Read Poumei Naga JOB 11 Bible Online

JOB 11 - Poumei Naga bible

JOB 11

¹Süthaisü Naamath puona Zophar nou paoe:

²Chi haizhou koute pao-a buyu chila mai linoua peilai movu? Chi alao paoyu maiye panou acheche khaloua bailaiwu?

³Job, Enou nevei chila peilou hoe tea ne tsüchowu? Mai nou nünüyu ne vei chipao nou Etao ye panou chi paore hazei-a bailou süe tea ne chowu?

⁴Nenou paoyu ne chipaotao sü cheche-e tea nenou khawe. Ramai nghoujü nou ne hai shee-e tea khawe.

⁵Ramai nou neye chila peiyu thaio veisho laire.

⁶Puhnou neye thoushoyu hasü nou popa doupeilai, Ramai vei tsüdo aveih nasü deiphao mainou süve telou hoe. Ramai nou neye souvea zü buyu jünou khai-a souvea-a baie.

⁷Ne nou Ramai vei adu aso alia puhvei khouko hai hi koute bue touyu akhai paolou süwu?

⁸Ramai ye donou ratei hai nanou akhai moe, ana taihi koute-a newo süvete louhoe. Ramaiwo thaimai buh-a süwe ana newo taivanou halia sümoe.

⁹Ramai vei adu aso hai deiphao jünou duhie alia zaidu jünou kahie.

¹⁰Ramai nou neye nülou-a hukha ki hi thouwure toulouzü neye vupapei loure thao bulai?

¹¹Ramai nou süwe thao mainou muh ha-e tuyu, alia puletao nou hashi souyu puhnou ngaokhai tiwe.

¹²Rekou rheisüh nou puh vei toutu hai mai sou-a toulouyuma avomai ali hai hakilia tsü veipapu louhoe.

¹³Job, ne vei tsüle chozü louwo alia Ramai hi tave loulo.

¹⁴Vah ashi souyu thaowo alia ne ki sousheelo.

¹⁵Sütoulouzü ne khuvei-a ae khouchi-a ne pei pfülashu deiphaoye zhulou süe.

¹⁶Süthaisü latayu dzüduye lichopu moyu büa nevei veayu teitei ha-a ngaiwu bailai.

¹⁷Nevei hrümai sü heakou teinghi ava jünoua vapulai, maitei touyu hrümai nasü tei thepayu shona büa valai.

¹⁸Süthaisü neye donou veayu ali-a hazei tea vasho-a hrülai, Ramai nou neye vupeilai alia soyu peilai.

¹⁹Zhuba ngaoba maiye piyu bulai moe, mai alao laonou nevei soukha khovelai.

²⁰Ana mai ashi nasü pah shi-a holao hailao zhutalai, ana tupa loure ludu ali-a ngaolou laimoe. Puletao nou reih-a buyu sü athai likhei baie.