Read Poumei Naga JOB 13 Bible Online

JOB 13 - Poumei Naga bible

JOB 13

¹Nenou paoyu chitao sü anghithou nou ngaokhaiwure, a noubei nou chou-a sükhai loure.

²Nenou süyu taosü E-a süwe, E-a ne jünou khaikhai moe.

³Ana E Ramai hi paonüwe alia Ramai ye chi veiva nüwe, ne hi moe.

⁴Newo dahrü hrüa nevei hasü moyu nasü poku-a baie, newo sounou mai ali koute-a souveilou hoyu keingumai ali büa baie.

⁵Nenou chi lia paokhai moa bulouzü kamaia nou ne-a hasümai alie tea popei-a malae.

⁶Enou chi shavayu soutaosou keilo.

⁷Ne daisounou dachi paowe? Dachi paoyu hai Ramai ye donou veiyu bue tea ne chovu?

⁸Ne Ramai phaobo-a chi paolai tea chowu? Chiku ki hi ne tave Ramai donou lapei laiwu?

⁹Ramai nou neye nghikinou zhuyu phaki, ne hi haveih ali koutea bua ngaoloure buwu? Nenou maiye lalulouyu büa Ramai ye lalulou süwu?

¹⁰Nenou kheikhei sou-a phaobo-a buyuma Ramai nou neye züvu zülai.

¹¹Ramai vei soulousü khouko sünou ne hi ngaopi pilai ali soulai.

¹²Nenou paoyu tsüchitao sü kokhai moyu vounai büa baie, nenou shavayu chi paopayu taosü beima ali-a hae.

¹³Ne phajü touli ngasou bupei-a Eye panou paokhaio, Enou paopayu vanou dai velaisa panou ve theo.

¹⁴E hri-a buyuma halia komore, südonou Eye panou akhai vei ssü haiwu-a baiyuma dai kayu bue? E puh nghoujü koute avei zü hai paolai.

¹⁶Enou khuvei-a paoyu vanou Eye khailu peilou-a lae, daiolouzü mai ashimai li-a Ramai nghoujü ve lalou hoe.

¹⁷Chuo Enou shojü paopare soutaosou kei khaio,

¹⁸E avei zü paore donou souda chewure. E ha mahmo ali-a soumoe touyu Enou süwe.

¹⁹Mai talinoua avei mah paopa peilou süwu? Sütouyu thaio E rao-a raokhai mo-a thai-a bailai.

²⁰E ne hinou ha tya ahai noulai, hai hai aetou peio, alia E haliro ne hinou poku laimoe.

²¹Eye souveayu hai thaopeia baiwo, alia Eye pirayu nasü baipeio.

²²Nenou rai-a ahi paopeio, E-a soulou süsa chila peilai, mokhai-a ne kilai Enou paolai, ne-a chila peikhaio.

²³E dai mahmo sourege? Enou soumah soumoyu avei mah sü paopeio.

²⁴Daisounou nevei pah sü ahinou pfüvai tawe? Ne kilai Eye daidonou zhuba ngaobamai ali büa zhupeiwe?

²⁵Ne Eye soupi peilai tea tewu? Esü halia moe, sühou ali raibaie. Kirü rüyu thouba aliye hülaiwu?

²⁶Enou nahle-a buki soumah soumoyu mahtao vanou apei hi tatei shoyu mah dukhai-a bure.

²⁷Nenou aphi hurai nou phuwure, nenou avei phika teitei zhu-a bue, alia aphihea koute zhu-a bure.

²⁸Hai vanou E sü süürayu büa ratare, alia rükhao nou touyu sabüa desasa pasasa tare.