Read Poumei Naga JOB 12 Bible Online

JOB 12 - Poumei Naga bible

JOB 12

¹Job nou chila peie:

²Ovai, maisou nou paoyu chi sü nenou paowe. Ne thai louzü nevei hasü na-a koa hata bailai.

³Ana nenou süyu koute sü E-a süwe. E ne jünou halia khai khaimoe, nenou paoyu taosü mai hrülai nou sükhai-a baie.

⁴Avei samai taore, neletao koute nou Eye konüwe, E mah hayu mai ali souyuma Eye konüwe, ana Ramai nou avei veachi kei-nou peiyu teile ali bue.

⁵Neletao hai veayu hae, ana Eye konü-a bue, kaotayuno-a buyu naye neletao nou khaokhaowe.

⁶Ana avaomai ae Ramai ye sümoyu maiye souveayu hae, puh mainou thoyu Ramai sü lah puletao vei khouko sü baie.

⁷Tei hi raohou alia resoutao nou puletaoye doupeilou veiyu taoli bue.

⁸Deiphao hi hrikhaona alia dzü hi hrikhaonatao hinou nou khaio, puletao vei ratsü sü neletao hi doupeilai.

⁹Puletao teitei nou lah puletaoye soupeiyu Ramai ye süwe.

¹⁰Hrikhaona hrülaiye panou hri-a buyu hai Ramai nou baie, mai hrülai vei hrümai sü puhvei khouko khenou bue.

¹¹Nevei lee nou touvei süyu büa nevei noubei-a chi keiloua vasawe.

¹²Tsümai hai tsüdo bue, ana Ramaiwo tsüdo alia khouko ahai khei nou bue. Tsümai nou vere-pare süwe; ana Ramaiwo vere-pare alia süna pei hi soulousü khouko-a bue.

¹⁴Ramai nou soukhaoyu naye thaonou soushupu loulai? Alia Ramai nou hukhaki hi thoukhaiyu naye thaonou shupapei lousüe?

¹⁵Ramai nou teirü ye khukhaiyu thaisü tokaayu vewe, Ramai nou teirü alao seive peiyu vanou dzüdu pawe.

¹⁶Ramai hai khouko bushoe alia Puhnou teisa nou veilou-a baiwe, mainou laluyu mai ae maiye laluyu mai ahai kheinou Ramai bah hi bue.

¹⁷Teidei khomai vei tsüdo aveih sü puhnou podakhai lou-a panou avomai ali büa vah sou-a baiwe.

¹⁸Veo maitao-a puhnou buh soukou peiwu-a panou hukhamai souta-a baiwe.

¹⁹Puhnou napao peicha maiye sounakou peiwe alia aduso maiye puhnou soutai peiwe.

²⁰Louche louvei maiye puhnou puletao vei paila sü souha peie, alia tsümai hinou sükulou süyu tsüdo nasü polai peia baiwe.

²¹Puhnou khouko bumaiye soungu peiwe, alia teidei khomai vei khouko sü souha peia baiwe.

²²Teimai teizhi alia athai vei buh hi puhnou ava seive peie.

²³Puhnou tyahrüh taoye soukhou souchi peie, ana sütaoye souha peiyu na-a puhnou baie.

²⁴Puhnou süthai-apei maiye tsü souhawu-a panou vota-a baiwe, ae puletaoye panou tsübo ha-a baiwe.

²⁵Puletao sü teimai teizhi hinou zhaoh sozhiyu mai ali büa chaohrü hrüa panou ta-a baiwe.