Read Poumei Naga TAPALOUYU 32 Bible Online

TAPALOUYU 32 - Poumei Naga bible

TAPALOUYU 32

¹Moses nou deichi hinou koumoyu phashoyu koukhaie, Israel maisou nou tave jüloua Aaron hi paoe, “Etaoye Ejipt teidei hinou sapa peiyu Moses sü kabüa laidesa Etao sümore, südonou Etaoye sa-a tapeire ramai ali soupeio.”

²Aaron nou puletao hi paoe, “Neletao khapfü ae nahmaitao nou noua buyu sana noubo khesü phaloua ahi pove peio.”

³Südonou mai hrülai nou puletao sana noubo khesü phaloua Aaron hi pove peie.

⁴Puhnou sana noubo khesü poloure, alia sükhesü pothou meidei loua chode zhairai ali soupa loure. Süthaisü maikhe mainou paoe, “Oh Israel maitaore, ramai hai nanou Etaoye Ejipt teidei hinou sapa peiyu nasüre.”

⁵Süthaisü Aaron nou sana chode pa hinou posheelabu ali soushu loure alia maikhe mai hi paoe, “Dosho MAPAO ye tsükhou-a nüh nülai.”

⁶Thainesho shona sü puletao nou kikhaorü pove meidei-a posheela-e ae kaonayu posheela-a pove peie, alia maikhe maitao nou khonüh nüre donou kou buloure, alia touso zhiloua vah ashi tya-a soutare.

⁷MAPAO nou Moses hi paoe, “Thasho-a nou dakhai koutawo, daiolouzü nenou Ejipt teidei hinou sapakhai touyu nevei maitao sü mah soutare alia Eye malaiwure.

⁸Enou puletaoye haibüa talo tea kharochi peikhai touyu khesü tamore, puletao hai lah bah nou chode ali souloua sünaye sü tho-a posheela peia baire, alia haibüa paore, ‘Oh Israel maitaore, ramai hainanou Etaoye Ejipt teidei hinou sapapeie.’ ”

⁹MAPAO nou Moses hi paoe, “Enou mai haitaoye ngaora-e, puletao hai maikho mairo lia zübae.

¹⁰Chuo puletaoye souhawure donou avei lekha rarou sü phoukha loure, Eye nuwuso. Ana Enou neye louzü dushoyu tyahrü ali panou soulai.”

¹¹Ana Moses nou puhvei Ramai MAPAO hisü haibüa zhuvea peio tea nou khowe, “Oh MAPAOwo, daisounou khupasoua nevei khouko nou Ejipt teidei hinou sapapei khaitouyu nevei maitao pei hisü rarou showe?

¹²Daisounou Ejipt maiye panou haibüa paolai, ‘Puletaoye souhawure donou sata baie alia deiphao hinou souhawure donou sata baie.’ Nevei lekha rarou nasü khaipeia baio, ae nevei maitaoye souhawulai touyu nasü khaipeia baio.

¹³Nenou nevei kilai Abraham, Isaak ae Jakob hi haibüa chaachou soukhai touyu nasü licho peio, ‘Enou nevei tyaosholea khesü rakiva teivu zhoua panou tyakaa palai, ae Enou paokhai touyu teidei teitei sü nevei tyao sholeaye panou teisa vei soua hrülai.’ ”

¹⁴Süthaisü MAPAO nou puh vei maitaoye souhalai tea tsücho khaitouyu nasü le datare.

¹⁵Moses nou deichi vanou chikhatao rüthoukhai touyu chuh ahai sü poloua takou tare, chuh süna ahai hisü pavai-a ae thaivai-a chikha khesü rüthou khaitoue.

¹⁶Chuh süna ahai sü Ramai nou souyu chuh-e alia Ramai bah nou chikha khesü rüthou peie.

¹⁷Maikhe maitao nou shusoua rayu paisü Joshua nou süloukhaie, puhnou Moses hi paoe, “Fühao hisü Enou reihvo souyu pai chowe.”

