Read Poumei Naga JOB 35 Bible Online

JOB 35 - Poumei Naga bible

JOB 35

¹Elihu nou paoe,

²Job, ne Ramai nghoujü nou mah hae tea paoyu hai paozü moe.

³Mokhai-a avei mahmo vanou neye donou daio shiyu bue, ae E mah soumoyu vanou daio veipuyu bue tea paoyu paozü moe.

⁴Ne alia nevei samaitao buyu hinou E avei chila hai peinüe.

⁵Tei hi zhukhaio, teihaotao hai daizhou koute ku-a nou zhingaowe!

⁶Nenou mah souyu donou Ramai ye soushi hae, nenou kaomo zümoyu vah alao vanou Ramai ye daiyu buwu?

⁷Nenou cheche-a hrüyu nanou Ramai ye soukhayu buwu? Ramai nou nevei soukha pore ali-a hae.

⁸Nenou hashi souyu nanou mai kukhe liye souveayu sü bue, ae nenou vah aveih souyu nasü mai kukhe maitaoye soukhayu bue.

⁹Maikhe maiye souvea peiyu phaki, puletao hai lüwe; puletao nou kra-a puletaoye vupa peire maiye phoutawe.

¹⁰Ana puletaoye Sou-apeio, puletao nou veasho-a buyu teile hi puletaoye areih peiyu Ramai hisü velou moe.

¹¹Eletaoye tsüdo aveih peiyu Ramai, hrikhaona kukhe jünou tsüdo veipua peiyu Puh hilao pah pfürei velou moe.

¹²Puletaoye soukha peio tea kra-a nou khowe, ana Ramai nou kei peimoe, daiolouzü puletao hai khaophu soua ashi vah souyu mai baie.

¹³Puletao hai hamako hinou kra-a rawe; Khoukhoulai Ramai nou puletaoye sü ngaomoe ae puletao vei pai choumoe.

¹⁴Job, nenou Ramai ye ngaomoe tea paowe; ana zhukhaio, nevei chikure zü nasü puh nghoujü hi bue.

¹⁵Ramai hai mahmo souyu maiye tukha peimoe, ae mah sü puhnou lelou pei bae tea nenou chowe.

¹⁶Nenou paokhai paokhai-a buyuma hamako baie, daiolouzü nenou paoyu chi khesü dai paowe touyu hai lah ne-a sümoe touyu sü sheesha tea ngaoloure.