Read Poumei Naga TAPALOUYU 9 Bible Online

TAPALOUYU 9 - Poumei Naga bible

TAPALOUYU 9

¹Süthaisü MAPAO nou Moses hi paoe, “Taho veo hisü Hebrew maivei Ramai MAPAO nou haibüa paoe tea paokhaio, ‘Avei maitaoye panou taho Eye thotawo.

²Chua dakhai nenou puletaoye panou taba louzü,

³Enou neletao vei kikhaorü teitei - rhei, rheisüh, racho, seivo houzhao, ae nghitu zhaotu teitei sü sounou ashi nou seive souhawulai.

⁴Ana Enou Israel maivei ae Ejipt maivei kikhaorü khesü soukukhai peiwulai, sübüa Israel maivei kikhaorü khesü ali koutea panou thailai moe.

⁵Haibüa soulaiyu hai MAPAO, Enou dosho soulai tea teile nasü dade khaiwure.’”

⁶Thainesho sü MAPAO nou paoyu büa soure; Ejipt maivei kikhaorü teitei sü thaire, ana Israel maivei kikhaorü louzü ali koutea thaimoe.

⁷Veo nou puhvei maitao seiho kabüsa touyu zhutae, ae Israel maivei kikhaorü ali koutea thaimoe touyu sü süloure, ana puh le sü chua khousholoua Israel maiye panou tabare.

⁸Süthaisü MAPAO nou Moses ae Aaron hi paoe, “Vonai bahzü ali polo, alia süsü Moses ye panou veo nghoujü nou tei hi laipalai.

⁹Sünasü naihü büa Ejipt teidei teitei hisü ratalai, ae buh liki pfüa soushoyu cho sü maiva hi ae hrikhaona hrülai hi palai.”

¹⁰Südonou puhai nou vonai sü poloua veo nghoujü hisü ve laloure; ae Moses nou vonai sü tei hi laipa peikhaie, mai hrülai va hi ae hrikhaona teitei va hisü cho pakhai toure.

¹¹Kheikhupado soulousü maitao hai tave Moses nghoujü hisü lalou hore, daiolouzü puletao mai hrülai va hia mai kukhe mai büa cho sü paloure.

¹²Ana MAPAO nou Moses hi paoyu büa MAPAO nou veo le sü soukhoupu peiwure, ae puhnou Moses ae Aaron nou paoyu chi sü noupei bare.

¹³Süthaisü MAPAO nou Moses hi paoe, “Dosho shona taho veoye sü daokhaio, alia puh hisü Hebrew maivei Ramai MAPAO nou haibüa paowe tea paopeio, ‘Avei maitaoye panou taho Eye thotawo.

¹⁴Zhaovu louzü Enou tudee laiyu hai nevei peikho maitao ae nevei maitao hi likhei laimoe, ana ne-a loua nou Enou tudee peilai, sübüa neye panou deiphao teitei hi Eye büyu Ramai aliro hae touyu sü süloulai.

¹⁵Enou neye ae nevei maitaoye rahtayu nou seive souhawulai touyu thaio souhakhai touwulaire.

¹⁶Ana avei khouko hai neletaoye panou ngaolai hie alia deiphao teitei hi panou azhih sü süloure donou neletaoye panou hria bubaie.

¹⁷Ne hai chukoute avei maitao hinou khaophu soushoa avei maitaoye panou taba-a buhie.

¹⁸Dosho chupha teile hi Enou shishoyu reithou, raichoki Ejipt teidei hi koukhai moyu reithou sü seikou peilai.

¹⁹Südonou rekou nou buyu ae vakou nou buyu kikhaorü teitei hai baibuh hi save thoulo tea kharochi peio, daiolouzü bailoumoa buyu mai ae kikhaorü hrülaiye sü reithou nou kou deithakhai touwulai.’ ”

²⁰Veo khe hinou buyu peikhomai kamaia nou MAPAO vei chipao sü ngaopiloua puletao vei kilai maitao ae kikhaorü khesü kupove baibuh hi khailoure.

²¹Ana maitaoli hai MAPAO vei chipao sü ngaophou moa puletao vei kilai mai ae kikhaorü khesü vakou khaiwure.

²²Süthaisü MAPAO nou Moses hi paoe, “Ejipt teidei teitei hi— mai khemai hi, hrikhaona hi, ae vupou teitei hi reithou panou kou deire donou ne bah sü raki hi lapa peikhaio.”

²³Moses nou puh süüpo sü raki hi poa lapapei khaie, MAPAO nou teisüyu ae reithou sü seikou peire, alia teireiyu ae teipeiyu nou dei hi kou deire. MAPAO nou Ejipt teidei teitei hisü reithou panou kou deire.

²⁴Reithou sü koushi shore, alia teipeiyu ae teisüyu hai-a ngaopi shore, haibüa shishoyu hai Ejipt teidei hi vedaokhai mohie.

²⁵Reithou sünou kou dou hi buyu ae vakou nou buyu Ejipt teidei teitei hisü - mai hi, hrikhaona hi, vupou hi ae süübe teitei hisü deisasa khai touwure.

²⁶Israel mainou hrüyu Goshen hi likhei reithou koumoa baie.

²⁷Veo nou mai seiho Moses ae Aaron ye kuloua puhai hi paoe, “Zhaovu louzü Enou mahre; MAPAO nou kaore, ae avei maitao alia Enou mahwure.

²⁸MAPAO hi veachi paopeio. Teisüyu ae reithou kouyu hai taisüre! Enou neletaoye panou talaire, neletaoye panou haihi bupulai more.”

²⁹Moses nou puh hi paoe, “Enou nuhdu hai hinou vakou tapa loure toulouzü, Enou MAPAO hi abah lashuloua veachi paopeilai. Süthaisü teisüyu sü chaobailai, ae reithou sü koupu laimoe, süthaisü nenou deiphao hai MAPAO vei baie touyu sü süloulai.

³⁰Ana chukoute ne ae nevei peikho maitao hai Ramai MAPAO ye ngaopi mohie touyu Enou süwe.”

³¹Sah daoyu louhbe ae süthou hai soushi showure, daiolouzü süthou hai thou pfüpare alia louhbe hai pahpa pare.

³²Ana southou louzü dai shisho mo hie, daiolouzü haina hai na-a nou pahpa laihie.

³³Moses nou veoye thaokhaiwua nuhdu hinou vakou tapa louyu phaki, puh bah thaipaloua MAPAO hi veachi paoe. Süthaisü teisüyu, reithou kouyu ae teireiyu sü khaitare.

³⁴Ana veo nou teisüyu, reithou kouyu ae teireiyu sü khaitayu ngaolou khaie, puhnou mah sü soupure. Puh ae puhvei khehinou buyu peikho maitao hai le sü khoupulou khaire,

³⁵alia MAPAO nou Moses hi paopeiyu büa puhnou Israel maiye panou tabare.