Read Poumei Naga JOB 2 Bible Online

JOB 2 - Poumei Naga bible

JOB 2

¹Rakivamai nou MAPAO nghoujü hi veyu teithe vepuyu phaki, Saitan-a puletao hrohi veloupu khaire.

²“Ne dai daiki tawe?” tea MAPAO nou Saitan hi noue. Saitan nou chila peie, “E ho ve, hai ve-a deiphao tasühao-a laiwe.”

³“Ne akilai Job ye ngaoho ngaomoe?” tea MAPAO nou noue. “Deiphao hi puh büa paochi züyu alia veiyu mai kukhe ali-a hae. Puh hai Eye thowe, alia hashi touyu lia soumore donou soutaosou tsü cho-a hrüwe. Puhnou hashi ali-a soumoyuma nenou puh pei hi hraire donou tea ahinou kholoure, ana chu koute-a puh hai dao raichoki bütou tea cheche hinou bu-a baie.”

⁴Saitan nou haibüa chila peie, “Mai ali hai hri-a buloure donou puh vei buyu teitei sü peilou süe.

⁵Ana nenou puh vei vasou hai souvea pei khaio, sütoulouzü puh sü neye chaa-a bailai.”

⁶MAPAO nou Saitan hi paoe, “Puh vei vasou-a ne khouko khe bue, ana puh vei hrirai louzü neye panou souha laimoe.”

⁷Süthaisü Saitan sü MAPAO hinou tapalou-a Job vasou pfüphao hisü cho panou pa phouloure.

⁸Sütea Job sü leepe nou puh vasou zhimü soukao khao-a vounai hrohinou hrüe.

⁹Süthaisü puh chapfü nou puh hi paoe, “Ne chu koute-a Ramai ye louche-a bulai hivu? Ramai ye chaawu-a thai-a baiwo.”

¹⁰Job nou paoe, “Ne voyu chi paowe! Ramai nou Eh hi havei peiyu phaki sa sa-a polou, ae Eh hi veayu panou veyu phaki kabüa Ramai pei hi vamoyu chi paolai?” Taibüa Job nou haizhou koute veayuma Ramai pei hi chi-lashi ali-a paomoe.

¹¹Job vei samai asütaosü- Teman hinou veyu Eliphaz, Shua hinou Bildad alia Naamah hinou Zophar hai maitaoe. Puletao nou Job hai veasho-a bure touyu sülou-a puhye ve cha-a puh le sü sousava peilai tea paoh loure.

¹²Puletao hosho-a nou Job ye zhingaoe, ana puh zhu sü shilou hore. Takou puhye shilou khaie, puletao sü rasou krare alia dopfü-a puletao vei sabanü taosü daophawu-a dei hinou chikou nai bolou-a teihi laipa-a ae puletao pei sü boshore.

¹³Süthaisü Job nou haizhou koute vea-a buyu ngaolou-a puh ye koa deiphi hi kou buloure, Job vei vea hai duzhu leyu vanou chiko lia paolou shi-a paokhai moa hea nai ae khei nai hai chi lia pao moa zei tea koa bue.