Read Poumei Naga TAPALOUYU 28 Bible Online

TAPALOUYU 28 - Poumei Naga bible

TAPALOUYU 28

¹“Ne jürai Aaron ae puhvei nahpoutu Nadab, Abihu, Eleazar alia Ithamar puletaoye ne hi kupoa koulo ae puletaoye panou avei napao maitao soure donou Israel mai hinou pokupalo.

²Ne jürai Aaron ye ngaokhusüyu ae hüveiyu napao maivei sabanü soupeio.

³Enou shara souyu hie dokai aveih thoupei khaitoua buyu maitaoye kuveloua puletaoye panou Aaron vei sabanü soupeio tea paopeio, sübüa puhye panou avei napao soure donou peithouwuo.

⁴Puletao nou soure sabanü sü haitaoe: Khaokha ali, nahra büa phao hinou khare ephod ali, naazao aso ali, cha daokhai touyu zao ali, peizüyu sah ali, ae khyakho ali tea soulai. Puletao nou napao maivei sabanü haitao avah soulaiyu ne jürai Aaron alia puhvei nahmaitao donou soulai.

⁵Shara soulou süyu puletao nou daiyu, maomüyu ae zaiteiyu pha; züzüyu sah aveih tya alia sana nou poa soulai.

⁶“Puletao nou ephod nasü daiyu, maomüyu ae zaiteiyu pha; züzüyu sah alia sana nou poa zhai soutou thoulai ae cha daothoua soulai.

⁷Phao hi hokoure sah ahai sü kainghou ahai hinou kou khipa loure donou soulo.

⁸Khyakho nasüa sana; daiyu, maomüyu ae zaiteiyu pha alia züzüyu sah nou souloua ephod nahisü khipalo.

⁹Onyz chuh ahai poloua Israel nahmaitao zhih sü sühi rüthoulo.

¹⁰Nahmaitao zhih sü tsükhana hinou poa shosho shoshonou rüthou koulo, chuh ali vanou mai zhih arou rüthoulo, alia chuh kukhe na vahia mai zhih arou rüthoulo.

¹¹Chuh daoyu mainou sühi cha daothouyu büa chuh ahai va hisü Israel nahmaitao kiahai zhih sü daothoulo, alia sana nou chuh pei hisü souka khailo.

¹²Israel mai khü kiahai taoye panou licho loure donou chuh süna ahai sü phao daoyu ephod vahisü soupa khailo, alia Aaron nou puletao zhih sü teisa panou licho loure donou pfülai koutelai, sübüa Enou avei maitaoye sü teisa tsüloulai.

¹³Ae sana nou zhai veishoa rai büyu zhusa ahai soulo,

¹⁴alia sana nou tou ahai souloua süna ahai sü zhusana koa soupalo.

¹⁵“Napao Peicha naye panou poa Ramai vei leli süloure donou khaokha ali soulo. Haina hai-a ephod souyu natao bütoua daiyu, maomüyu ae zaiteiyu pha, züzüyu sah alia sana nou zhai veishoa daothouloua soulai.

¹⁶Haina hai sah-jha-a deitou toulai alia ahai soua khikhailo, sah shoyu nou sentimitar 22 solai, ae jha duyua sentimitar 22 dulai.

¹⁷Haina hisü chuh mutei tyanou she adai soua thoulo. She araina hisü ruby, topaz ae garnet;

¹⁸she ahai chena hisü emerald, saphir ae diamond;

¹⁹she asü chena nou jacinth, agate, ae amethyst;

²⁰she adai chena hisü beryl, onyx, ae jasper noulai. Haitao hai sana nou koa soukhailai.

²¹Chuh sütao kiahai vahisü Jakob nahpoutu mai alili zhih sü rüthou khailai, sübüa chuh sütao panou Israel mai khü kiahai bue touyu süloulai.

²²Nenou khaokha nasü sana veitya nou rai büa louloua soulo.

