Read Poumei Naga JOB 39 Bible Online

JOB 39 - Poumei Naga bible

JOB 39

¹Deichi hi kho-lütao dukinou toutu touwe ne süho sümoe? Shu nou toutu touyu ne ngaoho ngaomoe?

²Puletao nou khouh kizhou koute toutu hai pou hinou pfüwe? Puletao nou toutuyu teile sü ne süho sümoe?

³Daisouyu teile hinou kü nou toutu toukou puletaoye deiphao hi khaipeiwe?

⁴Toutu taonou rekou nou dupaloua khouchi louwe; sütea tayu thai dakhai vepu moa baiwe.

⁵Thaonou rheisüh ye panou lahdo soua phapeiwe? Thaonou puh vei raiphu phipa peiwe?

⁶Mai hrümoyu deisa hi puhye panou bure donou Enou khaipeie, ae tai buyu deikho hi Enou puhye panou touso phoutouyu buh soupeie.

⁷Mai pai maila khaikho chou-a buyu nuhdu hinou dousho-a panou ho hrüe, mai talinoua puletaoye sheposhu maiko zhai louloua sa-a vah soulou hoe.

⁸Deichitao hinou puletao hai pou phou touwe, poudai paitya phou-a puletao nou touwe.

⁹Rekou buyu chode ali nou nevei vah soupei laiwu? Nevei chove hi puhnou aetea khei hai bupei laiwu?

¹⁰Puletao aliye nenou rai khiloua sa-a tatalou süwu? Mokhaia puhnou chophou pfüa nevei dou shapei laiwu?

¹¹Puhvei khouko ye louche-a nevei vah soure taosü panou soupeire donou puh hi thaothou peilou süe?

¹²Ne puhye sa-a nevei chathai hinou thou pojükhai touyu sü sa-a pfüve peilou süe tea chovu?

¹³Ostrik raohou nou puhvei shouh hai theashoa phawe, ana houngukaa büa puletao hai zhaolou hoe.

¹⁴Ostrik nou deiphi hi puhvei jüh jükhai-a vonai ye panou soulü peia baiwe.

¹⁵Mai nou moyuma rekhaona nou tave puhvei jüh taiphe shulai touyu vanou puh hai halia doyu hae.

¹⁶Puhvei jüh sü lah puhvei moyu büa hrüa baiwe; puhnou veasho-a nou jüh jükhaitoue teanou tsüchoyu-a hae.

¹⁷Taibüa puhye panou voyu hai Enou soupeie, Enou puh hi tsü southou peimoe.

¹⁸Ana puhnou tuyu hiolouzü puhnou rhei ye ngaophou moa konüwe.

¹⁹Job, rhei nou khouko bushoyu sü nenou soupeiwu, ae puhvei phaotsümai nasü nenou southou peiwu?

²⁰Rhei ye panou khazü büa chota louyu alia puhnou nghou phükhai-e mai koute-a piyu sü nenou soupeiwu?

²¹Puletao nou deikho hi baonou deipu-a puletao khouko teitei loua reihbuh hisü tulouwe.

²²Puletao hai pibo sümoe, alia khoche pia puletao hai dakhai tawumoe.

²³Puletao nou pfüta-a buyu maitao vei baseitao sü teinghi khuhinou reiphapha poa tawe.

²⁴Shabe nghou peiyu kho choulou khaie ngasou buthoulou ho-a sasho-a nghoujülao tukouwe.

²⁵Shabe nghoupatsü puhnou nghou phüwe, reih buh hi vetemo jünou reih züyu kai hai rai-a sülouwe, alia aduso mainou kharochi shayu pai teitei-a sülou baiwe.

²⁶Houkhi nou zhaohyu sü nenou doupeiwu? Puhvei shouh pheipaloua zhaoh poa shoutayu sü nenou paopeiwu?

²⁷Deichi peitao hinou tapa leche nou phe ra-a buyu sü nenou kharochi peiwu?

²⁸Puhnou aku kulai chuhlya hinou phe souloua buwe, ae kushoyu chuhdu kinou buwe.

²⁹Buh taihinou phi-a hatalia southaloua touloure donou buwe.

³⁰Athai pfüphao pehao sü leche nou sühao-a buwe alia toutu taonou souzhe sü sowe.