Read Poumei Naga JOB 38 Bible Online

JOB 38 - Poumei Naga bible

JOB 38

¹Süthaisü Ramai nou teikhai teirü hrohinou Job ye chila peie.

²Chi thoulia loumoa nou chi pao-a avei akhai hayu ratsü naye le tsüa buyu ne thaoge?

³Poutumai ali büa latsü toulo, Enou ne hi chuo chi noulai, avei chila peikhaio.

⁴Enou deiphao soupeiyu phaki ne buho bumoe? Nenou süyu taosü ahi paongao khaio.

⁵Thaonou haidei du-a nou soulai tea khaloue? Thaonou toutsü hinou va nasü vapeie? Haitao vei chila teitei ne peilou sümoe?

⁶Deiphaoye tsüla peiyu dekatao sü daio nou soukhai touge? Deiphao vei kainghou hi chuh thouyu nasü thaonou shupeie?

⁷Deiphao soupeiyu teithe hai vutao nou sashoa lou souzhoe, alia rakiva maitao-a sashoa lou soue.

⁸Zai dzü nou dei pfüpho pa-a dzüdu payu phaki, zaidzü sü panou dzü küpapu more donou thaonou kikhu sü khupeie?

⁹Zai naye panou teihao nou züposhu zhitei-a buloure donou Enou soupeie.

¹⁰Zaidu vei deiraih sü Enou soupeie, süjü panou lapa more donou Enou kharei khangu peie.

¹¹Hai hi koute bailai, haijü panou lapa laimoe, ae chisho-a puhvei zaidzü houyu sü hai hi koute bailai tea Enou paopeie.

¹²Job, nevei hrümai hi teithe lia teithe pakhaio tea kharochi peiho peimo hie?

¹³Ne teithe rarapayu nahi deiye nüloua nou mai ashi maitaoye puletao nou tuchüa buyu buh hinou vakou laipa peio tea kharochi peiho peimo hie?

¹⁴Teinghi ava nou phupeiyu phaki deichitao ae deikho khesü sah kheikhai touyu büa vapha tea ngaopeie, konai hi paoshee dakhai touyu büa sheesha tea ngaopeie.

¹⁵Mai ashi maitao nou avaye sü panou vapei nümoe, daiolouzü avana donou puletao hai hashi soulou shia baiwe.

¹⁶Ne zai khevai talou dzünghou payu buh nasü ngaoho ngaomo hie? Ne zai thoushoyu vei akhai dei hi lou taho tamo hie?

¹⁷Zhitei tea buyu athai maivei deiphao khuyu rokhubomü nasü ne hi mailinoua ngaopeiho ngaopeimo hie?

¹⁸Deiphao hai kazhou koute duwe touyu ne süho sümo hie? Haitao hai ne süwe toulouzü ahi paongao khaio.

¹⁹Ava nanou buh daiki nou buwe? Alia azhi nanou daiki nou buyu buh ne süho sümoe?

²⁰Nenou puhaiye sa-a lahkuku nou buyu buh hi save khaipeilou sümoe? Puhai nou buyu buh hi vere ludu nasü ne süho sümoge?

²¹Newo louzü süsü süvu zübulai, daiolouzü ne hai tsü shore! Teidei soupeiyu teile kinou ne sü bure!

²²Enou ra-rei pokhai touyu kide nasü ne vulia tave ngaoho ngaomo hie?

²³Enou sütao sü veahoyu teile hi ae soureih soure teile hia pore donou khaikhaitoue.

²⁴Teinghi payu buh hi ne veho vemo hie, mokhaia teinghi palo nou hüveyu teikhai buh hi veho vemo hie?

²⁵Teirüdzü panou kütare donou thaonou kaopo popeie? Ae teisüa ra-rei panou koure donou thaonou ludu vapeie?

²⁶Mai hrümoyu buh hi teirü koure donou thaonou soupeie?

²⁷Kirürüa reisho-a buyu dei hi thaonou dzü züpeia panou poudai khesü lapa peiwe?

²⁸Teirü moyuma vidzü vei puo buho hae?

²⁹Vüke alia rarei ye thaonou napeige?

³⁰Vü nou dzü sü chuh büa soupeiwe, alia vüra nou zai pei hi panou vü dalouwe.

³¹Hüveih shoa buyu Khopfüloumai vutaoye ne phuhrü khailou süwu? Alia tyavu (Orion) vutao hai buh pora peilou süvu?

³²Ne teivutao vei teile dade peilou süvu, ae teivutao vei ludu ngaopei lousüvu?

³³Ratei hi tayu zhaitao ne süwu, ae zhai sütao nou poa deiphao hi talou süwu?

³⁴Neye teirükou chapeio tea ne teihao hi kharochi peilou süwu?

³⁵Teipei khaio tea nenou kharochi peilouzü nevei kuvah soure donou E hai hi bue tea velaiwu?

³⁶Nail rei dzü dulaire touyu thaonou hrateita (ibis raohou) hi paopeiwe? Mokhaia teirü velaire touyusü houjü hi thaonou rai-a paopeiwe?

³⁷Thaonou tsüdo vei-a teihao ye phoulousüe, ae thaonou teihao ye panou teirü koure donou daopho peiwe?

³⁸Naihü taoye konaike soupeiyu nasü thaoge?

³⁹Nenou souveo vei touso phoupeiwu? ae souveo vei toututao ye

⁴⁰lya qulu hinou tuchüa buyu phaki, mokhaia lah ve hinou züa khoyu phaki nenou puletao vei pou souphou peiwu?

⁴¹Raohou nou touso ha-a phoutayu phaki, raohou toutu nou ra-a ahi touso khoyu phaki, puletaoye thaonou touso soupeiwe?