Read Poumei Naga JOB 24 Bible Online

JOB 24 - Poumei Naga bible

JOB 24

¹Daisounou Ramai vei kuvah soulai maiye acheche hinou chikure donou teithe teile ali dade khaipei moge?

²Deiphao mainou dei ngaopu loure donou raichuh lalaiwe. Puletao nou mai vei zhaotu vaoposhu lah zhaotu hrohie thoulouwe.

³Pfüpuo ha-a vearou mai vei rheisüh sü puletao nou vaolouwe, alia meamaipfü vei chode sü nülou-a puletao paoh khapeimo koute khaipeiwe.

⁴Puletao nou toure hamaiye panou lah vei zü koute ngaolou bae, puletao nou toure hamaiye holo hailo huta peiwe.

⁵Puletao sü tsü hayu rheisüh büa rekou nou taho touso phoutawe, puletao nahmaiye panou toure donou touso sü phoutae, ana halia ngaolou more.

⁶Puletao hai mainou southou khaitouyu dou hinou chachi-a baie, alia mai ashimai vei darkha kipei hinou darkha shithou pojü louwe.

⁷Puletao hai kheiki bazüre züsa koute-a ali-a hae, ae puletaoye soulü loure donou halia hae.

⁸Puletao hai teirü veyu phaki teirü nou phaicha koko-a lyaphi khonou bai-a baiwe.

⁹Mai ashimai nou pfüpuo hayu vearou nahmaiye saloua panou qila souloue, alia toure hamai nou puletao paoh khapei louho khaie, nahmaiye nou nülou-a baiwe.

¹⁰Toure hamai sü sah lia bamoa bai-a ta-a baiwe; cha chiyu phaki koute-a toure ha-a baiwe.

¹¹Puletao nou theadzü soure donou oliv dzü süwe, zhaoh soure donou darkha dzü süwe ana puletao sü rei-züa baiwe.

¹²Nuhdutao hinou zhizhu khaitoua thaiyu nonoa bumai nou sha-a rawe, ana Ramai nou puletao vei veachi sü noupei moe.

¹³Maitaoli nou avaye hrai-a bue, puletao nou ava ludu nasü sümoe ae sühi buchamoe.

¹⁴Maiye dathayu mai hai shona nou kushulou-a vealai maiye southare donou tashuwe, alia kheiki sü mai vei vaotawe.

¹⁵Mai chapfü nahmai sapamai sü tei zhilouyu kho-a bubaiwe, puletao zhu sü maiye panou shilou more donou puletao vei pah holouwe.

¹⁶Mai vei vaomai sü kheiki nou mai ki dakhaoe, ana heakou hai kijü teiva hi pamoa tutsü-a buwe.

¹⁷Heakou louzü puletao nou avaye ngaopiwe ana teizhi hilouzü puletao donou piyu hae.

¹⁸Zophar nou paoe, Mai ashi maiye sü dzü nou dupa maopfü-a ta-a baiwe, alia puh vei füdei sü Ramai vei chaa ngao-a baiwe, puletao nou vah soure donou tea ludou hi holou more.

¹⁹Vüra nou tei lüpa khaie hata-a baiwe, sübüa mahmo souyu mai sü ahri mai teidei hinou hata-a baiwe.

²⁰Puletaoye sü lah pfü koute nou ngaiwu baiwe, puletaoye sü khaongao nou toulou-a kaotayu süübe ali büa souha baiwe.

²¹Puletao hi sübüa pawe, daidonou touyuo puletao nou mimeapfüye souveapeie, alia nahmai hayu pfümai hisü leshiyu hae.

²²Ramai vei khouko likhei nou khouko bumaiye sü souha peie, Ramai nou sübüa vah soupa khaie mai ashi maitao sü thaitawe.

²³Sübüyu maiye Ramai nou eihtea panou zhou vei-a hri-a buloue, ana puletao nou soupfüyu teitei sü Ramai nghithou nou ngaomoyu hae.

²⁴Pha teile jütea mai ashimai nou hangi payuma puh sü poubetou ali büa ki-veta-a baiwe, roube pei valouyu büa vade baiwe.

²⁵Haibü laimoe tea maita linoua paolou süwu? Enou paoyu achi kaomoe touyu maita linoua popa ngaolou süvu?