Read Poumei Naga TAPALOUYU 6 Bible Online

TAPALOUYU 6 - Poumei Naga bible

TAPALOUYU 6

¹Süthaisü MAPAO nou Moses hi paoe, “Chuo Enou veo hisü daivah soulai touyu nenou ngaolai. Enou puhye sü panou avei maitaoye puhvei vedei hinou tamo louzü shilaiyu vah khesü soupeilai.”

²Ramai nou Moses hisü paoe, “E hai MAPAO nasüe.

³Enou Abraham hi, Isaak hi ae Jakob hi Khoukhoulai Ramai soua ve azhu ngaopeie, ana Enou puletao hisü sheeyu avei zhih MAPAO tea kuyu nanou ve ngaopei moe.

⁴Puletao nou shetumai ali soua hrüyu Kanaan teidei nasü puletao hi peilai tea Enou vo soukhai toue.

⁵Israel maitao nou Ejipt maivei khakhe hinou veashoa lea buyu Enou chouloure, alia Enou puletao hi vo soukhai touyu nasü licholoure.

⁶Südonou chuo Enou paowe tea Israel mai hrülai hisü paopeio, ‘E hai MAPAO nasüe, Enou neletaoye Ejipt mainou souvea-a buyu hinou ae puletao vei hukhaki hinou popa peilai, alia Enou Ejipt maiye tudee peilai ae neletaoye sü khailupa peilai.

⁷Neletaoye panou avei mai souloulai, ae Enou neletao Ramai soulai. Enou neletaoye Ejipt maivei khakhe hinou pa lahdo soulouyu phaki, E hai neletao Ramai MAPAO-e touyu sü süloulai.

⁸Enou Abraham, Isaak, ae Jakob hi peilai tea paokhai touyu teidei hisü neletaoye save thou peilai, alia sünasü neletao vei panou soure donou peilai. E hai MAPAO nasüe.’”

⁹Moses nou haibüa Israel mai hi paopeie, ana Israel maitao nou puh chi sü keipei bare, daiolouzü Ejipt mainou puletaoye souvea shoyu donou puletao hai chathai tare.

¹⁰Süthaisü MAPAO nou Moses hi paoe,

¹¹“Taho Ejipt maivei veo hi Israel maiye panou puletao teidei hinou tawo tea paokhaio.”

¹²Ana Moses nou MAPAO hi paoe, “Israel mai koutea achi keipei ba-a bukhai louge kabüa Ejipt hi veo nou achi sü keipei khailaige? E sü chi paolou süyu mai moe.”

¹³MAPAO nou Moses ae Aaron hi haibüa kharochi peie. “Israel mai hi ae Ejipt veo hi Enou neye panou Israel maiye Ejipt teidei hinou sapalo tea kharochi peiwe tea paopeio.”

¹⁴Puletao vei pfümounah hi puo tsükhana zhih sü haitaoe: Jokob nahpoutu naraio Reuben hai nahpoutu adai bue - Hanokh, Pallu, Hezron ae Karmi; haitao hai Reuben kihikha maie.

¹⁵Simeon hai nahpoutu arou bue - Jemuel, Jamin, Ohad, Jachin, Zohar, ae Shaul, Kanaan pfüpai nahpoutu, haitao hai Simeon kihikha maie.

¹⁶Levi hai nahpoutu asü bue - Gershon, Kohath, ae Merari. Levi nou po 137 mailoue.

¹⁷Gershon hai nahpoutu ahai bue - Libni ae Shimei, puhai hai tyaosholea alao bue.

¹⁸Kohath hai nahpoutu adai bue - Amram, Izhar, Hebron ae Uzziel. Kohath nou po 133 mailoue.

¹⁹Merari hai nahpoutu ahai bue - Mahli ae Mushi. Mai haitao hai puletao vei pfümounah thaifüa Levi kihikha maie.

²⁰Amram nou puh puo tupai Jochebed ye naloue, alia puhnou Aaron ae Moses ye napeie. Amram nou po 137 mailoue.

²¹Izhar hai nahpoutu asü bue - Korah, Nephez ae Zikri.

²²Uzzial-a nahpoutu asü bue - Mishael, Elzaphan, ae Sithri.

²³Aaron nou Amminadah nahpai, ae Nahshon tupai Elisheba ye naloue. Honapai nou Nadab, Abihu, Eleazar, ae Ithamar ye napeie.

²⁴Korah hai-a nahpoutu asü bue - Assir, Elkanah, ae Abiasaph. Haitao hai Korah kihikha maie.

²⁵Aaron nahpoutu Eleazar nou Putiel nah naotupai aliye naloue, ae honapai nou puhye Phinehas napeie. Mai haitao hai Levi khü hinou hrüveyu pfümounah maitaoe.

²⁶MAPAO nou Aaron ae Moses hi “Israel maiye me me souloua Ejipt hinou sapalo” tea paopeie.

²⁷Veo Pharaoh hi tave Israel maiye panou lahdo soua tapalo tea paopeiyu hai-a Aaron ae Moses puhai noue.

²⁸MAPAO nou Moses ye Ejipt teidei hinou chayu phaki,

²⁹Puhnou Moses hi haibüa paoe, “E hai MAPAO nasüe, Enou ne hi paoyu teitei sü Ejipt maivei veo hisü paopeio.”

³⁰Ana Moses nou MAPAO hi paoe, “Nenou süwe, süolouzü Esü chi paolou süyu mai moe, südonou Pharaoh veo nou kabüa achi sü keipei khailai?”