Read Poumei Naga JOB 15 Bible Online

JOB 15 - Poumei Naga bible

JOB 15

¹Süthaisü Teman puona Eliphaz nou chila peie:

²Tsü veiyu mailinou thou loumoyu chipao paolaiwu? Mokhai-a ko lia loumoyu chipao nou lahnou lahye vupa loure paokhai laiwu?

³Kokhai moyu moa muh lia hayu chipao nou chi sü shava khailaiwu?

⁴Ramai ye pia tsükhouyu tsüle hai ne hi ali-a hae, ae Ramai ye lichoyu sü ne hinou hatare.

⁵Ne maiveih moe touyu sü nevei chipao vanou süloure. Ne kaisho-a nevei mahmotao poku loure donou tewe.

⁶Enou neye mahwe tea paoyu komoe, lah nenou paopayu chipaotao nou ne hai mah-e touyu süwe.

⁷Ne hai lah nenou deiphao hi nave rairai khanae tea chowu? Ramai nou deichitao soupeiyu phaki ne-a sühinou buwu?

⁸Ramai nou haibüa soulai tea choyu pai ne süwu? Deiphao mai hi tsüdo aveih sü ne hie likhei bubai tea chovu?

⁹Eh nou sümo ngaomoyu ali-a nenou süngaoyu sü hae.

¹⁰Tsüdo sü peipao hu chayu tsümai hinou, ne puo navemo jünou hrüyu tsümai hinou douloue.

¹¹Ramai nou neye paona peiyu daisounou chukoute polouba-a buwe? Kaona shoyu chi lako aveih nou Enou ne hi paopeiwe.

¹²Ana newo lekha rarou nou koa Eh ye phe-a bue.

¹³Ne Ramai pei hi rarou-a puhye paoshiwe.

¹⁴Deiphao mai talina cheche vuzünou sheelou süwu? Mai talina Ramai nghoujünou cheche lousüwu?

¹⁵Ramai nou rakivamai koute-a louche moe, Puh nghoujü nou puletao koute-a shee moe.

¹⁶Dzü keyu büa mainou ashiye kewe, mai hai shee moe, alia mai hai muh ha-e.

¹⁷Job, kei noulo, Enou paolai, Enou daidai süngaoyu taosü ne hi paolai.

¹⁸Puopaoh mai hinou doulouyu hasü maitao nou halia kukhai moa acheche nasü Eye doupeie.

¹⁹Puletao nou hrüyu teidei hisü shetumai ali-a hae. Ramai vei chikha thaifüa hrüyu jünou mai taralinoua puletaoye süthai mah peire mai lia hae.

²⁰Maiye souveayu mai ashimai sü puletao hria bubusa veahoyu ae shameayu sü zhai baie.

²¹Teisa nou puletao noubei sü pihiyu pai khaikho choulai, vei-e, halia moe tea buyu hinou mai vei shaotou shaosoyu mai nou huve-a bailai.

²²Azhi hinou tupa loure zhou lia puhnou ngaolai moe, daisounou toulouzü sümoyu buh ali hinou khoche poa puhye daotheare donou da-a buloure,

²³ae puh vei thaiphao sü rashopeiki nou toure donou kho-a bure. Haibüa teile ashi vere sü puhnou süwe;

²⁴khouko bushoyu veo mai ali nou reih huloure bütoua rako ashi nanou kho-a bue touyu lah puhnou süwe.

²⁵MAPAO ye bahtou nou raoyu mai, ae Ramai ye phi nou tainayu maisü haibülai:

²⁶Mai sünasü khaophu soua puhvei rü pfüloua Ramai pei hi reih huloue,

²⁷daiolouzü puhvei pah sü theadzü nou hopfüa bue, ae puhvei sabanü khesü theadzü nakhai toue.

²⁸Puhnou reih hulou nuhdu khesü poloue, ki paomaitao tutayu thai sümaitao ki sü thaoloure, ana reih soua shaolouyu nuhdu ae ki khesü souha-a bailai.

²⁹Taibüyu maisü phashoa hangi-a bulai moe; puhvei buyu teitei sü hatakhai-a bailai. Puhvei khungu koute-a ha-a bailai.

³⁰Puh sü azhi hinou hakilia tupalou hoe, puhsü mainou meideiwua thaitayu süübotao ae teikhai nou hüpoa tayu sünghou bütoua bailai.

³¹Puhnou vo-a hashi naye louche louzü, süna vei buu soua puhnou hashi ngao-a bailai.

³²Süübo ali nou kitayu thai lapapu moyu büa puhsü puhvei teile chemo jünou ki-vüta-a bailai.

³³Puhsü darkha shithou meimo jünou raitayu büa ae oliv pah raitayu büa raita-a bailai.

³⁴Mai ashimai hai tyaosholea ngaolai moe, ae seihla nou poa ki soukhai touyu khesü mei nou deiha-a bailai.

³⁵Do ashi choloua vah ashi souyu mai sü haibülai, ae puletao lethou hisü do ashinou teisa phou-a bubaiwe.