Read Poumei Naga JOB 29 Bible Online

JOB 29 - Poumei Naga bible

JOB 29

¹Job nou chi paopu shukhaire.

²Tala tayu avei teile hi Ramai nou Eye khopei vupeiyu büa teile tainasü ngaodakhai loure donou E jüpasho-a bue.

³Tai teile kisü teisa Ramai nou Eye ko-a tapeie, Enou teimai teizhi hi ta-a buki-a puhnou ahi ava sü peie.

⁴Teile süki hai E hani sho-a bue ae Ramai ye samai sou-a puhnou akikha maiye vupei-e.

⁵Süteile kisü Ramai nou kozho pei-a alia anah maitao nou Eye sühao-a buyu teile-e.

⁶Avei chotao alia nghitutao nou naodzü alao peie, ae avei oliv betao sü chuhrao pei hi koute-a veishoa rashithou shipeie.

⁷Nuh hi tsümaitao vejü-a meimeyu hisü E-a puletao hrohinou avei buh ngao-a buloue.

⁸Nahle maitao nou Eye ngaoyu phaki puletao hai Eye pi-a tuvai ta-a baie, ae tsümaitao nou Eye ngaoyu phaki tsükhou-a puletao hai tashu la ngaoe.

⁹Süthai-apeimai koute-a E velou khaie chi paoyu so-a baie.

¹⁰Matsü shoyu mai koute chilia paomoa zei tea baiwe.

¹¹Eye ngaoyu mai mokhai-a avei ko choulouyu mai hrülai nou Enou havei souyu kohtao sü phakuwe.

¹²Toure hamai nou khoyu phaki Enou puletaoye peie, hakilia vere tare buh hayu rounahtou taoye sü Enou soukha peie.

¹³Vea kayu maitao nou Eye paoshoe, Enou mimeapfü taoye panou kaozhou vei-a hrüloure donou soupeie.

¹⁴E teisa nou cheche-a vah aveih sou-a baie.

¹⁵E nghicha mai vei nghithoue, alia sholai mai vei phi soupeie.

¹⁶Enou toureha mai vei puo soupeie, ae veihao soulai mai vei samai khamai soupeie.

¹⁷Enou mai ashimai vei khouko sü souha peie, alia puletao nou souvea pei-a buyu maitaoye sü Enou vupa peie.

¹⁸E avei hrümai so-a hrüshulai, alia lah aki hinou vaphi-a thai baishulai tea tsüchoe.

¹⁹Süübe ali hai maa tsülou dzüye nghi-a alia botao hai vidzü nou kou chapeia buyu büa Esü hrüe.

²⁰Mai hrülai nou Eye sü paoshoe, alia avei khouko sü khaitayu soumoe.

²¹Enou puletaoye doupeiyu phaki maili koute-a pai paimoa soutaosou lelousho-a keiwe.

²²Enou chi paocheyu thai mai kusü linou halia paothoupure ha-a baiwe, avei chipao sü teirüdzü büa puletao lekhevai tsülou peie.

²³Tah tamai nou teirüdzü vuh khoyu büa maikhe mainou achipao sü kei-nou nüsho-a khowe.

²⁴Puletao jüphi-a vamoyu phaki Enou avei pah valou-a puletao vei le souva peie. Avei pah vasü puletaoye donou muh teishoe.

²⁵Enou puletao vei hrümai ludu nasü doupeie, vemai alinou reihmai ye süthaisa-a reih hi tabuyu büa Enou puletaoye süthaisa-a tapeie. Puletao le pepo-a buyu phaki-a Enou puletao vei le sü sousa souva peie.