Read Poumei Naga JOB 19 Bible Online

JOB 19 - Poumei Naga bible

JOB 19

¹Süthaisü Job nou chila peie:

²Teile kazhou koute neletao nou Eye heiyu chipao pao-a souchoro-a souvea peilai?

³Eye hraongu soupeiyu thainou hraongu soupei khaikhai-e, hraongu bo lia sükhai toumoa neletao nou Eye paoshi laihivu?

⁴Hakinou Enou mah cheche-a buyuma avei mahmo donou neletaoye daiyu dai-e buge?

⁵Ajünou neletao nou veipu hie tea neletao nou chowe, alia Enou veayu hai avei mah donoue tea chowe.

⁶Hai hai Ramai nou baie touyu neletao chukoute süloumo hiwu? Eye nüloure donou Puhnou rüh southou-a baie.

⁷Eye haibüa souveayu kaomoe tea E Ramai hi chi paowe, ana apai süna mai linoua keipei more, mai linoua acheche hinou apai hai keipei more.

⁸Ramai nou ludu teitei khukhaiwu-a E takou loure bo ali-a hare. Puhnou avei ludusü azhihi poku khaiwure.

⁹Puhnou avei chingi teitei sü souhawure alia avei zhih aveih nasü soushi peiwure.

¹⁰Puhnou Eye bo tyatyalih hinou khousasa peiwure, Puhnou avei areih na-a beimaa nou pailawure, sütea Eye panou ki-vü ta-a thaire hi khapeiwure.

¹¹Ramai nou apei hi rarou sholoure, Eye sü puh vei ngaoba shoyu mai ali büa poloure.

¹²Puhnou reihmai seive panou apei hi reih huloure, avei sahpao pehao teitei sü kaopo pohaolou-a daloure.

¹³Puhnou avei thaihou-jürai maitao koute-a panou Eye ngaiwure. Eye sükho-ngaokhoyu mai hinou Eye sü panou shetumai soutare.

¹⁴Avei tyarai alia samai khamai touyu mai ali-a hazeire.

¹⁵Avei shemai sou-a aki hi ve hou-a chaoyumai nou Eye ngaiwure. Avei kilai naotu khemai koute-a ahisü shevai-shesü mai ali büa baire.

¹⁶Enou kilai maiye kuyu phaki, puletao nou chaba-a baire, Eye soukha peire donou kue ana chabare.

¹⁷Avei khapfü koute nou avei ssü kai hüthoulou hore, lah athaihou jürai mai koute-a aheiki koubare.

¹⁸Nahmaitao nou Eye ngaolou-a ngaophou khaimoa konü-a baire.

¹⁹Avei samai veih veilai maitao-a Eye ngaora-a baire. Enou leshi kayu maitao nou Eye hrai-a baire.

²⁰Avei hee sü rao hi zo-a baire, E hrishulai touyu louche more.

²¹Neletao sü avei samai khaitoue, Eye zhuvea peikhaio! Ramai bah vuzünou Eye khoukhaowure.

²²Neletao daidonou Ramai nou Eye souveayu büa souveawe? Neletao nou Eye souveayu khamo hivu?

²³Mai kamaia nou achipaotao hai choulou-a thaikhai-a lichore donou rükhai peiyu E jüpae.

²⁴Mokhaia dao alinou vealou-a chuh ali hi achipao tao rükhai peiyu jüpae, teisa hamoa buloure ali hi rükhai peiyu E jüpae.

²⁵Ana raki hinou mai kamai-a bue touyu Enou süwe, Puhnou akhai khailai hi tave Eye vupa peilai.

²⁶Avasou hai shikhao nou toube-a buyuma E thaitamo jünou Ramai ye ngaolai hie.

²⁷Anghithou vuzünou E puhye ngaolai, mai kukhe moa E vuzünou ngaolai. Neletao nou haibüa paoyu donou ale sü chathaiwe,

²⁸“Etao nou puhye kabüa souvea peilou laige?” Neletao nou Eye hali moa hali vanou tea huwe.

²⁹Ana chuo khocheye ngaopilo, Ramai vei lekha rarou khoche sü mahmo pei hi povelai, süvanou neletao-a mai hrülai pei hi chikure mai ali bue touyu süloulai.