Read Poumei Naga TAPALOUYU 25 Bible Online

TAPALOUYU 25 - Poumei Naga bible

TAPALOUYU 25

¹MAPAO nou Moses hi paoe,

²“Israel maitao hi Eye posheelawo tea paopeio. Mai tarali noua Eye peinüyu posheela na khesü polo.

³Nenou puletao hinou pore posheela natao sü haitaoe: Sana, shahu, ae baosahu;

⁴daiyu, zainünayu alia zaiteiyu pha, ae deizüzüyu sah, nghitu mai,

⁵zhaotu hee nou soukhai touyu natao, souhee nou souyu natao, akasia süü,

⁶mei taore theadzü, vasou hi naare theadzü, kainüvei poutao;

⁷Napao maivei naazao vahi ae khaokha vahi zhai southoure donou paivavayu onyz chuh ae chuh mutei tya nou souyu ephod polo.

⁸Maikhe maiye panou sheeyu rathoki ali Eye panou buloure donou soupeio.

⁹Rathoki nasü haibüa soulai, ae kikha hi haibüa zhai southoulo touyu khesü Enou paopeiyu thaifüa neletao nou soulo.

¹⁰“Akasia süü nou sentimitar 110 shoyu, sentimitar 66 jha duyu, ae sentimitar 66 kuyu sübvü ali soulo.

¹¹Veikhayu sana nou sübvü navei phaovai-a ae levai-a soukhalo alia pehao teitei sü sana nou southoulo.

¹²Süüpo thaithou sübvü sünaye kaopore donou sana nou haorü touyu adai souloua phi adai vasü khikhailo.

¹³Akasia süü nou sübvü nasü kaopoa tare donou süüpo soulo, alia süna vasü sana nou neahaolo,

¹⁴alia süüpo süna ahai sü sübvü holo hailo thaithouloua kaopoa tare donou soulo.

¹⁵Süüpo süna ahai sü sübvü hi sana nou haorüa souloua dakhakhai touyu hisü thaithou khai-a bailai, süsü paizhou pakhai toulai moe.

¹⁶Chuh ahai hinou chikhatao rükhailoua Enou neletao hi peilaiyu nasü sübvü sühi thoukhailo.

¹⁷“Süthaisü zhuvea-apei buh ali sana veitya nou soulo; süsü sah shoyu nou sentimitar 110, sentimitar 66 jha duyu, alia sentimitar 66 kua nou soulo.

¹⁸Sana nou shouh pfüyu khaona ahai chuhda nou poa dalo;

¹⁹ae sünasü zhuvea-apei buh hisü holo ali ae hailo ali tea khailai.

²⁰Shouh pfüyu khaona ahai sünou zhuvea-apei buh hilova reilai ae puhai shouh sünou zhuvea-apei buh nasü kou holai.

²¹Zhuvea-apei buh nasü sübvü peiva khailai, alia sübvü sühisü Enou peilaiyu chikhatao sü thoulai.

²²Buh sühinou Enou neletaoye ve daolai, alia vo sübvü pei hinou khaitouyu zhuvea-apei buh hinou shouh pfüyu khaona ahai vei kohinou Israel maiye kharochi khesü peilai.

²³“Akasia süünou raokhao khaire buh (table) ali sah shoyu sentimitar 88, sentimitar 44 jha duyu ae sentimitar 66 kua nou soulo.

²⁴Sünasü sana aveih tyanou phao hi khulo, alia pehao teitei hisü sana nou soukhalo.

²⁵Ae sünavei pehao hi thoukhare donou milimitar 75 dua soulo, ae sana nou sünasü zühaolo.

²⁶Süna kaopoa tare donou sana nou haorü touyu adai souloua phi buyu kainghou adai hi khikhailo.

²⁷Khaibuh sünaye kaopoa tare süü thaithoure donou haorüa soukhai touyu nasü pehao hi thou dahaokhai touyu süü nahisü nghia veakhalo.

²⁸Kaopoa tare süüpo nasü akasia süü nou soulo alia sünasü sana nou meahaolo.

²⁹Alia posheelare donou pai, khao, lee ae hana thoukhaiyu bvü khesü veishoyu sana nou soulo.

³⁰Khaibuh sünasü Vo Sübvü pehao hi khailai, ae sünaphao hisü Eye donou sheeyu raokhao posheela khaitouyu sü bukou telai.

³¹“Meivabvü khaibuh ali sana veityanou soulo. Sünavei khaibu ae bahtao khesü hubao nou poa dathoulo; ae poupa büyu pai, süübo lapayu ae poupa papayu zhai büa soutou thoulo, alia sütao teitei panou ali soua bulo.

³²Meivabvü khaibuh hisü nou baokao arou panou palo, holova baokao asü ae hailova baokao asü.

³³Baokao alili hinou hüveishoa poupa payu zhai büa poupa asü-asü bulai, ae sütao sü kurushipa papayu büa süübotao ae süünghou noupu koa panou palo.

³⁴Meivabvü khaibuh bahtao nahisü kurushipa büyu poupa papa-a ae süübo noupu loua poupa cha tya adai daothoulo.

³⁵Baokao ahai hai pa-a payu asütao phi hisü nou poupa mübo payu alili bulai.

³⁶Poupa mübo payutao, baokaotao, ae meivabvü khaibuh teitei sü sana veitya nou alikhei soua soupa khailo.

³⁷Meivabvü khaibuh hisü meivabvü anai southou khailo, sübüa panou pahlo meiva koulo.

³⁸Meivabvü souheiyuna ae thoukhaiyu bvü/khao sü sana veitya nou soulo.

³⁹Meivabvü khaibuh ae sühi natao soure donou sana sühcho 35 nou poa soulai.

⁴⁰Sütao hai Enou ne hi deichi vanou ngaopeiyu thaifüa soutaosou soutou toulo.