Read Poumei Naga JOB 20 Bible Online

JOB 20 - Poumei Naga bible

JOB 20

¹Süthaisü Naamath puona Zophar nou chila peie:

²Job ne chi sü maiye sounguyu chi baie, südonou chuo E nevei chila peire donou kholouho sou-a bure.

³Nenou paoposhu Eye haongu soupeie, ana chuo Enou kabüa chila peilai touyu Enou süwe.

⁴Ramai nou teideiphao soupei arai raikha nou zhou teithe koute,

⁵mai ashimai ali hai savayu ngaowu moe touyu ne-a süa bue.

⁶Puhnou dusopa ratei tsü-a buyuma, puh pei nou khe teihao sao-a buyuma,

⁷teikhai nou naihü hütayu büa hütawu bailai, puhye sükho shikhoyu maitao nou puhye sü daiki vetare sa tea khupa sou-a bailai.

⁸Zhiho mekou nou ngaoyu ae kheikou zho ali ngaokhaitou-a hatayu büa puh sü hata bailai, sütea puhye ngaopu khaimoa bailai.

⁹Puhnou hrüa buyu hinou ngaomozeih tea ha-a bailai.

¹⁰Puhnou toure hamai hinou shoalouyu kinitao sü puh vei nahmaitao nou toulai,

¹¹Puh pfüzho veisho-a nahlepea-a buyuma puh sü thalasou nai data-a bailai.

¹²Puletao nou ashi nasü touveih sho-a touso-a bue, ae hashi nasü puletao vei lee khevai kukhai toua bua lae,

¹³touveih ae soveih nasü panou vakou derai payu pa-a puletao vei mü hinou kupfü-a bu-a lae,

¹⁴ana sübübüyu touso sü puletao vei poukhe lou khashoyu ae maiye kaitheare poushi da-a bailai.

¹⁵Mai ashimai nou maivei vaolou-a touthou sothou khaitouyu taosü rüpa bailai, sübüa puhnou mai vei vaolou-a buyuma puhvei poukhe hinoua Ramai nou podakhai palou-a bailai.

¹⁶Mai ashimai nou zhaothou khaitouyu nasü kaithare poushi bübaie. Nghou tushi bütou tea tainanou puhye kaithea bailai.

¹⁷Laivoudzü alia chonaodzü nou küyu rei nasü puletao nou ngaolou hoe.

¹⁸Puletao nou kujükhai touyu thao-a ta-a bailai, Puletao vei kinitao sü puletao nou tousoyu ngaolai moe.

¹⁹Daisounou touyuo puletao nou toure hamaiye ngaophou moa souvea peie, mai kukhe mainou soukhai touyu ki koute-a puletao nou shaoloue.

²⁰Puletao nou lunüyu akhai hae.

²¹Ana puletao nou touso louyu thai-a lipayu ali-a buchamoe, südonou puletao nou hangiyu sü phateile sho-a bulai moe.

²²Puletao hai daizhou koute veilou ngaloue, süzhou koute puletao hisü veahoyu nou ve-a bailai.

²³Puletao nou tounü sonü teitei panou tousoyu sü souo, Ramai nou puhvei lekha rarou nanou puletaoye tukha soulai.

²⁴Puletao nou huh vei khoche pi-a tuta-a buyuma puletao hai tukou baosahu loushu nou kathawu bailai.

²⁵Loushu nou puletao vei vasou kashapoa pa zhimü ngaolai alia süsü ngaolou-a puletao sü pi-a hilai.

²⁶Puletao nou kujükhai touyu teitei sü souhawulai, mai bah nou soushu moyu meinou puletao ae puletao vei kikhamai ye deitheawulai.

²⁷Raki hinou puletao vei mahmo khesü popa ngaopeilai, alia puletao hai mah chechere touyu sü dei nou paolai.

²⁸Ramai vei lekha rarou nou dzüdu büa puletao vei kini teitei sü souhawulai.

²⁹Mai ashimai nou ngaore zhasü Ramai nou haibüa tuda khaiwure.