²³Ae sana nou lürü touyu ahai souloua khaokha nahisü pokou khikhailo,

²⁴alia sana nou rai büa loukhai touyu nasü poloua sana nou haorüa soukhai touyu khaokha hisü khipalo.

²⁵Raipo ahai sü poloua kainghou hi khiloua pokou ephod pah hi khipalo.

²⁶Süthaisü sana nou lürü touyu ahai souloua khaokhayu khelova ephod nghia levai hinou thoukhi khailo.

²⁷Sana nou souyu lürüa kukhe ahai-a soupuloua phao hinou kakouyu sah ahai ephod vei pah hi ae khyakho reilo bü hinou khikhailo.

²⁸Khaokha hi thouyu lürü nasü ephod hi lürüyu naye koa daiyu pha ali nou phupalo, sübüa khyakho pei hinou buyu khaokha nasü panou lümoa buloure donou.

²⁹“Aaron nou Sheeyu Buh hi talouyu phaki, puhnou Israel nahmaitao zhih rüthou khaitouyu khaokha nasü pfülai, sütoulouzü MAPAO Enou teisa avei maitaoye licho loulai.

³⁰Khaokha vahisü Ramai vei leli süloure donou Urim ae Thummim hai-a thoulo, ae Aaron nou MAPAO nghoujü talouyu phaki, puhnou khaokha hai nasü pfülai, sübüa Aaron nou Israel maiye donou haibülai touyu khesü paopeilai.

³¹“Ephod khevai nou noure naazao nasü maomüyu soumaipha likhei nou soua bailai.

³²Naazao nasü pei thoure donou sah toutsü hinou mü souchalo, ae mü sühisü panou patamore donou daleichü tea khailo.

³³Phi zhukouyu naazao kainghou hisü daiyu, maomüyu ae homarayu pha nou radoushi zhai büa cha kuthoulo ae süko kohisü sana nou hudabvü souloua khithoulo.

³⁴Sana nou soukhai touyu hudabvü na ae radoushi zhai büa soukhai touyu nasü reirei-a naazao kainghou hi khithoulo.

³⁵Aaron nou napao vei vah souyu phaki naazao sünasü noulai. Puhnou naazao süna noupoa Enou buyu Sheeyu Buh hi talouyu phaki, moyuma dakhai tayu phaki, hudayu kho sü choulai, sükulouzü puhye southa laimoe.

³⁶“Sana veitya nou poupa zhai büa ali soulo, ae sühisü ‘MAPAO hi peithouwure’ tea larücha daothoulo.

³⁷Sünasü peiphuyu sah hi daiyu raipo ali nou phupalo.

³⁸Aaron nou hainasü puh pei hi phupfülai, sükulouzü Israel mainou posheela peiyu veishi sü Enou popeilai, hakinou maikhe mainou posheela pei mah-a buyuma sükhesü puh pei hi ve-a bailai.

³⁹“Aaron vei naazao ae peiphurai nasü züzüyu sah veitya nou daolo alia khyakho nasü bah nou zhai veitoua cha kuthoulo.

⁴⁰“Aaron nahpoutu maitao vei naazao, khyakho ae peirü khesü panou khusüh shore donou ae ngavei shore donou nenou soupeio.

⁴¹Na haitao hai nenou ne jürai Aaron ae puh nahpoutu maitaoye thoupeilai. Süthaisü puletaoye oliv theadzü nou nealoua panou napao mai ali soua avah soure donou sousheeloua peithou peio.

⁴²Ae nenou puletao vasou panou zhingao more donou khevai nouyu zao sü khya hinou khoubou koute holou süyu soupeio.

⁴³Aaron ae puh nahpoutu maitao nou Rathokipao hi talouyu phaki moyuma Sheeyu Buh hi ve vah souyu phaki, sabanü sütao sü banoulai, sükumo louzü puletao hai thai-a bailai. Haibüyu zhai hainasü Aaron ae puhvei tyaosholea hrülai nou teisa tare zhai nasüe.