Read Poumei Naga JOB 3 Bible Online

JOB 3 - Poumei Naga bible

JOB 3

¹Sübüa buhinou Job nou puh mü khalou-a puhye nalouyu teithe nasü chaa-a paotare.

²Job nou paoe,

³Eye nalouyu teithe alia Eye poupfü louyu khei nasü Ramai nenou chaa peio!

⁴Teithe taina panou maiteiyu souo alia teithe tainaye donou tea Ramai nenou halia chopei khaiso, teithe taina hisü avaye panou vapupei khaiso.

⁵Teithe tainasü panou zhi-kayu souo alia teihao panou zütei lou-a teinghi vei avasü sütei toulo.

⁶Khei tainasü potei vei teile hinou popa laiwuo alia puhye chothoupu khaiso.

⁷Khei tainayesü panou nahapfü sou-a savayu ali-a buso.

⁸Teithe tainaye chaa peio tea hraomai hi alia Leviathan khaonaye tukha lousü khouko bumai hi paopeio.

⁹Khei taina pei hie shona vu-a vapeiso alia khei taina hisü tei thepare donou vu zhiyu panou bupu khaiso.

¹⁰Khei tainayesü chaa peio daivanou touyuo puh vanou Eye naloue alia Eye panou veayu ngao-a bue.

¹¹E hai apfü poukhe nou thai-a baiyuo veilai monou mokhaie Eye natha thaio veilai monou.

¹²Daisou nou apfü hai Eye puh nake phao popa khaipei sarou, daisou nou Eye naonao peisarou.

¹³E teile sühinou thaiyu thaiwo chu hai sophi tea bulaide,

¹⁴daodao vedei soushu dakhai louyu veo maitao, alia teidei khomaitao büa E zhi-a bubu laire.

¹⁵Mokhai-a sana pousha pove ki hi phoutao khaitou-a buyu veo mai nahpoututao ye koa zhi-a bubu laire.

¹⁶Mokhai-a nako souyu nahtou ali büa Eye daovu laire.

¹⁷Khü hisü mai ashimai nou souveapu laimoe. Vah sou-a hroyu mai-a sühinou asoyu sü ngaolouwe.

¹⁸Sühinou hukhamai-a kaonayu ngaolouwe, pi-rawo nou sa-a vah souyu mai pai choupu laimoe.

¹⁹Taidu buh sühi bukhai toue, qila mai-a taihinou lahdo sou ngaolouwe.

²⁰Daisounou veayu maiye panou hri-a bupuwe? Veasho bumai hie daisounou ava vapeiwe?

²¹Athai kho-a bue, ana vekhai toumoe. Puletaosü sana pousha kini jünoua khüye jüpapuwe.

²²Puletao hai thai-a khü hi thou vumo koute savayu hae.

²³Ramai nou vere pare pokuwu-a pehao teitei bokha khasühao khaitouyu mai pei hi daisounou teiva vapeiwe?

²⁴Enou toure sore thaosü dopfüa baire, Enou sou-a leyu hai hakilia thaolou hore.

²⁵Enou piyu ae hraoyu teitei sü cheche-a vekhai toure.

²⁶E kaonayu moa asoyu hae, alia avei veayu hai akhai hare.