Read Poumei Naga JOB 30 Bible Online

JOB 30 - Poumei Naga bible

JOB 30

¹Ana chuo ajünou nahleyu thaihou maitao nou Eye sü ngaophou moa konüa baire. Puletao vei puo maitao hai avei seitao sa-a nghitu-zhaotu khoyu vah koute-a sa-a vah soulou shiyu mai baie.

²Puletao hai po-a vah ali-a soulou shiyu mai baie.

³Puletao sü toure halale-a hou-reiyu vanou sümaa-poumaa kirürüyu paitya koute-a poa toue, kheikou sü mai hrümoyu buh rekou nou buwe.

⁴Radeiki hinou hrüyu poube alia süübe koute pailaloua toue, touveiyu ali-a hayu phai maa koute-a pailalou-a toue.

⁵Puletaoye mainou ngaoyu phaki maivei vaomai aliye sha-a hulaiyu büa puletaoye hulaiwu baiwe.

⁶Puletao sü ki koute ha-a nou leaphi khonou alia lea qulu khonou hrüwe.

⁷Rekou nou rekhaona büa sha-a rawe, pouhro nghihro kinou ve jüa buwe.

⁸Puletaoye sü voyu nahmaitao, ko khaimoyu maitao-e! Puletao sü nuh hinou hutayu mai baie.

⁹Chuo taibüyu mainou tave Eye jünü-a konüre, Esü hazholia more, mainou konüna sou-a baire.

¹⁰Puletao nou Eye ngaora-a anghiki koute-a takou nümore, puletao nou apah hi taidzü süsho peie.

¹¹Ramai nou avei khouko souhazei toupeiwure, chuo puletao nou ahi puletao vei lekha-rarou nasü shameayu hare.

¹²Puletao mai hrülai nou athai ngou-a Eye panou tu-a baire, Eye sü akhai khailai sou-a souhawulai tea te-a bure.

¹³Puletao nou Eye nuchaolou-a Eye souhawu bailai tea tudawe, puletaoye nuchao peire mai ali-a hare.

¹⁴Puletao nou avei duyu buh chaqulu hinou loulou-a apei hi hupoa koure,

¹⁵Esü ngaopi shore, avei khouko sü teikhai nou hülaiyu thouba büre, ae avei kini khesü teihao büa hatare.

¹⁶Chuo Esü thailaire, avei sounou sü khaiyu hare.

¹⁷Kheimathe avei raotaosü hrei-a soure, sübüa souyu sü chaokhai moa sou-a baire.

¹⁸Ramai nou Eye ngu hinou leilou-a avei sabanü sü paihaowure.

¹⁹Puhnou Eye sü konai hi laithou peiwure, Esü konai jünou veipuyu hare.

²⁰Oh Ramai, Enou neye sü rasou la-e ana nenou khepei more; ae Enou veachi paoyu sü nenou keinou pei more.

²¹Nenou Eye sü souvea shopeie, Ne khouko teitei nou loua Eye sü souvea peie.

²²Teikhaiye panou Eye hüpo-a tare, shishoyu teikhai hrohinou Eye sü panou veasho-a shamea bure.

²³Nenou Eye sa-a athai hilao tawe touyu E süloure, buh tainasü mai hrülaiye donou tudayu bue.

²⁴Haliro souloure khouko ha-a nou buyu; zhuvea peio tea veasho-a nou kho-a buyu maina pei hi ne daisounou huwe?

²⁵Vea-a laimai donou E-a kramowu? Toure hamai donou E-a dopfüa veapei mowu?

²⁶E asayu ae ava nasü jüpa-a nou reih-a bue, ana veayu ae azhi nou avei zha sou-a baire.

²⁷Le veayu alia sounou nanou Eye sü paide paisasare, veayu sü teithe teithe pumaimai-a baire.

²⁸Ewo teinghi ava zhu ngaomoa azhi hinou ta-a bure, Eye soukha peio tea maisou hinou khowe.

²⁹Enou shapayu apai-ra sü nüsei alia tuturu nou rayu büre.

³⁰Avei vasou sü teiva tare alia Enou rakiyu hai meinou rouyu soure.

³¹Raichokiwo sashoyu lou souyu choue, chuo sou-a lüyu ae krayu pai chou-a baire.