Read Poumei Naga JOB 31 Bible Online

JOB 31 - Poumei Naga bible

JOB 31

¹E loumainah aliye hashi sounü hinou anghithou zhukhai laimoe tea chaachou souwure.

²Akukulai Ramai hinou Emai nou dai ngaore zha bue? Hali-hala soulousüo Ramai hinou ngaore kaa dai buge?

³Mai ashi mainou ngaore sü hakayu alia mahmo souyu mainou kanghiyu ngaolai mowu?

⁴Enou soupfüyu teitei Ramai nou sükhaiwe, avei phika teitei puhnou zhuwe.

⁵E chou-a nou paowe, süolouzü E hashi lia soumoe, alia maili hia dazhu-a laluyu vah soumoe.

⁶Ramai nou Eye sühchokhao ali hi pothou dou-a zhu louzü E hai mahmo ali-a hae touyu süloulai.

⁷Avei phika hai ludu macha hi tamoa kamah kamo-a bulouzü, avei tsüle hai nghithou jüpa hilao süthai ta-a bulouzü, avei bah hai shee moa nou buyu thaiwo,

⁸Enou southou khaitouyu avei chamou teitei sü soushi-souha theo, mokhaia Enou daothouyu chamou sü mai kukhe maiye panou toulou theo.

⁹E nou akinapa mai vei chapfüye jüpa-a puhnou vakou tapayu tutsü-a da-a buyu thaio,

¹⁰avei chapfüye panou mai kukhemai ali vei li khoyu souta theo, alia mai kukhe mai aliye ko-a züyu souta theo.

¹¹Haibübüyu vah ashi souyu maiye sü panou athai nou tukha peitheo.

¹²Meizhe hinou mei taoyu büa avei buyu na teitei sü deihawu theo.

¹³Avei kilaimai alinou apei hi vamoa chi paoyu phaki, Enou puletao vei chi sü soutaosou keitou pei-a phapeiyu kaoe.

¹⁴Enou puletaoye koa kaolu hinou sa-a hrütou peimo louzü E kakua Ramai ve daolai? Ramai nou apei hi chiku veyu phaki E daichi paolai?

¹⁵Eye soupeiyu Ramai nanou avei kilai na-a soupei-a baie.

¹⁶Enou toure hamaiye soukha peinü moa tarei takhai toumoe, mimeapfüye panou veayu hi loumoe,

¹⁷mokhaia vearou nahmaiye panou toumo-somoa lah Enou touso loumoe.

¹⁸E ahrümai sasü puletaoye donou haveih soupeie.

¹⁹Toure hazhule-a sabanü hülou hoyu mai aliye ve daoyu phaki,

²⁰lah avei nghitu zhaotu hinou popa louyu soumai nou daoyu sabanü nou puletaoye peie, sübüa puletao nou thaimoa hribusa Eye paosho-a kalo paoe.

²¹Chiku ki hinou ve chikuyu phaki, Eye soulou hoe tea vearou-a lai mai pei hi Enou dazhu-a vah souyu buwu?

²²Sütouyu thaio avei baokao panou chatheo, avei baokao ahai kheinou avei pfüphao hinou deta theo.

²³Ramai nou chikure alia puhnou souveare nasü E-a ngaopi, südonou E hakilia hashi süpaitya soulou hoe.

²⁴Enou kiniye loucheyu hae,

²⁵mokhaia Enou hangiwe tea süvanou khaophu souyu hae.

²⁶Enou teinghi ye puhvei ava donou tea puhye thomoe, mokhaia khouhye puhvei hüveiyu donou tea puhye tho moe.

²⁷Enou taipaitya ye tho züe tea chomoe, alia puletaoye tsükhou-a avei bah nou khurü moe.

²⁸Mah taipaitya souyu hai Ramai ye sümoyu mai nou soua baie, südonou mah taipaitya souyu maiye sü athai nanou tukha züe.

²⁹Eye zhuba ngaobayu mainou veahoyu phaki Enou asayu soukhai moe, mokhai-a puletao pei hi kanghiyu veyu phaki Enou savayu sou moe.

³⁰Puletaoye panou thai theo tea veachi pao-a E mah soukhai moe.

³¹Avei vah souyu maitao nou süwe, süolouzü E teisa nou shetu maiye sheshe peie.

³²Enou veihao sou maiye aki hi kusave panou chaolouwe, hakilia puletaoye panou rekou hinou pa zümoe.

³³Mai kukhe maiwo puletao vei mahmo pokure donou tewe, ana Enou vulia avei mah pokuyu hae.

³⁴Mainou chare-paore piyu hae, mainou chare pi-a kijü papiyu E soumoe.

³⁵Enou paoyu chitao hai mailinoua kei-nou peilai mowu? Enou chaachou sou-a paowe, süolouzü Enou paoyu taosü chechekhai toue. Soulousü khouko buwo Ramai puhnou avei chila peiyu southeo. Apei hi mah dukhaiyu maitao nou avei mah taosü larü rüpalou-a Eye panou ngaore donou anghoujü khaipeiyu thaio,

³⁶E khuveih sho-a sütaosü avei phao hinou daopfülai, alia veo mai peirü ali bütou tea apei hi rüpfülai.

³⁷Enou soupfüyu pfüphou sü Ramai hi paongaolai alia E Ramai hi apei pfülashulai.

³⁸Enou dao-a buyu avei dou alia laotao hai kaomo zümoa nou maivei shaolou-a baiwu?

³⁹Dou moa lao taihinou paopayu chamou moa shina mara taosü Eye panou ngaore donou Enou lah touloua dei taina tayu mainaye panou khü-züa butheo,

⁴⁰dei taihisü routhou bumoa panou poube ae raishu nou paopa-a hrütheo. Job vei chipao hai hainou akhai soure.