Read Poumei Naga JOB 34 Bible Online

JOB 34 - Poumei Naga bible

JOB 34

¹Süthaisü Elihu nou paoe,

²Tsüdo veih shoyu maitaore, achi keipeio, kai shoyu maitaore, Enou paoyu sü noupeio.

³Touso na ali hai toulai nou touveih toushi süwe, ana tsüdo haiolouzü noubei nou keire nou veih-shi sülouwe.

⁴Etao lah acheche nasü sheelou laishe, aveih nasü koa doulou laikhe.

⁵Job louzü lah puh hai mah moe tea khawe, ae Ramai nou puhye kaozü nasü peiba-e tea paowe.

⁶Puhnou haibüa nouwe, “E avei mah ha-a nou kabüa E da-a mahre tea paokhailai? Eye shisho-a zhi peiwure, ana Ewo mah ha-e.”

⁷Job büyu mai ali-a neletao ngaoho moe? Puhnou Ramai ye tsükhouyu sü soungao khaimoe.

⁸Mai ashi maiye koa tayu ae mahmo souyu maiye koa tayu hai puhnou jüpa-e.

⁹Ramai vei leli hinou talai tea teyu hai haveih ali-a hae tea puhnou paoe.

¹⁰Tsü pfüyu maitaore, avei chi keikhaio, Ramai nou kaomoyu vah sü soulou veiwu?

¹¹Mainou soupfüyu thaifüa Ramai nou buu peiwe, ae maikhe mainou soupfüyu thaifüa soupeiwe.

¹²Khoukhoulai Ramai louzü hashi ali-a souwu moe, puhnou mai tali hia cheche moa souyu hae.

¹³Ramai hai puhvei khouko sü mai kukheli hinou ngaoloua baiwu? Mai kukhe ali nou puhye panou deiphao khore donou vahbu thou peiwu?

¹⁴Ramai nou puhvei ssü hai podakhai louyu thaio,

¹⁵hria buyu hrülai sü thai khai-a bailai, alia konai hi dakhai loua bailai.

¹⁶Ne tsü veiwe toulouzü chuo avei chi keilo.

¹⁷Acheche Ramai ye nenou mahwe tea paoshi laiwu? Puh hai kaozü naye ngaorawe tea ne cholaivu?

¹⁸Ramai nou veo mai ae nuh teidei khoyu maitao nou vah ashi soutayu thai ae kaomo tayu thai mah paodu peiwe.

¹⁹Puhnou veo mai hie tea phaoboyu hae, toungi maiye phaoboyu hae, daiolouzü mai hrülaiye soupeie.

²⁰Mai ali hai khei ali hinou thaita louveie. Ramai nou Etaoye dakhao peiyu thaisü Etao hai hakata-a bailai; khouko bushoyu mai koute-a puhnou lapasou southa lousüe.

²¹Mainou tayu phika teitei sü puhnou zhua bue.

²²Ramai nghingao hinou mahmo souyu maiye pokulou süyu teizhi hae.

²³Ramai nou Etaoye panou tare alia chikure donou teithe teile dadeyu komoe.

²⁴Puhnou süthai-apei mai aliye pophawua kukhe mai aliye thao thoure donou mah zü phouyu komoe.

²⁵Daiolouzü puletao nou souyu teitei sü Ramai nou sü-ngaokhai touwe, sümaitaoye sü puhnou khei ali hinou soukhao baiwe.

²⁶Puhnou mai hrülaiye panou ngaolou süyu hinou mahmo souyu maiye sü tukha peiwe,

²⁷daiolouzü puletao nou Puh thaifü bare, ae puhvei chikha khesü ngaophou peimore.

²⁸Puletao nou toure hamaiye soukrayu pai sü Ramai hi chou khere, alia puletao nou soukha peio tea khoyu pai sü puhnou kei peie.

²⁹Ramai nou halia soukhai toulai moe touyu thaio mai linoua puhye paoshi laimoe. Puhnou puhvei pah pfüku louyu thaio, Etaoye soukha peire mai lia ha-a bailai.

³⁰Ramai ye sümoyu maitaoye panou puletaoye khasa-a hrülai moe tea buyuma tyahrütao nou souloure khouko ali-a ha-a bailai.

³¹Job, nevei mahtao sü Ramai hi mahwure tea paopalo, mahmo soupulai more tea le lalo.

³²Nevei mahmo taosü ne hi ngaopeio tea Ramai hi khoho kho moe, ae haithai hashi soupu laimore touyu ne aetou homoe?

³³Ramai nou soupfüyu nasü nenou moe tea ba lukhu, nenou jüpayu nasü puhnou soupei shulai tea ne vuzhiwu? lela loure nasü E moe, nenou lai; südonou ne daitea chowe touyu nasü paokhaio.

³⁴Tsü pfüyu mai hrülai nou haisü aetoua bailai, ae tsüdo aveih mai hrülai nou haibüa paolai,

³⁵Job nou chi paoyu hai sümoa nou pao-a baie, ae puhnou paoyu chi taosü thou loumo chi baie.

³⁶Job nou paoyu chitao sü soutaosou tsücho khaio, puh hai mai ashi mainou chi paoyu büa pao-a baie.

³⁷Puh vei mah pei hinou Ramai ye hraiyu thoupua baie; alia Etao mai hrülai nghoujünou puh sü Ramai ye konüwe.