Read Poumei Naga TAPALOUYU 31 Bible Online

TAPALOUYU 31 - Poumei Naga bible

TAPALOUYU 31

¹MAPAO nou Moses hi paoe,

²“Enou Judah maikhü hinou Hur tyao, Uri nahpoutu Bezalelye doloure.

³Enou puh hisü avei khouko, soulou süyu tsüdo, hasü, tsüavei alia shara teitei soulou süyu dokai,

⁴shara tyatyali soulou süyu dokai, sana, shahu ae baosahu poa vah soulou süyu,

⁵muhtei chuh daolou süyu, süü poa vah soulou süyu, alia shara tyatyali soulou süyu tsüdo teitei sü puh hi Enou thoupeiwure.

⁶Süpeinou puhye koa vah soure donou Dan maikhü hinou Ahisamak nahpoutu Ohaliabye Enou dopa loue. Enou shamara souyu kukhe maitao hia tsüdo aveih ae soulou süyu dokai khesü thoupeiwure, sübüa puletaoye panou Enou soukhaio tea kharochi peikhai touyu teitei sü soulaie:

⁷Enou bure Ratho kipao, Vo Sübvü ae süpe hinou buyu zhuvea-apei buh, alia Ratho kipao hi loure natao teitei,

⁸taibel, paikhao/leekhao, sana nou souyu meivabvü ae süna khaibu, alia kainüvei mei deire posheelabu,

⁹mei dei-a posheelare posheelabu ae sühi poa vah soure natao, phibah khüre raikhao,

¹⁰Aaron ae puh nahpoutu maitao nou naanou souyu phaki banoure napao maivei sabanütao,

¹¹neare theadzü, ae Sheeyu Buh hi poa kainüvei pou mei deire na haitaoe. Enou kharochi peikhai touyu bütoua na haitao teitei sü puletao nou soulai.”

¹²MAPAO nou Moses hi paoe,

¹³“Israel mai hi haibüa paopeio: ‘Soteithe nasü neletao nou reihlai, daiolouzü teithe haizhou, E alia neletao ae haithai hrüvere bonakha hrülai kohisü shee ali soulai, sübüa E hai MAPAO nasüe alia neletaoye Enou soushee loua panou avei mai soure touyu sü süloulai.

¹⁴Neletao nou Soteithe nasü reihlai, daiolouzü hainasü neletaoye donou sheeyu teithe-e. Mai tarali noua teithe haizhou reihmoa souzhai louzü puhye sü southawulai.

¹⁵Teithe arou koute neletao lah vah soulo, ana teithe anai zhousü MAPAO vei sheeyu teithe-e, neletao-a soteithe soulo; mai taralia soteithe zhou vah souyu maiye sü souhawulai.

¹⁶Südonou Israel mainou Soteithe zhou hai reihlai, haithai vere bonakha hrülai-a teithe haizhou sü vo soukhai touyu thaifüa reihlai.

¹⁷Teithe haina hai E alia Israel mai kohi vo soukhai touyu vei shee ali soua bulai, daiolouzü MAPAO Enou teithe aroutao hinou raki ae deiphao souwe, alia teithe anai zhousü E-a vah soumoa so-e.’ ”

¹⁸Ramai nou Moses hi Sinai deichi hinou chi paopei cheyu thai, chuh ahai hinou Ramai nou rüpeikhai touyu chikha khesü puh hi peie.