Read Poumei Naga JOB 10 Bible Online

JOB 10 - Poumei Naga bible

JOB 10

¹E deiphao hi bupunü more, südonou E vamoyu chipaotao sü E paonü paolai.

²Eye limah chomah peiso, tea Ramai hi paolai, paopei khaio, apei hi vamoyu daio bue?

³Haizhou koute souvea peiyu hai kaolue tea chowu? Lah ne bah nou soupeiyu maiye ngaorayu hai neye donou vei touwu? Mai shimai dokai hisü pa vasayu hai kaoluwu?

⁴Thailou veiyu Emai alinou ha ngaoyu büa ne-a ngao-a baivu?

⁵Ne hrü mamai-a Emai hrü-mamai büa jüwu?

⁶Sütouyu thaisü ne daidonou avei mah phouwe? Enou soumah soumo khaitouyu khesü phouyu hai daidonoue?

⁷E mah soumoe touyu nenou süwe, Ne bah hinou Eye mai talinou-a vupa peilou hoe.

⁸MAPAO ne bah vuzünou ne kilai Eye soupei-a baie, sütou-a lukhu ne bah vuzünou ne kilai Eye souha bailaivu?

⁹MAPAO nou Eye sü konai nou soupeie, chuo Eye nenou konai hi soudakhai louwulaivu?

¹⁰Apuo hi Eye naloure khouko sü nenou peie, nenou Eye apfü pou khevai nou chiduso papeie.

¹¹Nenou avei ke-zhe teitei soupeie, Ne kilai avei rao hi souke souhee southou peie.

¹²Nenou Eye hriyu peie, ae ahie nevei leshi ngaopeie, nenou khopei vupei vanou E zhou teithe koute hri-a bue.

¹³Ana raicho kinou ne Eye souhawure donou kheikheisou-a tuda khaiwure touyu chuo E süloure.

¹⁴Enou mah soure sü nenou choyupoa hakia nou mah souwu louzü khaipei laimoe tea buyu pha-e.

¹⁵Enou mah louzü dai vea soulaisa! Enou mah soumoa cheche-a bukhai-a E apei pfülalou hore, daisounou touyuo E sü hraongu khaikho-a sounou kou pfüa bure.

¹⁶Hakia nou Enou vahli sou-a pah veilouyu phaki nenou Eye sü paokhaodu büa hulai, alia Eye souveare donou khupa vah koute-a soulai.

¹⁷Ne sü teisa nou Eye hraire donou lapeire mai khaiwe, apei hi nevei lekha rarou nasü pulailai khe-a baiwe. Teisa nou vamoyu sütho tholi pfüve apei hi khaipeie.

¹⁸Mai linoua Eye panou ngaomo jünou thai-a bailai manou, Ramai, daisounou Eye panou deiphao hi navewe?

¹⁹Apfü pou hinou khü hi panou lou-a deiphao hi ve hrükhai moyu-a veipu laihie.

²⁰Ahrü mamai hai cheyu laire movu? Eye panou phajü toulia va-a hrülo.

²¹E sü thalasou talaire, dakhai vepu khailai moe. Zhikayu alia jüphi shoyu teidei hi talaire.

²²Zhitei touyu, khungu alia haoma kaoyu, ava koute-a maitei-a bailaiyu teidei hi talaire.