Read Poumei Naga TAPALOUYU 35 Bible Online

TAPALOUYU 35 - Poumei Naga bible

TAPALOUYU 35

¹Moses nou Israel mai hrülaiye kuve jüloua puletao hi paoe, “Haitao hai MAPAO nou neletaoye soulo tea kharochi peikhai toue:

²Teithe arou koute neletao hai vah soulai, ana teithe anai zhousü sheeyu teithe ali soua MAPAO zhih hinou soteithe soua reihlai. Mai taralia teithe hai zhou vah souyu maiye sü southalai.

³Soteithe zhou hai neletao nou buyu ki hia mei soulai moe.”

⁴Moses nou Israel mai hrülai hi paoe, “MAPAO nou haibüa kharochi peikhai toue:

⁵MAPAO ye posheelare natao sü pove peio. Mai taralia lah nou peinüyu na khesü: sana, shahu, baosahu;

⁶deizüzüyu sah; daiyu, zainünayu ae horayu pha; nghitu hee nou soukhai touyu sah;

⁷zhusa nou thoukhai toua horayu zhaotu hee; nghitu hee; akasia süü;

⁸mei taore theadzü; poa neare theadzü; ae kainüvei pou poa mei deire;

⁹onaiz chuh, ae mutei chuhtao poa Napao Peichana vei ephod ae khaokhayu sabanü soure donou na haitao sü pove posheela peio.

¹⁰“Neletao hrohinou shara souveiyu mai hrülai nou tave MAPAO nou souwo tea kharochi peikhai touyu teitei sü soulai:

¹¹Rathokipao, sünapei hi haore sahtao, pothou vaore hu ae sünavei kayu süütao, deka ae dekabeitao;

¹²Vo Sübvü ae sünaye kaopore süü, zhuvea apeibu alia sünaye hore haosah;

¹³taibel ae sünaye kaopore süütao alia sühi loure natao; Ramai ye posheelare raokhao;

¹⁴meivabvü khaire buh; meibvü ae sühi loure natao alia meidzü;

¹⁵kainüvei pou poa meideire posheelabu ae sünaye kaopore süütao; neare theadzü; mei deire pou kainüvei; Rathokipao vei kikhubomü hi haosah;

¹⁶meideia posheelabu ae sünahi baosahu nou kho soukhai touyu natao; kaopoa tare süütao, alia sühi loure paikhaotao; phibah khüre raikhao ae süna khaiyu buh;

¹⁷Chikuyu kide hi taloure kikhubomü haosah, dekatao ae dekabeitao, kikha taloure kikhu haosah;

¹⁸Rathokipao hi ae chikuyu kide hi na vaokhaire shuhtao alia raitao;

¹⁹alia Sheeyu Buh hi napao maitao nou banou poa vah soure sabanütao, Napao Aaron ae puh nahpoutu maitao vei sabanütao; na haitao puletaoye panou soulai.”

²⁰Süthaisü Israel mai hrülai nou Moses hinou taratare.

²¹Ramai vei vah soure donou peiyu deinou shie tea le deikhai touyu mai hrülai nou lah puletao nou peinüyu na khesü MAPAO hi pove sheela peie. Posheelana sütao sü poa MAPAO nou bure Rathokipao ae napao maitao vei sheeyu sabanü soulai.

²²Südonou naotu poutu, puletao mai hrülai nou lahkuku nou peinüyu na khesü: peih, noubo, bahtoukha, baosa, touh alia sana nou soukhai touyu zhusana tyatyali MAPAO hi pove sheela peie.

²³Alia deizüzüyu sah; pha daiyu, maomüyu, ae hoyu; nghitu mainou soukhai touyu sah; zhaotu mainou southou homara khai touyu souhee ae souhee buyu maitao nou pove sheela peie.

²⁴Maikhe maitao nou shahu moa baosahu peilou süyu maitao nou MAPAO hi pove sheela peie; ae akasia süü buyu maitao nou poa panou MAPAO vei vah soure donou pove peie.

²⁵Chuhai soulou süyu naotumai hrülai nou lah puletao bah nou souloua pha daiyu, maomüyu ae homarayu alia züzüyu sahtao sü pove peie.

²⁶Puletao nou nghitu mainou pha-a souloua nou pove peie.

²⁷Peikho maitao nou onyz chuh ae chuh mutei khesü ephod hi alia khaokhare hi thoure donou pove peie,

²⁸alia vusa ae mei taore donou meidzü, neare theadzü alia kainüvei pou poa meideire khesü pove peie.

²⁹Israel mai hrülai nou lah puletao nou peilousü na khesü MAPAO nou Moses hi kharochi peikhai touyu thaifüa MAPAO vei vah panou soure donou pove sheela peie.

³⁰Moses nou Israel mai hi paoe, “MAPAO nou Judah khü hinou hrüveyu Hur tyao, Uri nahpoutu Bezalel ye doloure.

³¹Puh hisü Ramai nou soulousüyu dokai, alia sha tyatyali soulou süyu tsü khesü thoupeiwure,

³²ae sana, shahu ae baosahu poa zhai tyatyali southoulou süyu,

³³chuh dao lousüyu ae süü poa sha tyatyali soulou süyu tsüdo khesü puh hi thoupeiwure.

³⁴MAPAO nou puh hi alia Dan khü hinou hrüveyu Ahisamak nahpoutu Oholiab puhai hisü shara soulou süyu dokai teitei sü ae mai hia doupei lousüyu tsüdo khesü peiwure.

³⁵Puhnou puhai hisü shara tyatyali soulou süyu tsüdo, alia sabanü daoyu mainou pha daiyu, maomüyu, homarayu alia züzüyu sah hi cha tyatyali raothou lousüyu büa puhai hisü dokai teitei peiwure.