Read Poumei Naga TAPALOUYU 5 Bible Online

TAPALOUYU 5 - Poumei Naga bible

TAPALOUYU 5

¹Süthaisü Moses ae Aaron nou Ejipt veo hi tave paoe, “Israel maivei Ramai MAPAO nou haibüa paoe, ‘Avei maitaoye panou rekou taho Eye tsükhouyu nüh nüre donou puletaoye panou tawo.’ ”

²Ana Pharaoh nou paoe, “MAPAO sü thaoge? Daisounou E puh chi züa Israel maiye panou talai? E MAPAO sü sümoe, alia Israel maiye panou talai moe.”

³Moses ae Aaron nou chila peie, “Hebrew maivei Ramai nou Etaoye ve daore, südonou Etaoye panou teithe asü li rekou taho Etao Ramai MAPAO ye posheelawo, sükumo louzü Puhnou Eh pei hi sounou seive moyuma soureih souyu hinou Etaoye southa bailai.”

⁴Ana Ejipt hi veo nou Moses ae Aaron hi paoe, “Ne hai daisounou maikhe maiye vah souyu hinou satalai touwe? Lah ne hai vah sü taho souta khaio.

⁵Ne hai vei maitao hai Etao Ejipt mai jünou pousho pare, ae chuo ne hainou puletaoye panou vah soumoa bailai tivu!”

⁶Süzhou teithe hinou Pharaoh nou tudee poa vah sa-a souyu maitao hi ae peikho maitao hi haibüa kharochi peie,

⁷“Neletao nou raichoki büa naichuh souyu maitao hisü rouvao peilai moe, puletaoye panou lah phoulo.

⁸Ana puletao nou raichoki naichuh soulouyu zhou sü soulai, panou khai-a soulai moe; daiolouzü puletao hai heakare. Südonou puletao nou ‘Ehye panou taho Etao Ramai MAPAO ye posheelawo’ tea khore.

⁹Maikhe maiye sü panou vah khoupua soukhaio, sütoulouzü puletao hai zho hasholoua dayu chi khesü keiyu teile bulai moe.”

¹⁰Südonou qila maiye tukha poa vah souyu maitao ae peikho maitao nou maikhe maitao hisü paoe, “Veo nou neletaoye rouvao peipulai more tea paoe.

¹¹Neletao lah taho rouvao sü phoulo, ana raichoki neletao nou naichuh soulouyu zhou sü soulai.”

¹²Südonou maikhe mai hai Ejipt teidei teitei hisü rarou poa rouvao sü phoutare.

¹³Tukha poa vah souyu maitao sünou zhaipou shishoa paoe, “Raichoki rouvao peiyu bütoua teithe teithe vei vah sü souche lourawo.”

¹⁴Tudee poa vah souyu Ejipt maitao nou vah khosa-a soupeiyu Israel maitao ye sü taida peie alia puletao hisü “Daisounou raichoki zhoua naichuh sü soulou moe” tea noue.

¹⁵Süthaisü khosa-a vah souyu Israel maitao nou veo hisü tave paoe, “Daisounou ne kilai Etao hi haibüa souwe?

¹⁶Ne kilai Etaoye rouvao sü peimore, ana puletao nou Etao hisü haibüa paoe, ‘Naichuh sü soukhaio!’ Ae sübüa Etaoye dapeie; ana mahyu sü nevei maitao baie.”

¹⁷Veo nou puletao hi chila peie, “Neletao hai hikei-a vah sounü moe, südonou neletao taho MAPAO ye posheelalai tea ahinou khowe.

¹⁸Taho vah sü souta khaio, neletaoye rouvao peilai moe, ana raichoki soulouyu naichuh zhousü soukhaio.”

¹⁹Israel maiye khosa-a vah souyu maitao nou puletao hai vealaire touyu sü süloure, daiolouzü puletao nou raichoki teithe teithe hi naichuh soulouyu zhousü panou chua soulai tea paore.

²⁰Puletao nou veo hinou vakou tapayu phaki, Moses ae Aaron nou puletaoye khoa bue.

²¹Puletao nou puhai hisü paoe, “MAPAO panou ne hai pei hisü chiku peio, daiolouzü ne hai nou Etaoye veo vei nghingao hinou ae puhvei peikho maitao nghoujü hinou ngaoshi loure, alia puletao bah hisü Etaoye panou daothare donou khoche thoupeiwure.”

²²Süthaisü Moses nou MAPAO hi reidakhai veloua paoe, “Oh MAPAOwo, ne daisou nou nevei maitaoye haibüa souvea peiwe? Ne daisounou Eye haihi seivewe?

²³Ne zhih hinou tave Enou veoye phayu thainou, puhnou mai haitaoye souveapu tare, ana nenou mai haitaoye khailupa peimoe.”