¹⁸Ana Moses nou puh hi paoe, “Süsü reih veiloua sa-vo souyu pai moe, moa reih veiloumoa dongai pfüyu shi-a moe, ana maikhe mainou sava-a lou souyu pai baie.”

¹⁹Moses nou puletao vei fühao hi nghikouyu phaki, puhnou maikhe maitao nou asah soua buyu ae bah nou chode ali soukhai touyu ngaoloua rarou shore, ae puhnou polaiyu chuh nasü deichi phi hinou deiphi laikou deikhowure.

²⁰Puletao nou soukhai touyu sana chode nasü puhnou poloua meinou deithou nghizüzü loure alia sünasü puhnou dzü thouhrü loua panou puletaoye ke-e.

²¹Puhnou Aaron hi paoe, “Mai haitao nou ne hi dai vahli soupeia panou puletaoye haibüyu mah sü souge?”

²²Aaron nou Moses hi paoe, “Apaopuwo, ahi rarou peiso, ne-a süwe, süolouzü mai haitao hai vah ashi soulai tea tsütei touloua baire.

²³Puletao nou ahi haibüa paoe, ‘Etaoye sata peire donou ramai ali soupeio, daiolouzü Etaoye Ejipt teidei hinou sapa peiyu Moses sü daipha soutaresa Etao sümore.’

²⁴Südonou Enou puletao hisü paoe, ‘Maitaralia zhusana buyu maisü ahi pove peikhaio.’ Süthaisü puletao nou sana khesü ahi pove peie, ae Enou sana khesü mei hi thou deipei khaie chode hainasü paloure.”

²⁵Maikhe maitaoye Aaron nou tukhalou moa panou lahdodo soua hrüyu ae ngaobamai jünü soua buyu sü Moses nou ngaoloure.

²⁶Südonou Moses nou fühao vei robomü hinou laloua share, “Thaothao mainou MAPAO hilova bulaige, sümaitao hailova koulo!” Puh hisü Levi mai hrülai nou kou jüloure.

²⁷Süthaisü puhnou puletao hi paoe, “Israel maivei Ramai MAPAO nou haibüa kharochi peiwe, süolouzü neletao mai hrülai nou khoche pokhai touloua neletao thaihou jürai maitao, khamai samaitao ae kinapa maitaoye fühao vei robomü hai hinou poa robomü holova koute southa khaiwo.”

²⁸Levi nahpoutu maitao nou Moses nou kharochi peiyu büa souwe, ae süzhou teithe mai thesü phali thaire.

²⁹Süthaisü Moses nou puletao hi paoe, “Zhou teithe neletao nou lah neletaoye soushee loua MAPAO vei vah soure donou soukupa loure, daiolouzü neletao nou lah neletao nahmai, thaihou jürai maitaoye southawure. Südonou neletaoye sü zhou teithe MAPAO nou hapeiwure.”

³⁰Thainesho sü Moses nou maikhe mai hi paoe, “Neletao nou dushoyu mah sü souwure, ana Enou deichi hi taopa MAPAO ye daopu laihie, ae neletao mah sü panou khaipeire donou kholai.”

³¹Moses nou dakhaipa MAPAO hi paoe, “Maikhe mainou dushoyu mah sü souwure. Puletao nou lah sana nou ramai sü souloua tho tare.

³²Ana zhuvea puletao mah sü khaipeio; nenou puletao mah sü khaipei laimoe toulouzü, nevei larübvü hinou azhih rüthou khai touyu nasü popha laipeio.”

³³MAPAO nou puh hi chila peie, “Avei larübvü hisü mah souyu maitao zhih popha-a bailai.

³⁴Chuo ne tawo, nevei maitaoye sü Enou paokhai touyu buh hisü sa-a tawo. Avei rakivamai ali nou neletao jünou rai-a sa-a tapeilai, ana Enou puletao mah vanou puletaoye sü tudee laiyu teile vere.”

³⁵Süthaisü MAPAO nou maikhe mai hisü rahta seive peie, daiolouzü puletao nou Aaron ye panou sana chode souyu donou.