Read Poumei Naga JOB 28 Bible Online

JOB 28 - Poumei Naga bible

JOB 28

¹Shahu hepa loure buh bue, sana hrüpayu buh alao bue.

²Mainou hu sü deikhe nou hepa louwe, chuh hinou pousha hu hrüpa louwe.

³Thoushoyu alia zhishoyu buh hi koute mainou loulai tea tewe. Dei hai kazhou koute thou-a busa touyu dei vei akhai süloure donou tewe. Thoushoyu alia zhitei touyu buh hinou lou lya chuh hepa louwe.

⁴Mainou hrüyu buh hinou dousho-a mai linoua ve phi heakhai moyu buh hi koute, maikhe mainou deikhe nou payu na phoutawe. Buh sühinou lah likheiyuma vah souwe. Thoushoyu deikhevai nou rai khipfüa talou vah souwe.

⁵Deiphao hinou thoudzü ae vupou hrüwe, ana raibütoua buyu deiphao, deikhevai hai pepo sasa-a bubaie.

⁶Deikhevai buyu chuh hisü daizüzüyu mutei chuh lou bue, alia deiphao seinai-vounai hi-a sana louwe.

⁷Tei lüche hai mutei na payu ludu ngaomoe alia rashopeiki hai buh sühi zhaove moe.

⁸Paokhaodu ae soukhaona koute-a sübüyu zei touyu ludu hi ta-a moe.

⁹Khou khoulai chuh-lya nasü mainou daowe, deichi phi koute helai peiwe.

¹⁰Chuh-lya hinou qulu voupoa puletao nou deikhe mutei chuh phoupa louwe.

¹¹Rei dzü kepayu dzühou hinou deikhevai hethou kukhaitoua buyu mutei nataosü ngaolouwe.

¹²Ana tsüdo ae ratsü hai daikinou ngaoloulai? Etao nou süloure donou buh daiki nou taho douloulai?

¹³Tsüdo hai deiphao mai hinou ngaolou hoe, maili koute-a tsüdo vei muh hai cheche-a sümoe.

¹⁴Paowe, tsüdo ae ratsü sü thoushoyu dzüdu alia zaidu khevai nou ngaolou moe.

¹⁵Tsüdo sü sana raka nou hrülou hoe.

¹⁶Muhtei teilai sana mukta koute-a tsüdo vei muh railou hoe.

¹⁷Sana raka jünou muh teihie, veih veilai sana nou souyu bvü ae leirei pai junou muhtei hie.

¹⁸Tsüdo hai mutei chuh tyatyalih jünou muh teisho hie, sana mukta koute-a tsüdoye paokha louhoe.

¹⁹Tsüdo hai mutei chuh alia sousheesha toua khaitouyu sana ye paokha paonada louhoe.

²⁰Sütoulouzü tsüdo hai daikinou payu bue? Daikinou doulou-a süloulai?

²¹Hrikhaona talinoua mokhaia tei hi zhaoyu raohou ali koutena sülou hoe.

²²Hakayu alia athai nou paoe, sünasü mainou pao kuyu pai likhei süyu baie.

²³Tsüdo vei ludu sü Ramai likhei nou sü-a baie, alia tsüdo sü daikinou bue touyu Ramai nou sü-a baie.

²⁴Deiphao vei akhai koute Ramai nou zhu-a bue, alia ratei khe hinou buyuna veishi Ramai nou süwe.

²⁵Daisounou touyuo Ramai nou teikhai hi khouko peiyu phaki alia zaidu hai duyu haizhou koutelai tea lü peiyu phaki,

²⁶Puhnou teirüye daiki rükoulai touyu ludu, alia tei sü-a teireiyu ye tare ludu paopeiyu phaki,

²⁷Puhnou tsüdo hisü zhue alia tsüdo vei aveih ae koyu sü soutaosou zhulou-a Puhnou hai hai veire tea nou ae cheche tea aetou peie.

²⁸Ramai nou mai hi paoe, “Tsüdo veiloure donou neletao hai MAPAO ye tsükhoulo, alia tsü süloure donou neletao ashi hinou tareilo.”