Read Poumei Naga JOB 32 Bible Online

JOB 32 - Poumei Naga bible

JOB 32

¹Job nou lah puhvei mah hae tea latei louyu donou puhvei samai asütao nou chila peire donou tepu more.

²Ana nghiki nou la-a buyu Elihu sü rarou sholoua shamealou hore, daiolouzü Job hai lah puhye paozüsha touloua Ramai ye paomah peire. (Elihu hai Barakel nahpoutu-e).

³Mai asütao nou Job vei chila peilou hokhaie, Ramai nou mahyu büa ngao-a baire, südonou puhnou Job vei samai asütao pei hia rarou shore.

⁴Puletao hrohi Elihu nou nakhayu donou mai kukhe taonou chi paoche mosa puh sü kho-a bue.

⁵Mai asü nou Job vei chila peilou hoyu puhnou ngaolou khaie rarouloua chi paoshu tare.

⁶E sü nahle mai hie, newo tsümaie, südonou lah ale khenou cho-a butao sü ne hi paopi-a bue.

⁷Nele büa tsümai nou tsüdo aveih sü süwe, südonou nele tsümai nou paozü hie tea Enou cho-e.

⁸Ana khouko buwo Ramai rako nou Emai hi tave tsüdo sü peiwe.

⁹Mai ali hai tsühi-e touyu vanou tsüdo veipu hie toumoe, mokhaia tsüyu donou chechewe touyu ha-e.

¹⁰Südonou chuo zhuvea-a Enou cho-a bunasü ne hi paongaolai, kei-nou peikhaio.

¹¹Neletao nou paoyu phaki E-a ngasou raomoa nou kei peie, neletao nou hasüyu paila nou chi paoyu phaki kho-a bupeie.

¹²Enou soutaosoua neletao vei chi phayu sü kei nouyu phaki, neletao mai ali koute-a Job ye paodou peilou sümore.

¹³Neletao nou ratsü ngaoloure touyu shee sü daie? Neletao nou Job ye chila peilou hoyu thaifüa Ramai ye panou puhvei chila sü pei theo.

¹⁴Job nou ahi chi paomoe, ana neletao hi paowe, ana neletao nou chila peiyu büa Ewo louzü paolai moe.

¹⁵Job, puletao hai ne hi chi paore hazeire, ae nevei chila sü peilou hore.

¹⁶Puletao hai raomozei tea bubaire, chila lia peipu loure ha-a nou ngasou bure, E-a puletaoye kho-a ngasou paikhai toumoa bulaiwu?

¹⁷Moe, chuo Ewo louzü lah avei chila peilai, Enou licho-a buyu nasü paolai.

¹⁸E chi paomoa puletaoye kho-a bulou hore, daisounou touyuo E paore chi alao bue. Alekhe buyu rako sünou Eye chi paore donou süa bure.

¹⁹E hai chi paore teile ngaolou more touyu thaio, zhaoh southou khaitouyu souheebvü büa E sü paophopa laire.

²⁰E amü ngepaloua chila peilai, sütea vaphouyu ngaolou molouzü shire.

²¹E mai aliye souku laimoe, alia maitali-a seijüyu soulai moe.

²²E maiye sei-a jülou sümoe, Enou maiye seijüyu thaio, Ramai nou Eye thalasoua tukha bailai.