Read Poumei Naga JOB 4 Bible Online

JOB 4 - Poumei Naga bible

JOB 4

¹Job, E ne hi chi paolai, ne jüphi laimoma? E chi paomoa ngasou buthoulou hore.

³Nenou mai alao laoye doupeie alia nenou lelouho mai vei phi-bah sü soutsü soukhou peie.

⁴Mai talinou phi sülouyu phaki, lelou ho-a veayu phaki nevei chipaotao nou phaola phaoshu peie.

⁵Chuo veahoyu teilesü ne hi vere, veayu ne hi vekhaie ne-a lelou hore, veayu nanou neye ve deipeiyu phaki ne veare.

⁶Ne Ramai ye thowe ae nevei hrümai hisü chaa touyu ali-a taomoe touwe, südonou ne lü-a loucheyu ae areih sü bulo.

⁷Ne tsü chodakhai khaio, chaa taomoa chechea hrüyu thaothao maiye souka sounghiyu buge?

⁸Tatamai nou dou hi thoutai ashi daothouyu büa mai shimai taoli nou hashi thou daothou khaitoua naki chachi phaki hashi chilouyu Enou ngaoe.

⁹Sümaiye sü Ramai vei rarou nanou teikhai teirü ashi büa souha baiwe.

¹⁰Ashimai nou souveo büa ra-a nou lewe ana Ramai nou puh huh dasha peiwu baiwe.

¹¹Souveo sü halia nütou loure ha-a thaire, süthaisü puh vei toutu taosü porarou ta-a baire.

¹²Teile ali hi chipao ali ahi kheikhei soua paove. Chipao sünasü avei noubei nou choue.

¹³Süphaki zhi-a mayu büa E zhi-a buhinou kaishue.

¹⁴Kaishu E sü pizhu lelou-a avasou teitei ngututu loure.

¹⁵Sübüa buyu teile hinou rako ali apah hi takoue, sütou khaie apfüphao teitei sü mai kava toure.

¹⁶Puhnou takou apah hi latsülou-a lekhai toumoa bue, nghithou nou puhye ngaoyuma puh vei zhai kakue touyu Enou shilou moe, raokhai toumoa zei tea bue, süphaki pai ali haibüa paoe,

¹⁷“Thailou veiyu mainou Ramai nghoujünou chechelou süvu? Eh maiye soupeiyu paopu jünou sheepu lousüwu?

¹⁸Rakiva buyu puh vei kilaimai koute puhnou louche moe, Puhnou rakivamai koute hia mah ngaolouwe.

¹⁹Sütoulouzü konai nou souyu deiphaomai lapasou-a souhalou veiyu khaongaotu ali büa nainou souyu hrikhaona yesü Puhnou louche shulai tea chowu?

²⁰Mai ali hai shona hri-a buyuma sükhai moa teikoumo jünou thailou veie.

²¹Puh hi buyu haveitao puh hinou popayu thai puhsü tsü hazei tea thai-a baiwe.”