Read Poumei Naga JOB 1 Bible Online

JOB 1 - Poumei Naga bible

JOB 1

¹Job tea kuyu mai ali Uz tea kuyu nuh hinou bue, puhsü Ramai ye lütou tea rah thoyu mai alie. Puh sü veishoyu mai alie, hashi touyu ali-a soumore donou soutaosou-a hrüa buyu mai alie.

²Puh hai nahpoutu anai, nahnaotu asü bue,

³alia zhaotu 7000, racho 3000, cho tai-du 1000, alia rheisüh 500 bue. Puh vei kilaimai alao bue, teinghi palo maitao hi hah toungi kayu mai ali soue.

⁴Job nahpoutu mai sü rei-rei mailili ki hinou ve nüh nüzhoyu hai zhaili souwe. Nüh sühisü mai kukou mai-a velou-a nüh nüzhowe alia matsü sou-a puletao tupfümai asütaoye sü kusave thouwe.

⁵Nüh nüzhoyu tsü thainesho Job nou shona nou tashulou-a nahmaitaoye donou sousheeyu vei naanou posheela-a nahmaitao mai alili donou Ramai ye thoyu soutawe, daisounou toulouzü nahmaitao hrohinou kamai-a nou tsücho toumoa Ramai ye ngaophou moa mahmo sou-a bua sümoe tea Job nou choloue.

⁶Rakivamaitao nou MAPAO hi veyu teithe zhousü Saitan-a puletao hrohi lou bue.

⁷Ne daidai vah sou-a buwe? tea MAPAO nou Saitan hi noue. “E sü ho ve ae hai ve-a deiphao tasühao-a bue,” tea Saitan nou chila peie.

⁸“Akilai Job ye ngaoho ngaomoe?” tea MAPAO nou nou-e. “Deiphao hi puh büa chi züveiyu ae mai veiyu alia hae. Puh hai soutaosou-a Eye thowe, hashi ali-a soumore donou soutaosou hrüwe.”

⁹Saitan nou chila peie, “Job nou neye thoyu vanou hali-a ngaoloumo zhuthaio, puhnou neye tho khailaivu?

¹⁰Nenou teisa puh, puh kikhamai alia puh vei kinitaoye vupeie. Puhnou souyu vah hrülai hisü nenou hapeie, ae nuh teitei phoulou süyu kikhaorü sü nenou puh hi peie.

¹¹Ana puh vei buyu teitei sü nenou podakhai louyu thaiwo, veikhai toumoa puhnou neye chaa-a bailai.”

¹²MAPAO nou Saitan hi paoe, “Süthaisü veire, puh vei buyu teitei pei hi soulou süyu khouko sü ne bah hi bue, ana Job hiwo louzü ne bah deilai moe.” Süthaisü Saitan hai aetea tashure.

¹³Teitheli Job nahmaitao hai tsü-tsükhana ki hinou nüh nüzho-a buyu phaki,

¹⁴kopaomai ali tupoa Job hi vere, “Etao sü rheisüh taoye hiphao hi khaitoua chode taoye sa-a dou hinou tata-a bue,

¹⁵lichokhai moa buhinou Sabea mainou hulou ne kilai maitaoye southawu-a rheisüh taosü hupoa takhai toure. E likhei reihpaoh soure donou thaimoa tupalou-a ko hai ne hi ve paowe.”

¹⁶Reihpaoh nanou chi paoche loumo kinou kilaimai kukhe ali-a tuve paoe, “Teivu nou dekou zhaotutao alia zhaokho maitao hrülai deithea khaiwu-a E likhei reipaoh sou-a phapei-a chu tuve ne hi ko hai paongaowe.”

¹⁷Kilai tainanou chi paobe-a buhinou, kilaimai kukhe li-a tuve paoe, “Kaldea mainou reihmai me asü soulou-a talou ne kilaimai hrülai southawu-a rheisühtao hupoa takhaire, E likhei thaimoa tapalou-a tave ne hi ko hai paowe.”

¹⁸Kilai tainanou chi paobe-a buhinou kilaimai kukhe li-a tuve paoe, “Ne nahmaitao sü puletao jüraio tsütsükhana ki hinou nüh nüzho-a buyu phaki,

¹⁹teikhai teirü ashi hai radeiki lonou hüshi shopoa vere. Teikhai nou kisü hükhaowu-a kikha bumai hrülai thaikhaire, E likhei phapei-a tave ko hai ne hi paowe.”

²⁰Süthaisü Job nou tashu lalou-a le vealeyu vanou puh sabanü sü daophawure, pei saiwu-a deiphi kaokou khurüloure.

²¹Puhnou paoe, “E hali-a pomoa nave-a baie, alia E hali-a pomoa thai-a bailai. MAPAO nou pei-a baie, ae chu-a puhnou podakhai loua baie. Puh zhih sü paoshoyu soulou theo.”

²²Haizhou koute shisho-a vepa-a buyuma Job nou hachilia Ramai ye paoshi-a mah soumoe.