Read Poumei Naga TAPALOUYU 23 Bible Online

TAPALOUYU 23 - Poumei Naga bible

TAPALOUYU 23

¹“Dayu chi hai mai hi paolapoa taso, alia mahyu mai ali donou da shaki peiso.

²Vah ashi soure hio acheche moyu mainou poua buyuma puletao thaisü füso, moyuma puletao phaobo loua zü nasü souda laire donou shaki souso.

³Mokhaiyuma chikuyu phaki touhayu mai aliye souku peiso.

⁴“Ngaobayu mai ali vei choha moyuma rheisüh hai vakou tupa-a ngaolouzü, süsü puh hi hudakhai vepeio.

⁵Neye ngaoraiyu mai ali vei kikhaorü hai kaozhoushi-a buyu nenou ngaolouzü, süsü sübüa thao-a talai moe, nenou sünasü panou lado souloure donou soukha peilai.

⁶“Neletao nou chikuyu phaki, touha sohayu mai aliye kaozü moyu hinou chiku peiwuso.

⁷Mah hayu mai ae acheche mai ali hi da-a mah dukakhai peiwua southaso, daiolouzü sübüa ashi vah souyu mai hrülaiye sü Enou thaopei khai toulai moe.

⁸Seihla touso, daiolouzü seihla haina nou vah souyu mai nghithou soucha pei-a baiwe, alia acheche mai navei zü sü poreilai pei-a baiwe.

⁹“Shetumai aliye souvea laimoe, shetumai ali hai kabüa hrüwe touyu neletao-a süwe, daiolouzü phateile ali hi neletao-a Ejipt hinou shetumai ali soua hrüe.

¹⁰“Po arou koute neletao nou shinamara thoutai daothoua chachi toulai.

¹¹Ana po anai kousü neletao vei teidei khesü panou solai, alia sühinou payu shinamara khesü neletao nou toulai moe. Sütao hinou payu shinamara khesü panou touha sohayu maiye donou khaipeio. Haisü neletao vei kipei hinou buyu rashibetao-a loulai.

¹²“Teithe arou koute neletao nou vah soulo, ana teithe anai zhousü neletao nou solai, sübüa nevei qila maitao ae nevei kuvah souyu mai alia kikhaorütao-a panou soyu ngaoloulai.

¹³“Ramai MAPAO, Enou, neletao hi paopeikhai touyu teitei sü soutaosou zülo. Rah kukheye thokhai touso, alia puletao zhih sü neletao mü hinou pa sapa khaitouso.

¹⁴“Eye tsükhouyu zhai hinou potei ali hi vu asü nüh nülai.

¹⁵Enou neletao hi kharochi peikhai touyu büa neletao nou Ejipt teidei thaowua tapayu Abib khouh hisü khei thoumoyu Raokhao Nüh nülai. Khouh haina hi teithe anai neletao nou khei thoumoyu raokhao toua bailai. Mai tarali noua bah sakhai-a tave Eye tholai moe.

¹⁶“Neletao nou taimou thou khaitouyu khesü chachi tare toulouzü, Chachiyu Nüh nülai. “Potei akhai hi kou neletao nou thoukhai touyu shinamara ae thoudzü khesü pojü cheloure toulouzü, Ratho kipao Nüh nülai.

¹⁷Po patsü nühdu asü haitao hi neletao mai hrülai nou tave Ramai MAPAO Eye tholai.

¹⁸“Neletao nou Eye hrikhaona pove posheelayu phaki, khei thoukhai touyu raokhao koa posheelaso. Eye posheela khaitouyu southa khesü thainesho shona koute panou bukouso.

¹⁹“Potei hi neletao nou ngaolou arai khana sü neletao Ramai MAPAO ki hi pove peio. “Neletao nou zhaotu moa nghitu toutu aliye ke vei naodzü koa khotou laimoe.

²⁰“Enou neletaoye donou tudakhai touyu füdei hisü panou kaozhou vei-a vete loure donou neletao jünou rai-a rakivamai ali seita peilai.

²¹Puhnou paoyu chi zütou toulo. Neletao nou puh chi züba-a puhye dure toulouzü, neletao nou soumah khaitouyu khesü puhnou ali-a khaipeikhai toulai moe, daiolouzü puhye sü Enou seita-a baie.

²²Ana neletao nou puh chi zülouzü alia Enou neletao hi kharochi peikhai touyu teitei souloure toulouzü, neletao ngaoba maitaoye sü Enou dupeilai.

²³Avei rakivamai nanou neletao jünou rai-a neletaoye sü Amor mai, Hit mai, Periz mai, Kanaan mai, Hiv mai, ae Jebus mai teidei hisü sa-a ve peilai, alia Enou puletaoye sü souha peilai.

²⁴Neletao hai puletao nou tho-a buyu ramai khesü tholai moe, alia puletao nou ta-a buyu zhai khesü talai moe. Puletao nou tho-a buyu rah khesü souhawo alia puletao nou sheeyu buh-e tea chuh shukhai touyu khesü daphe laiwuo.

²⁵Neletao Ramai MAPAO Eye neletao nou tho louzü, Enou neletaoye sü thoudzü veishoa ha peilai, alia neletao hinou sounou khesü polai peilai.

²⁶Neletao teidei hisü naotumai ye panou nah kouyu soulai moe alia nahapfüa panou bulai moe. Enou neletaoye sü hrüsoyu hai-a peilai.

²⁷“Enou neletaoye dure maitao hisü Eye ngaopiyu tsüle southou peilai; neletaoye reih soure mai hisü bürouyu soupeilai, alia neletaoye ngaobayu maitaoye sü panou neletao nghoujü nou tutawulai.

²⁸Enou neletao jünou rai-a neletao ngaobayu maitao hisü rahtayu seive peilai, sübüa panou Hiv mai, Kanaan mai ae Hit maiye sü hulai peiwulai.

²⁹Enou puletaoye sü po ali levai hinou hulai laimoe, daiolouzü Enou sübüa hulaiwu louzü, teidei sühisü mai hrümoa soukhaona nou ve hrüphouloua bailai, sütou louzü neletaoye donou vea-a bailai.

³⁰Neletao mai poupaloua teidei süna hrüphou loumo koute Enou puletaoye sü mai chichi nou hutapeia bailai.

³¹Enou neletao vei deirai sü Zai Ho hinou poa Euphratis rei koute ae Mediteranean zai hinou poa radeiki koute peilai. Teidei sütao hi hrüyu maikhe maitao hai neletao bah hi thoupeilai, alia neletao nou puletaoye sü hulai loulai.

³²Neletao nou puletaoye koa moyuma puletao vei rah kheye koa vo soulai moe.

³³Puletaoye panou neletao vei teidei hisü hrüso; puletaoye koa neletao teidei hi hrüzho louzü, puletao nou neletaoye soumah peia bailai. Neletao nou puletao vei rahye thota louzü, neletao hai shorüh hi louyu bütoua bailai.”