Read Poumei Naga JOB 36 Bible Online

JOB 36 - Poumei Naga bible

JOB 36

¹Elihu nou chi paopue,

²Ne shamea-a nou achipao sü keinoupu khaio, E Ramai thaosoua chi paore buhie.

³Avei hasü hai buh douyu hinou ngaoloue; Eye soupeiyu Ramai hai cheche-e touyu vanou paongao peilai.

⁴Enou ne hi paoyu taosü kaomoyu ali-a hae, süchekhoyu mai ali ne nghoujünou la-a bue tea sülo.

⁵Ramai hai daizhou koute khouko bue! Puhnou maita liye ngaophou moyu sü soumoe; puhnou sümoyu ali-a hae.

⁶Puhnou cheche moyu maiye panou hri-a buchamoe, ana lelou hoyu maiye puletao vei zü thaifüa soupeiwe.

⁷Puhnou acheche maiye vupa peie, puletaoye panou veo mai ali büa tukha-a hrüyu sü aetou peie, ae puletaoye teisa panou tsükhouyu sü peie.

⁸Ana maikhe mainou lah puletao nou soupfüyu thaifüa puletaoye hurai nou phukhai toua vea-a buyu phaki,

⁹Ramai nou puletao vei khaophu souyu ae mahmo khesü ngaopeie.

¹⁰Puletaoye panou kharochi khesü züloua hashi soupfüyu nasü thaoloure donou Ramai nou soupeie.

¹¹Puletao nou paochi züa Ramai vei kuvah soulouzü puletaoye panou kaozhou vei-a ae kaona-a hrüloulai.

¹²Ana puletao nou paochi zümoyu thaiwo khoche hinou süngao khaimoa thai-a bailai.

¹³Ramai ye sümoyu mai hai raroupu loua puletao nou vea-a buyuma soukha peio tea kholai moe.

¹⁴Puletao hai nahle-a bukinou puletao vei hrümamai sü hraongu ngao-a akhai soua bailai.

¹⁵Ana sounou hinou Eh maiye Ramai nou doupeiwe, alia veahoyu panou puletao vei nghithou sü souhe peiwe.

¹⁶Ramai nou neye veahoyu hinou popa peia panou sava-a hrüloue, alia neye touso veihveili peie.

¹⁷Chuo nenou ngaozü thaifüa tukha nasü ngao-a bure, chikure ae acheche sünou neye nüloure.

¹⁸Kini ye panou neye lalu more donou ae seihla ye panou neye süthai poa tamore donou leikeilo.

¹⁹Nevei kini moyuma nevei khouko nou neye panou veamoa bulou süvu?

²⁰Tyahrü hrülaiye panou hakare khei teizhi teile nasü veyu jüpa-a khoso.

²¹Ne hashi hilo pah pfürei tamore donou leikeilo; nenou veayu dao-a buyu hai neye panou hashi hinou paloure donou baie.

²²Ramai vei khouko hai daizhou koute du-e touyu licholo, Puhnou dou-apei mai hrülai peinou dukayu nasüe.

²³Mai taralinoua Ramai ye haina souo tea paolou hoe, alia Ramai nou hashi souwe teanou paolou hoe.

²⁴Ramai nou soupfüyu vah haso khesü teisa nou paosholo; ne-a puhye paosholo.

²⁵Mai hrülai nou Ramai nou daidai souwe touyu sü ngaowe, ana hosho-a nou zhingao-a baie

²⁶Etao nou puhvei aduso nasü süche louhoe, mokhaia puhvei teile hai chosha louhoe.

²⁷Dei hinou dzü poloua panou tei hinou teirüpo ali linou rükouyu hai Ramai noue.

²⁸Teihao hinou teirü koupeiyu sü puhnou baie, teirü koupeiyu hai mai hrülaiye donoue.

²⁹Ratei hinou teihao nou kabüa tawe moyuma kabüa tei süwe touyu alia Ramai hai daiki nou bue touyu mai ali-a sümoe.

³⁰Tei hinou teirei peia panou ava sü vatawe, ana thou shoyu zai khevai louzü zhika-a bubaie.

³¹Haibüa Puhnou maikhe maiye vai peiwe alia touso alao lao peilouwe.

³²Tei peiyu naye puh bah poloua puhnou pa venüyu buh hi velouwe.

³³Teisüyu nanou teikhai teirü ashi velaire touyu paosü peiwe, sünasü kikhaorü koute-a sülouwe.