Read Poumei Naga JOB 22 Bible Online

JOB 22 - Poumei Naga bible

JOB 22

¹Süthaisü Teman puona Eliphaz nou chila peie:

²Hasü sülai maina koute Ramai nghoujünou koyu dai bue?

³Nenou acheche vah souwe touyu vanou Ramai ye donou dai koyu bue? Nenou haveih souyu nanou Ramai ye dai soukhayu bue?

⁴Ramai nou ne pei hi chiku-a neye souveayu hai nenou cheche-a hrüyu vanou moe.

⁵Nenou souyu mahmo duleyu donou baie, alia nevei mahmo sü akhai hayu donoue.

⁶Ne paoh pfüyu nevei thaihou jürai maitao hi nenou paoh khove-a khapeilou hokhaie, puletao sabanü koute-a nenou shaolou-a panou bai-a buwe.

⁷Nenou rei-a laimaiye dzü panou külou moe, alia houzü-a laimaiye vaipei bae.

⁸Nevei khouko alia nevei aduso nanou deiphao teitei hai nedo soulouwe.

⁹Nenou meamaipfüye soukha moyu themoa vearou nahmai vei-a shaolou-a souvea peie.

¹⁰Südonou chuo ne pehao teitei hisü kaobvü khaitoulou-a ne sü pishiyu khaikho baire.

¹¹Neye donou maitei lou-a ne ha ngaolou hore, alia veayu nou dzüdu sou-a ne hi vere.

¹²Teikou vutao hai kusho-a buyuma akukulai hi buyu Ramai nou puletao koute-a na-a ngao-a baiwe.

¹³Nenou chowe, Ramai nou dai ngaolai? Puhye sü teihao nou süloure, kabüa Etaoye sülou ngaolou khailaige?

¹⁴Puhnou raki vedei hinou tasühao-a buyuma teihao nou sülou-a ngaolou hoe tea ne chowe.

¹⁵Mai ashimai nou tayu ludu hinou ta-a bailaire tea ne le lawudou?

¹⁶Puletao vei teile vetemo jünou dzüdu nou puletaoye sü naopoa ta-a bailai.

¹⁷Sümaitao sü Ramai ye laiwuyu mai alia Ramai nou puletao hi halia soulou hoe tea choyu maitaoe.

¹⁸Ana puletao soungi papeiyu sü Ramai nou baie. Mai ashi maitao nou lichoyu hai Ewo sülou hoe.

¹⁹Mai ashi maitao nou veayu ngaoloua mai aveih mai ae acheche maitao nou nüwe.

²⁰Mai ashimai vei buyu pfüphou souhawu baiwe, alia shotaotou-a meinou deiwu baiwe.

²¹Job, chuo Ramai ye chaveilo, Ramai hai neye hraiyu mai alie tea choyu nasü thaowuwo. Nenou sütouyu thaisü Ramai nou neye ha peilai.

²²Puhnou doupeiyu sü aetoulo, Puh vei chipaotao sü nevei lethou hi khailo.

²³Ne natai lou-a Ramai hi dakhai velo. Ne kihikha hinou ashi souyu pfüphou sü soupuso.

²⁴Nevei sana sü shilaiwo, veih kayu sana khesü theyu rei hi laithouo.

²⁵Ramai ye nou nevei sana soulo, alia Ramai ye panou nevei pojü khaitouyu shahu soulo.

²⁶Süthaisü nenou Ramai ye teisa nou louche-a nevei savayu pfüphou hai Ramai hinou ngao-a bailai touyu süloulai.

²⁷Nevei veachi sü Ramai nou keinou peilai, alia nenou Ramai nghoujünou chaachou souyu nasü souphe laimoe.

²⁸Nenou soupfüyu teitei hi pah veilouyu ngaolai, ae nevei ludu sü vapha toulai.

²⁹Ramai nou khaophu souyu maiye souna koulai, alia tainou souyu maiye sü vupeilai.

³⁰Ne hai checheyu thaiwo Ramai nou neye vupa peilai, nenou soupfüyu hai zü-a buyu thaiwo Ramai nou neye khailu peilai.