Read Poumei Naga TAPALOUYU 39 Bible Online

TAPALOUYU 39 - Poumei Naga bible

TAPALOUYU 39

¹Puletao nou daiyu, maomüyu ae hoyu soumai pha nou veishoa napao maitaoye panou Sheeyu Buh hi banouloua naanou soure donou sabanü khesü souloue. Puletao nou sheeyu sabanü sü MAPAO nou Moses hi kharochi peikhai touyu büa Aaron vei sabanü khesü soupeie.

²Puletao nou ephod nasü daiyu, maomüyu ae zaiteiyu soumai pha; züzüyu sah aveih tya alia sana nou poa souloue.

³Puletao nou sana sü soupourei thouloua phapo büa souloure alia süsü poa deizüzüyu sah hi ae daiyu, maomüyu ae homarayu soumai sah hi cha southouloue.

⁴Puletao nou phao hi hokoure sah ahai sü souloua ephod kainghou ahai hisü panou lümore donou khipakhai loue.

⁵MAPAO nou Moses hi kharochi peiyu büa, khyakho nasüa sana; daiyu, maomüyu ae zaiteiyu pha alia züzüyu sah nou souloua ephod nahisü khipaloue,

⁶Puletao nou onaiz chuh ahai sü poloua sühisü hü veishoa sana nou Israel nahmaitao zhih kiahai sü sühi rüthouloue.

⁷Israel mai khü kiahai taoye panou licho loure donou puletao nou chuh süna ahai sü phao daoyu ephod vahisü MAPAO nou Moses hi kharochi peikhai touyu büa khipa thouloue.

⁸Puletao nou khaokha nasüa ephod souyu natao bütoua tei-daiyu, maomüyu ae zaiteiyu pha, züzüyu sah alia sana nou zhai veishoa daothouloua souloue.

⁹Haina hai sajha-a deitou toue alia ahai soua khikhai toue, sa shoyu nou sentimitar 22, ae jha duyua sentimitar 22 due.

¹⁰Puletao nou hainasü chuh mutei tyanou she adai soua thouloue. She araina hisü ruby, topaz ae garnet;

¹¹dou ahai chena hisü emerald, saphir ae diamond;

¹²she asü chena nou jacinth, agate, ae amethyst;

¹³alia she adai chena hisü beryl, onyx, ae jasper. Chuh haitao hisü sana nou meakhai toue.

¹⁴Chuh sütao kiahai vahisü Jakob nahpoutu mai alili zhih sü rüthou khailoue, sübüa chuh sütao panou Israel mai khü kiahai bue touyu panou süloure donoue.

¹⁵Puletao nou khaokhava hisü sana veitya nou rai büa louloua southou khaitoue.

¹⁶Ae puletao nou sana nou haorü touyu ahai souloua khaokha hisü pokou khikhailoue

¹⁷Puletao nou sana nou rai büa loukhai touyu nasü poloua sana nou haorüa soukhai touyu khaokha hisü khipa khailoue.

¹⁸Ae raipo ahai sü poloua kainghou hi khiloua pokou ephod pah hi khipaloue.

¹⁹Süthaisü puletao nou sana nou haorü touyu ahai soukhai touyu nasü khaokhayu khelova ephod nghia levai hinou thoukhi khailoue.

²⁰Puletao nou sana nou haorü touyu kukhe ahai-a soupuloua phao hinou khakouyu sah ahai ephod vei pah hi ae khyakho reilo bü hinou khipa khailoue.

²¹MAPAO nou Moses hi paopeiyu thaifüa puletao nou khaokha hi thouyu haorü nasü ephod hi haorüyu naye koa tei-daiyu pha ali nou phupa khailoue, sübüa khyakho pei hinou buyu khaokha nasüa panou lümoa buloure donoue.

²²Ephod khevai nou naore naazao nasü tei-daiyu soumaipha likhei nou soua baie.

²³Pei thaithoure mü soucha khaitouyu nahisü panou patamore donou daleichü tea soukhai toue.

²⁴Phi zhukouyu naazao kainghou hisü tei-daiyu, maomüyu ae homarayu pha ae züzüyu sah nou radoushi zhai büa cha kuthou khaitoue.

²⁵Puletao nou sana veitya nou hudabvü souloue, ae naazao phi hi zhukouyu ko kohi, sana nou soukhai touyu hudabvü na ae radoushi zhai büa soukhai touyu nasü reirei-a naazao kainghou hi khithouloue;

²⁶MAPAO nou Moses hi kharochi peikhai touyu zhai büa naazao phi hi zhukouyu koko hisü, sana nou soukhai touyu hudabvü na ae radoushi zhai büa soukhai touyu nasü reirei-a naazao kainghou hi khithouloue.

²⁷Puletao nou Aaron alia puhvei nahpoutu maitao vei sabanü sü daopeie,

²⁸alia peiphuyu sah, peirü, ae nükhe sü züzüyu sah veitya nou soupeie,

²⁹ae khyakho nasü züzüyu sah alia tei-daiyu, maomüyu ae zaiteiyu soumaipha nou zhai veishoa MAPAO nou Moses hi kharochi peiyu büa soupeie.

³⁰Puletao nou sana veitya nou poupa zhai büa ali souloua sühisü “MAPAO hi peithouwure” tea larücha daothou peie.

³¹MAPAO nou Moses hi kharochi peiyu thaifüa sünasü puletao nou peiphuyu sah hi tei-daiyu raipo ali nou phupa khaipeie.

³²MAPAO nou Moses hi kharochi peikhai touyu büa Israel mainou MAPAO nou buyu Rathokipao nasü souche loure.

³³Puletao nou Moses hi Rathokipao, sünapei hi haore sahtao, pothou vaore hu ae sünavei kayu süütao, deka ae dekabeitao;

³⁴kiphao hi haore nghitu ae zhaotu hee, haosah;

³⁵Vo Sübvü ae sünaye kaopore süü, zhuvea-apei buh;

³⁶taibel ae sühi poa vah soure natao; Ramai ye posheelare raokhao;

³⁷sana veitya nou souyu meibvü khaibu; meibvü ae sühi loure natao alia meidzü;

³⁸sana vei posheelabu; neare theadzü; mei deire pou kainüvei; Rathokipao vei kikhubomü hi haosah;

³⁹baosahu vei posheelabu ae süna hi vaokhaire khophao, kaopoa tare süütao, alia sühi loure paikhaotao; phibah khüre raikhao ae süna khaiyu buh;

⁴⁰Chikuyu kide hi taloure kikhubomü haosah, dekatao ae dekabeitao, kikha taloure kikhu haosah; Rathokipao hi ae chikuyu kide hi na vaokhaire shuhtao alia raitao;

⁴¹alia Sheeyu Buh hi napao maitao nou banou poa vah soure sabanütao, Napao Aaron ae puh nahpoutu maitao vei sabanütao hai puletao nou pove peie.

⁴²MAPAO nou Moses hi kharochi peikhai touyu vah teitei sü Israel mainou soupeie.

⁴³Moses nou soukhai touyu vahtao sü zhue, ae MAPAO nou soulo tea kharochi peikhai touyu thaifüa puletao nou souloue. Südonou Moses nou puletaoye shiha peie.