Read Poumei Naga JOB 33 Bible Online

JOB 33 - Poumei Naga bible

JOB 33

¹Chuo Job, avei chi-a keinou peikhaio, Enou paoyu hisü lenou-a kei peio.

²E chuo chi paota laire, paopare chipao taosü avei lee phatou hi bure.

³Ewo dayu chi paolai moe, acheche chi pao-a bailai.

⁴Ramai rako nou Eye soupeie, halih soulousüo puhvei ssü nou avei hrirai soupeie.

⁵Nenou chila peilousü louzü tudaloua nou peikhaio.

⁶Ramai nghoujünou ne ae E sü raibüa baie, konai nou soupeikhei-a baie.

⁷Ne Eye pire hae, E-a neye soushi khaitu laimoe.

⁸Nenou haibüa paoyu sü Enou chou-e:

⁹“E mah soumoe; E kaomoyu vah halia soumoe, Ewo mah ha-e.

¹⁰Ana lah Ramai nou avei mah phoupaloua Eye sü ngaoba zhubamai ali büa poloua bue.

¹¹Puhnou aphi sü hurai nou khiloure, alia avei phika teitei chozhua bue.”

¹²Ana Enou paowe, Job, ne mahwe. Ramai sü Emai jünou du hie.

¹³Nenou vamoa chi paoyu khesü halia kei-nou peimoe tea Ramai pei hi daisounou ne chi paokhaiwe?

¹⁴Ramai nou paokhai paokhai-a buyuma mai linou-a lelou-a puhvei chi sü keipei moe.

¹⁵Kheiki mainou zhi-a buyu teile hinou Ramai nou zhiho mekou ae zho kounou chaku peiwe.

¹⁶Puhnou puletaoye panou puhvei chi khesü keinou loure donou paopeie, ae puhnou paopi peiyu khesü puletao nou ngaopi loue.

¹⁷Puletao nou mahmo souyu sü thaowure donou Ramai nou paopi peie, ae khaophu soumore donou paopeie.

¹⁸Puhnou puletaoye sü panou souhawu laimoe; puletaoye athai hinou-a khailupa peie.

¹⁹Ramai nou sou-nou seive mai aliye souzü peiwe, alia akia pfüphao teitei hai sou-nou seive phou peie.

²⁰Sou-nou souyu mai sü ha tounüyu hae, touveih shoyu touso koute-a tounü moe.

²¹Puletao vei vasou hai kirürüloua rao khaikho ngao-a baiwe.

²²Puletao hai athai maivei teidei hi talaire tea bure.

²³Ramai vei rakivamai thethe hrohinou kamai-a puletaoye soukhare donou tave Etao nou souzü pfüzü khesü doupei-a malae.

²⁴Zhuvea leshi hinou rakivamai nanou paolai, “Puletaoye phapeio! Puletaoye panou athai maivei teidei hi holai mohie. Puletaoye phapeire donou muh sü haihi bure.”

²⁵Süthaisü puletao vei vasou hai nahle puloua khouchi loulai,

²⁶puletao nou veachi paoyu sü Ramai nou kei-nou peilai, asa shoa puletao nou Ramai ye tholai; Ramai nou puletaoye souzüpu peilai.

²⁷Puletao mai hrülai nou haibüa paolai, “E mahwure. E ha veih ali-a soumoe, ana Ramai nou leshi-a Eye khailu papeie.

²⁸Ramai nou Eye panou athai maivei teidei hi tamore, chukoute-a Eye panou hri-a buhie.”

²⁹Ramai haibüa soupei khaikhai-a bue;

³⁰mai alili vei hrirai hai puhnou khailu papei-a puletao hi savayu sü peie.

³¹Chuo, Job, Enou paoyu achi sü keilo; ne raokhai moa Eye panou paokhaio.

³²Ana nenou paore bue toulouzü, E-a nevei chi-a keilai; E asasho-a nevei zü nasü süpeilai.

³³Paore hae toulouzü, ne ngasou bukhaio alia achi kei khaio, Enou neye tsüdo aveih nasü doupeilai.