panou neye salai peilo! Nenou kamai-a dopaloua maikhe mai thaosou Ramai nghoujü seiveyu sü mahmoe, ae puletao nou soupfüyu vahtao sü nenou Ramai hi povelo,

²⁰ae nenou puletao hi Ramai vei chikha khesü haibüa hrülai, talai ae soulai touyu sü doupeio.

²¹Maisou hrohinou soulousü mai, Ramai ye piyu mai, louchelou veiyu mai, ae seihla toulai moyu maiye dopaloua panou mai theli, kaih, raingou, ae kirou pei hi khoyu mai tea khailo.

²²Puletaoye panou maikhe maivei chiku-apei mai soua bulo. Tateiyu vah khesü puletaoye panou ne hi pove-o, ana talayu vah khesü puletaoye panou lah soulo, sübüa soulouzü neye donou vah thapua baie ae nevei koupo nasü koa puletao nou pfükha peilai.

²³Nenou haibüa soulouzü, ae Ramai nou sübüa kharochi peilouzü, nenou veamoa vah khesü soulou süe, ae maikhe mai-a puletao rukhayu sü ngaoloua ki hi dakhai velou süe.”

²⁴Südonou Moses nou puh paoh Jethro nou paodou peiyu büa souloue.

²⁵Puhnou Israel mai hrohinou soulousü maiye dopaloua puletaoye panou mai theli, kaihli, raingou ae kirou pei hi khoyu mai tea khailoure.

²⁶Puletao nou maikhe maivei chilou sü kupeie, chi tateiyu khesü puletao nou Moses hi povewe, ana chi talayu khesü lah puletao nou kuloua baire.

²⁷Süthaisü Moses nou puh paoh Jethroye sü sa-a paota peiwure, ae Jethro nou lah puh ki hi dakhai tare.