Read Poumei Naga JOB 27 Bible Online

JOB 27 - Poumei Naga bible

JOB 27

¹Job nou chila peie:

²Hri-a buyu Ramai, ahi mah-zü thaifüa soupei moyu, alia avei hrümai hi panou veayu hi louyu donou E puh zhih hinou chaachou souwe.

³Ramai nou Eye panou ssü hai-a bubusa sü avei mü-lee nou chi shi lashi ae dayu chi paokhai laimoe.

⁵Neletao nou paoyu chi hai chechewe tea E hakilia paolai moe, athai koute E mah hae tea la koute-a bailai.

⁶E hai cheche-a baie touyu hai thaokhai laimoe, atsü ale sheesha-a baie.

⁷Eye hrai-a duyu maiye sü panou mai ashimai ali büa souvea peitheo.

⁸Ramai ye sümoyu maiye donou puletao vei teile che-a Ramai nou polouyu phaki, puletao vei areih sü dai bue?

⁹Puletao hi veayu veyu phaki, puletao nou khoyu veachi sü Ramai nou keipei laivu?

¹⁰Ramai nou peire asah nasü puletao nou jüpalai, sübüa tobai soumoa Ramai hi veachi paoyu pha-e.

¹¹Ramai hai puh vei khouko daizhou due touyu Enou doupeilai, alia Khoukhoulai Ramai nou choda khaitouyu nasü Enou paongao peilai.

¹²Ana haibüyu teitei sü lah neletao nou süwe alia ngaowe. Südonou neletao daisounou thou loumoyu chi paowe?

¹³Hali-hala soulousüo Ramai nou mai ashimai ae zhaipou shiyu maiye sü haibüa tukha peiwe.

¹⁴Puletao nahpoutu alaolao buwulai, ana puletaoye sü reih hinou southa bailai. Puletao hinou naveyu nahmaitao sü pouphou ngaotou louhoe.

¹⁵Thaihao moa buyu maitao-a sounou sou-a thailai, sübüa mimeapfü soutayu puletao koute nou-a puletaoye donou dongai pfüpei laimoe.

¹⁶Mai ashimai vei pousha sana hai chosha louho-a bumala-e, alia moloushi sabanü jünou koulia bua mala-e;

¹⁷ana mai aveih mai kamaia nou sabanü sütaosü banouloua bailai, alia achechemai nou puletao vei pousha sanatao sü poloua bailai.

¹⁸Mai ashi mainou ki souposhu kheirara nou rakhai touyu ra büa buyuma mokhaia dou khoyu qilamai repao büa soukhaitoua bu-a lae.

¹⁹Puletao hai hanisho-a zü-zhi tae, ana zhi-a kaishuyu phaki puletao vei kinitao sü hazei-a bailai.

²⁰Sükhai moa buyu hinou dzüdu veyu büa ngaopi nou puletao hisü velai, khei nou teikhai shishoyu velou-a teikhai nou hüpo-a takhai-a bailai.

²¹Teinghi palo nou hüveyu teikhai nou puletao vei ki sü hükhaowu bailai.

²²Puletao nou tuta loure donou telai ana leshiyu ali-a ha-a nou puletaoye hüpoa ta-a bailai.

²³Teikhai nou bah pha-a puletaoye konü-a lukhu puletaoye sü hüpoa ta-a bailai.