Read Poumei Naga JOB 23 Bible Online

JOB 23 - Poumei Naga bible

JOB 23

¹Süthasü Job nou chila peie:

²Chu-a E Ramai pei hi vamoa chi paowe. E haibüa paoyu hai thaolou hoe.

³Ramai nou buyu buh sü E sünü shore, Puh buh hi tave loure ludu sünü shore.

⁴Enou puh hi tavelou-a vamoyu pfüphou hai shoshonou paongao nüe.

⁵Puhnou ahi daichi paolaisa, kabüa avei chila peilaisa touyu sünü lure.

⁶Ramai hai puhvei khouko teitei lou-a Eye hraikhai laiwu? Moe, sütoulai moe, puhnou achi keipei vuzülai.

⁷E ale sheesha tea baie, Ramai ye koa veishi chi phalou süe, alia E hai le sheewe mah hae tea puhnou paoshee peilai.

⁸Enou teinghi palo phou tae, ana Ramai ye phouhae; teinghi loulo-a phouta-e ana puhye ngaolou moe.

⁹Ramai hai reilo ae khekou nou vah sou-a bue, ana E puhye ngaomoe.

¹⁰Ramaiwo louzü avei phika teitei sükhai touwe, Puh Eye veiho shisa tea zhulouzü, E sheesha tea buyu puhnou ngaolai.

¹¹E puhvei ludu hinou ta-a baie, bakha zhoulo-a mokhaia bakha nalo-a tarei tamoe.

¹²E teisa nou puh vei chikha thaipfüa soupfüa baie, E lah ajüpa hinou moa puh jüpa thaipfüa ta-a baie.

¹³Puh sü teisa nou tyakuyu hae, mai linoua puhye dulouhoe, mokhai-a puhnou sounü pfünü nasü mai linoua ngilou hoe.

¹⁴Eye donou puhnou daitea souda-a busa, süsü vete vuzülai, souda sünasü puh vei choshalou hoyu souda hrohinou ali baie.

¹⁵E sü puh nghoujünou pishi-a bue.

¹⁶Hali-hala soulousüo Ramai nou avei khuveih khudu nasü souhawure.

¹⁷Eye panou ngaopiyu sü teimai teizhi nou moe; ana Ramai nou baie. Teimai teizhi nou Eye panou ha ngaomore, ana ngaopiyu sü Ramai vanou baie.