Read Poumei Naga TAPALOUYU 40 Bible Online

TAPALOUYU 40 - Poumei Naga bible

TAPALOUYU 40

¹MAPAO nou Moses hi paoe,

²“Khouh arai navei khoukha ali zhou MAPAO nou bure Rathokipao nasü soushu lakhailo.

³Buh sühisü chikha kirou louyu Vo Sübvü nasü thoukhailo, ae süna pah hinou haosah sü haolo.

⁴Ae taibel sü polou khailo, alia süphao hisü nakhe khailo. Süthaisü meibvü khaibu nasü polou khailoua sühisü meibvü sü mei taoa khailo.

⁵Pou kaivei meideire sana nou soukhai touyu posheelabu nasü Vo Sübvü pah hi khailo, alia Rathokipao hi taloure kikhubomü hisü haosah haolo.

⁶Pou kaivei meideire posheelabu nasü Rathokipao pah hi khailo.

⁷Dzü khüre raikhao nasü Rathokipao ae posheelabu kohinou dzü thouloua khailo.

⁸Chikuyu kide pehao teitei hi ae taloure kikhubomü hisü haosah nou haolo.

⁹“Süthaisü Rathokipao ae sühi buyu na teitei sü sheeyu theadzü nou poa neapeiwua MAPAO bah hi thaothou peio, süthaisü na sütao teitei nou shee-a bailai.

¹⁰Süthaisü meideia posheelare posheelabu ae sühi buyu natao sü theadzü nealoua popeiwo, süthaisü posheelabu nasü sheesheelai sü souwulai.

¹¹Sübütoua raikhao ae süna khaiyu buh nasü sousheeloua popeio.

¹²“Aaron ae puh nahpoutu maitaoye Rathokipao hi taloure kikhubomü hi sakouloua dzü khüshee peio.

¹³Süthaisü Aaron ye sheeyu napao meivei sabanü khesü banoupeio, ae puhye theadzü neapeiwua soushee-a popeio, sübüa puhye panou napao mai ali soua avah panou soulai.

¹⁴Puh nahpoutu maitaoye sakouloua naazao sü thoupeio.

¹⁵Ae puletao puoye theadzü neapeiyu büa puletao-a theadzü napeio, sübüa puletaoye panou napao mai ali soua avah panou soulai. Haibüa puletaoye theadzü neapeiyu hai nanou haithai vere khaphao hrülai hia puletao hai napao mai soulai.”

¹⁶MAPAO nou Moses hi kharochi peikhai touyu teitei sü puhnou souloue.

¹⁷Südonou puletao nou Ejipt teidei thaowua tapayu po ahai navei khouh araina khoukha ali zhou sü Rathokipao sü shula loure.

¹⁸Moses nou Rathokipao shula louyu thai, puhnou dekabei khesü thouloure, ae kizha khesü pothou kaloure, alia kaopoa tare süü sü thaithou loue, ae deka khesü shula loure.

¹⁹MAPAO nou paoyu büa Moses nou Rathokipao nasü haoloure alia peiphao hore haosah nasüa holoure.

²⁰Süthaisü puhnou chikhatao rüthou khai touyu chuh ahai sü poloua Vo Sübvü hisü thouloure, ae Sübvü na kaopore süü nasü thaithou loure alia zhuvea-apei buh nasü süphao hi khai loure.

²¹Süthaisü puhnou Sübvü nasü Rathokipao hi polou thouloua haosah nou holoure. MAPAO nou kharochi peikhai touyu thaifüa puhnou Vo Sübvü nasü haosah nou hokhaiwure.

²²Puhnou taibel nasü Rathokipao hi haosah haokhai touyu vakou, reilova hisü khailoue.

²³MAPAO nou puh hi kharochi peikhai touyu thaifüa, taibel hisü MAPAO nghoujü hi posheela khaitouyu raokhao nasü khailoue.

²⁴Puhnou meibvü khaibu nasü taibel khai touyu khelova Rathokipao hisü polou khailoue,

²⁵ae MAPAO nou puh hi kharochi peikhai touyu thaifüa meibvü nasü MAPAO nghoujü hinou meitao khailoue.

²⁶Puhnou sana nou soukhai touyu posheelabu nasü Rathokipao hi haosah haokhai touyu pah hi khailoue,

²⁷ae MAPAO nou kharochi peikhai touyu büa sühisü pou kainüvei sü meidei khaipeie.

²⁸Puhnou Rathokipao hi taloure kikhubomü hisü haosah haoloue,

²⁹ae süpah hisü meidei-a posheelabu nasü khailoue, ae sühisü meidei-a posheelayu ae thoudzü posheelayu khesü pove sheela peiwe, MAPAO nou kharochi peiyu thaifüa.

³⁰Puhnou dzü khüyu raikhao nasü Rathokipao ae posheelabu kohinou dzü thouloua khailoue.

³¹Sühi sünou Moses, Aaron ae puh nahpoutu maitao nou puletao phibah sü dzü khüwe,

³²MAPAO nou kharochi peikhai touyu thaifüa puletao nou Rathokipao hi talouyu phaki ae posheelabu hi kouyu phaki.

³³Moses nou Rathokipao ae posheelabu pehao hinou chikuyu kide nasü soukhai loue, alia haosah khesü chikuyu kide hi taloure kikhubomü hisü haokhai loue. Haibüa Moses nou vah khesü soucheloue.

³⁴Süthaisü Rathokipao hisü teihao nou kou holoure, ae MAPAO vei khouko ava sünou Rathokipao sü kou buloure.

³⁵Haiva sünou Moses sü Rathokipao hi talou luhore.

³⁶Israel maivei veihdu teitei hisü, teihao nanou Rathokipao thaowua takhaie, puletao vei fühao hai-a buh datawe.

³⁷Teihao nanou Rathokipao hi buyu koute puletao vei fühao sü datawu moe.

³⁸Puletao nou sübüa sühao-a veihdu ta-a bukisa sü MAPAO nou puletao hisü teihao zhai hinou Rathokipao pei hisü heakou bupeiwe, alia khei hisü mei tao-a süpei hinou bupeiwe.