Read Poumei Naga JOB 21 Bible Online

JOB 21 - Poumei Naga bible

JOB 21

¹Job nou chila peie:

²Enou paore chi sü kei-nou peikhaio touyu hai likhei khowe.

³Eye panou chi daotu paokhaio, Enou paore paocheyu thainou neletao nou Eye konü-a konütheo.

⁴Enou veire moa savare sü deiphaomai moe, Enou chi paomoa ngasou buthoulou hoyu hai avei zü bue.

⁵Eye zhukhaio, avei zhaidou hai ngaolou-a neletao vei le dai-a ngasou buthoulou hoyu phamowu?

⁶Ahi vepa-a buyutao hai ngaolou-a maikasoue alia ngaopi-a ngumosha louhore.

⁷Mai ashimaiye panou thai-a thaimoa panou hrü che-a hrülou alia hangi louyu hai daidonoue?

⁸Puletao hai nahmai tyaomai hrülou-a dusopayu koute panou ngao-a hrülouwe.

⁹Ramai nou puletao ki hisü souka sounghiyu panou vepei moe, puletao hai pi-a hrüyu sü hae.

¹⁰Ongai, puletao vei kikhaorü hai tyoutu-a kapalouwe, veayu ali-a ha-a tou touloua baiwe.

¹¹Puletao vei tyaomai nahmaitao hai zhaotu büa ko-a laiwe,

¹²shabe nghou-a lou sou-a buwe.

¹³Puletao hai kaona hinou hrü che-a hrülouwe, alia thaiyu phakia veayu ha-a thailou baiwe.

¹⁴Maishi maitao nou Ramai hi puletaoye panou lah jüpa, lahdo sou-a baio; Eh nou ne jüpa dai-e tea süyu donou koyu hae tea paowe.

¹⁵Ramai kuvah souyu vanou veiyu ali-a hae tea puletao nou chowe. Puh hinou veachi paore ali-a hae tea baiwe.

¹⁶Puletao khouko vanou veilou-a baie tea puletao nou khawe, ana puletao nou choyutao sü Ewo aetou moe.

¹⁷Mai ashimai vei meivabvü sü duki sounghi peie? Puletao hai hakayu daowu? Ramai nou mai ashimaiye puhvei lekha rarou hinou souvea peiwu?

¹⁸Puletaoye thouba büa teikhai nou hütawu? Mokhaia naihü büa teikhai teirü ashi nou hüpo-a tawu?

¹⁹Puo nou mahmo souyu donou puh vei nahmaitaoye Ramai nou souveawe tea neletao paowe. Haihai macha moe, daidonou touyuo Ramai nou mahmo souyu naye sü tukhayu dosoe. Puletao nou mahmo souyu vanou Ramai nou puletaoye tudei pei-a baie.

²⁰Mahmo souyu mainou lah mahmo thaipfüa veayu sü panou ngaotheo, Ramai vei lekha rarou nasü puletaoye panou ngaotheo.

²¹Mai ali nou thaiyu thai puhvei nahmaitao nou vasa-a buho bumosa tea tsüchoyu sü bulaivu?

²²Aku kulai hinou chiku-a buyu Ramai ye thaonou tsüdo paodou peilou süge?

²³Mai taolizü thaimo koute pfüphao vei-a hrülouwe;

²⁴thaiyu phakia vasho-a thai-a baiwe, puletao hri-a buyu phakia vasho-a hrülouwe.

²⁵Mai taoliwo savayu ali-a ngaomoe, puletao sü veasho-a hrüe alia veasho-a thai-a baiwe.

²⁶Ana mai hrülai sü thaikhai toulai alia daovukhai toulai, shikhaongao nou puletaoye sü toukhai loulai.

²⁷Eye panou mah souloure donou neletao nou tsücho-a buyu tsüle sü Enou süwe.

²⁸Aduso puona, vah ashi souyu mai navei ki sü chuo daiki bure tea neletao nou nouwe.

²⁹Neletao nou veihao soulai maiye koa chi phayu phaki, puletao nou kabüa paoe touyu neletao sümowu?

³⁰MAPAO vei lekha rarou hinou tarei louyu mai sü hashi soulaiyu mainou-e tea paoe.

³¹Mai ashi maiye thaonou maishie tea paolousüe? Mokhaia puletao nou mahmo souyu donou tea paokha peilou süvu?

³²Veisho-a soukhai touyu khü hi kaopo veyu phaki,

³³mai thethe thethe nou tave nüvu peie. Dei koute noua taibüyu thaiphaoye sü soutaosou-a popeie.

³⁴Ana neletaowo ale souva sousa peire donou tea tave kokhai moyu chi paitya pao-a buwe. Neletao nou paoyu chitao sü dahrü hrüyu chikhai tea baie.